Read Te B'aib'ara Ieremia 23 Bible Online

Ieremia 23 - Te B'aib'ara bible

Ieremia 23

¹Ngkami aika taan kairiia Au aomata, ti te bo ngkami ma taan kaawakintiibu aika kam tiringiia tiibu ma ni kamaaenako ia.

²Kam kaantaningaaki b'a kam na kaawakiniia Au aomata, ma ngaia kam a manga kakionako ia. Ma ngaia are, N na katuaaingkami n te tuua ae korakora ngkai, ni kabooa mwiin te kaairua ae kam a tia ni karaoia.

³N na kaokiia ni kabane Au aomata nakon mwengaia man aaba ake I a tia ni kamaaenako ia nako iai, ao a na rikirake b'a te botannaomata ae e korakora.

⁴I berita b'a N na kakaaeia taani kairiiri aika a na tararuaia kaanga taani kaawakintiibu ni koaua. A na bane ni mena au aomata ikekei, ao a na aki manga maaku n te b'ai teuana.

⁵N te bong teuana N na rinea te uea ae e raoiroi man ana utu Tawita, te uea ae e na wanawana ao e na tautaeka ma te eti.

⁶E na rau Iteraera, ao e na kaawakinaki Iuta i nanon ana tai n uea. E na aranaki te uea b'a “Te UEA ae e anga te eti.”

⁷E na roko te tai are kam na manga taromauriai iai. Ma kam na aki manga aranai b'a te Atua ae E Maiu are e kamaiuia Iteraera mai Aikubita.

⁸Ma kam nang aranai, b'a te Atua ae e Maiu are e kamaiungkami man te aba are i meang ao man aaba nako ake tabeua ake I a tia ni kairoroingkami b'a kam na nako iai. Ao kam na manga maeka riki ni bon oin abami.

⁹Ngkana I iangoia burabeti, ao I tiaoki, ao I ruru ni maaku kaanga aron temanna ae e koronimanging, i bukin ana taeka te UEA ma Ana taeka aika a tabu.

¹⁰A a tia ni kaburei kamanenaakin m'aakaia taian burabeti aika aki kakaonimaki i aon te aba arei ni kabuta. Ma ngaia are, E oniki aaba n uteute te Atua nakon taian rereua aika a kabuebue.

¹¹E taku te UEA b'a N na taetae ni kaangai: E bon rangi n uarereke iangoakiu Ngai ae te UEA iroumi ngkami aika burabeti ma ibonga, n te aro are kam bure naba nakon oin au Tembora!

¹²Ngkai N na katuuaingkami n te kabuanib'ai, ao kam na marannako ao kam na b'aka i nanon te rootongitong. Bon aio au taeka Ngai ae te UEA.

¹³A rangi n ribaaki irou burabetin Tamaria, i bukina ngkai a kab'arab'ara n aran B'aara ao a kairiia nako aomata.

¹⁴Ao kam rangi ni buakaka riki ngkami burabetin Ierutarem. Kam aki kakaonimaki nakon tuan ami mare ao kam aki konaa n taekina te koaua. Ao kam bon kairiia naba tabem'aang nakon te bure ngke kam bon riai ni buokiia ni kaokiia nako iu. Ngkami ma kaain Ierutarem ti te bo ami m'akuri aika a buakaka ma Totom ao Komora.

¹⁵Kam a tia ngkami aika burabetin Ierutarem ni kabutaa nako te aoraki nakon taabo nako. Ao bon anne bukina ngkai I berita Ngai ae te UEA b'a N na anganingkami te boitin ae moan te korakora b'a kam na kanna ma n nimma.

¹⁶Kam na aki ongo nakon aia kewe burabeti ni kewe aikai, ngkami aika kaain Iuta! Te rongorongo ae a tataekinna bon ti aia iango; e bon aki nako mairou, Ngai ae te UEA ae Moan te M'aaka.

¹⁷A m'ananga burabeti aikai nako ia aomata ake a rawa ni karineai aika a taningabono aika a bon karaoi b'aai ake a bon tangiri. A kaangai burabeti nako ia, E a tia ni berita te UEA b'a a na nako raoi b'aai nako.”

