Read Te B'aib'ara Ieremia 28 Bible Online

Ieremia 28 - Te B'aib'ara bible

Ieremia 28

¹Rimwi riki n te ririki naba anne, n te kanimaua n nam'akaina n ana kaaua n ririki n uea Tetekia, ao e roko nako iu n te Tembora Anania are natin Atura te mm'aane are mai Kibeon. Ao e tuangai ana taeka te UEA [97]

²i mataia ibonga ma tabeman riki ake a ongora ao e taku: Bon te UEA Ngai ae Moan te M'aaka ae Atuaia Iteraera, ao N na urua te amo ae mena i roroaia botannaomata nako are e karikiia b'a tooro.

³Ao i nanon uoua te ririki, N na kaoki nako Ierutarem b'aai ni kabane ake e uoti nako mai B'aburon.

⁴A na kariaiakaki te uea are Ieoiakin ma aomata ake tabeman ake a uotaki nako B'aburon b'a a na oki naba nako ikai. A riki b'aai aikai ni kabane i bukina ngke I urua m'aakan uean B'aburon!

⁵Ao a bon tei naba ibonga ma aomata tabeman n te tabo arei, ai ngaia are I taetae ni kaangai:

⁶Anania, Au kaantaninga b'a E na karaoa raoi ane ko taekinna te UEA. Au kaantaninga b'a E na kaoki b'aai ni kabane ake a uoti nako kaain B'aburon man te Tembora, n te aro are a na kariaiakaki n okira mwengaia ara aomata ake a uotaki ngkoa nako B'aburon.

⁷Ma N na kauringkami ao aomata ni kabane

⁸b'a i m'aain bungiakira, ao burabeti a taetaekina te abanuea ae e korakora ae e na oreaki n te buaka, te kabuanib'ai, ao te aoraki.

⁹Ao n te tai aei, kam taku b'a e na reke iroura te rau. Ma ti te b'ai ae ti na ti karaoia, te tataninga n nooria ngkana bon mai roun raoi te UEA.

¹⁰Ao e anaa te oko Anania mai roroau ao e urua.

¹¹Ao e manga taku, “E taku te UEA b'a aio aron te b'ai ae N na karaoia nakon te m'aaka are i roun Nebukaneta i aoia botannaomata nako, e na korobukin aei i nanon te maan ae e aki raka riki nakon uoua te ririki.” Ao I kiitana te Tembora,

¹²ao tabeua te tai i mwiina, e tuangai te UEA b'a

¹³N na nako n okira Anania ma ni kaangai: E taku te UEA b'a ko konaa n otea te amo ae e karaoaki ni kaai aika a matoatoa, ma e na manga onea mwiina n te amo ae e karaoaki man te biti.

¹⁴E a tia n taku te UEA ae Moan te M'aaka, ae Atuaia Iteraera, b'a e na katokaa te amo ae te biti i aoia botannaomata aikai ao ane a ana m'akuri i bukin te Uea are Nebukaneta are kaain B'aburon. E taku te UEA b'a E na karaoia naba maan aika a aki manana b'a a na m'akuri i bukin Nebukaneta.”

¹⁵Ao i mwiina, I tuanga Anania te baei, ao I a manga taku, “Ongora, