Read Te B'aib'ara Ieremia 27 Bible Online

Ieremia 27 - Te B'aib'ara bible

Ieremia 27

¹N te tai ae e aki maan i mwiin rikin Iotia are natin Tetekia te mm'aane b'a te uea i aon Iuta, ao e tuangai te UEA

²b'a N na karaoa amou man kunin te man ao kaai aika a matoatoa ma ni katoka i aon roroau.

³Ao i mwiina, ko na kanakoa te rongorongo nako ia uean Etom, Moaba, Ammon, Turo, ao Titon. Tabeman mai buakoia mataniwi a mena i Ierutarem, b'a a kabowi ma Tetekia.

⁴Ma ngaia are, ko na tuangiia b'a a na tuangiia aia uea Au taeka ae e kaangai: Bon te UEA Ngai ae Moan te M'aaka ae Atuaia Iteraera,

⁵ae I karika te aonnaba ni m'aakau, ma aomatana, ao maan ni kabane. I baaireia b'a antai ae e na tautaekana te aonnaba,

⁶Boni Ngai ae I baaireia botannaomata aikai ni kabane nako aan m'aakan Au toro, ae Nebukaneta ae Uean B'aburon, ao I bon karaoia naba maan aika a aki manana b'a a na m'akuri i bukina.[95]

⁷A na bane ni m'akuri i bukina botannaomata ni kabane, ao a na m'akuri i bukin natina te mm'aane ma tibuna te mm'aane ni karokoa te tai are e na b'aka iai oin ana botannaomata. Ao i mwiina, ane a na m'akuri ana botannaomata i bukiia botannaomata aika a korakora ma uea aika a kakannato.

⁸E tei te amo i bukin m'aakan te uea are Nebukaneta, ao N na uruan aroia botannaomata ni kabane akana a rawa n ongotaeka i rouna. E na buakanaki i roun Nebukaneta, ao a na m'aiti akana ana mate n te buaka ke te baki ao te aoraki.

⁹A na bon iai aomata i nanon abanueam aika a taku b'a a konaa n taekin kanoan boong aika a na roko ke n taetae ma maate ke taiani mii ke rongorongo mairouia anti. Ma kam na aki katabei nanomi irouia ngkana iai mairouia ae e tuangkami b'a kam na aki ongotaeka i roun Nebukaneta.

¹⁰Ngkana kam ongo nakon taiani kewe aikai, ao N na uaakiningkami nakon taabo aika raroa nako man abami ma n tiringaki.

¹¹Ma ngkana kam kukurei n ongotaeka ngkoe ma am botannaomata nakon Nebukaneta, ao N na kariaia b'a kam na tiku i abami, ao a na teimatoa ni maiu ami aomata ma ni m'akuri n aia oonaroka nako.

¹²I mwiin taetaeu nako ia mataniwiin abanuea ake i rarikira, ao I a nakon te uea are Tetekia ma n tuangnga te b'ai naba arei. Ao i mwiina, I taku: Tetekia, ngkana kam tangiria ni maiu ngkoe ma kaain Iuta, ao kam riai n ongotaeka nakon Nebukaneta ao kaain B'aburon.

¹³Ma ngkana kam rawa, ao ko na mate ma ami aomata n te buaka, te baki, ao te aoraki, n aron e a tia ni kauringngkami iai te UEA.

¹⁴A a tia n tuangngkami ami burabeti b'a akea manenan te ongotaeka i roun Nebukaneta, ma kam na aki ongo n aia kewe.

¹⁵A taku burabeti aikai b'a a taetae i bukin te UEA, ma E bon aki kanako ia te UEA. A kewe! Ngkana kam karaoa ane a taku, ao kam na kaai n uaakinaki ma ngaia nakon te aba teuana ma n tiringaki. Bon anne Ana taeka te UEA.

¹⁶Ao ngke e bane au taetae ma te uea, ao I nako ia ibonga ao I tuangiia te b'ai are e taekinna te UEA: Kam na aki ongo irouia burabeti ngkana a taku b'a e na kaoki b'aai ni kabane kaain B'aburon ake e anai ngkoa man te Tembora. A kewetaia burabeti aikai!

¹⁷Ngkana kam iangoia b'a kam na ongotaeka i roun uean B'aburon, ao kam na maiu. Ma ngkana kam ongo irouia burabeti aikai, ao e na riki te kaawa aei b'a b'ariko ni b'ai aika a uruaki.

¹⁸Ngke tao arona b'a I a tia n taetae nako ia burabeti aikai, ao a na ataa te b'ai ae N nang karaoia. Ao a na buubutiai b'a N na aki kariaia b'a a na anaaki b'aai ni kabane man te Tembora ao ana bareti te uea ao b'ain Ierutarem ni kabane.

¹⁹Ao te uea are Nebukaneta ngke e uota nako uean Iuta, Ieoiakin [96] are natin Ieoiakim te mm'aane, ao mm'aane ni kabane ake taani kairiiri mai Iuta ao Ierutarem nako B'aburon,

²⁰ao e katikui taiani boua, tangke ake taian buraonti, te kaanikatikitiki, ao kaub'ain te Tembora ake tabeua.

²¹“Ongora nakon te b'ai ae I taekinna Ngai ae te UEA ae Moan te M'aaka, ae Atuaia Iteraera, i bukin taian kaub'ai ake a tiku i nanon te Tembora ao n ana bareti te uea i Ierutarem:

²²A na uotaki nako B'aburon ao a na tiku ikekei ni karokoa te tai are N na manga m'annanoia iai. Ao i mwiina, N na uoti rikaaki ma ni kaokiia nakon te tabo aei. Bon aei Au taeka Ngai ae te UEA.