¹⁸Ma I tuangkami Ngai are te UEA b'a a tuai man iriira kabowin Au kauntira are i karawa burabeti aikai ke n ongo b'anaau n taetae. [84]

¹⁹A a buakaka! Ma ngaia are N na oreia n unu n ai aron te angibuaka ae e korakora.

²⁰E na bon aki toki unu, ni karokoa e tia te b'ai ae I a tia ni baaireia b'a N na karaoia. N te bong teuana ane kam na ataa raoi nanon te b'ai ae I nanonna.

²¹I bon aki kanako ia burabeti aikai ke n tuangiia b'a a na taetae nako imi, ma a biri ni kakaeingkami ma n tataekina aia rongorongo nako imi.

²²Ngke arona b'a a ira aia kabowi Au kauntira i karawa, ao a na riai n tia n tuangkami kaain Iuta b'a kam na katoka ami bure ma n okirai.

²³I mena n taabo nako n taabo aika a kaan ao aika a raroa,

²⁴i karawa ao i aon te aonnaba. Bon akea taabo aika a raba aika kam na konaa ni karabaingkami mairou.

²⁵A taku burabeti aikai b'a I a tia n anganiia te mii ke te kaotioti, ao a taekina te kewe n arau.

²⁶A nako b'aai ni kabane ake a taekin man nanoia aika a b'aoua. E na maanra aron te waaki aei?

²⁷A tataekina miia i bon irouia ao a kataia ni karikiia Au aomata b'a a na katinanikuai, n ai aroia aia bakatibu ngke a katinanikuai ma n taromauriia B'aara.

²⁸Ti te bo kaokoron miia ma au koaua ae kanga te uteute ao te uita. Ma ngkana a taetae burabeti i buku a na ti taekina te b'ai are I tuangiia.

²⁹Au taeka bon te ai ae e korakora; bon te aama ae urui taiani b'a akanne.

³⁰I bon kaaitaraia burabeti akanne akana a anai aia taeka i bon irouia ao a katanoatai b'a aongkoa Au rongorongo.

³¹Ao I kaaitaraia burabeti naba aikai aika a taekin oin taeka ao a taku b'a aongkoa taeka mairou.

³²Kakauongo nakon te b'ai ae N na taekinna Ngai are te UEA! I kaaitaraia burabeti aika a taekin miia aika a on n taian kewe. A taekin taian mii aikai ao a kairiia aomata nako n aia kewe ma aia kainikatonga. I bon aki kanako ia ke n tuangiia b'a a na nako, ao bon akea te buoka ae e konaa n reke mairouia. Bon aei Au taeka Ngai ae te UEA.”

³³Ieremia, ngkana e titirakiniko te burabeti ke te ibonga ke tao antai ni kaangai, “Iai ana rongorongo te UEA i bukira?” ao tuangiia ni kaangai, “Bon te uota ae e rawaawata ngkami i roun te UEA, ao E na karaoa taekam.”

³⁴Ngkana iai maibuakomi ae e kaangai, “Aio te rongorongo mai roun te UEA,” ao N na katuaaea ma ana utu nako, e ngae naba ngkana te burabeti ke te ibonga ngkoe.

³⁵Ma, n onea mwiin anne, ko na titirakina raraom nako ke am utu nako ni kaangai, “Tera te kaeka ae e anga te UEA?” ke “Tera ae e taku te UEA?”

³⁶E taraa n ae bon iai ami rongorongo n tatabemaningkami nako! Ma ngaia are, ngkana kam kaangai, “Aio te rongorongo mai roun te UEA,” kam a kab'aoua Au rongorongo nakon te kewe. Ururingnga b'a bon Atuam Ngai, te UEA ae Moan te M'aaka.

³⁷Ngkana ko nakon te burabeti, e raoiroi ngkana ko titiraki ni kaangai, “Tera Ana kaeka te UEA nakon au titiraki?” ke “Tera ae E taekinna te UEA?”

³⁸Ma ngkana ko aki ongotaeka nako iu ma ni kaangai, “Aio te rongorongo mai roun te UEA,”

³⁹N na anaiko ao N na karenakoko nako kiraroa. Ao i mwiina, N na kiitana te kaawa ae Ierutarem are I a tia n anga nako ia ami bakatibu.

⁴⁰Ko na bon aki konaa n inaomata man te kamaamaaeaki ao te b'ainrang.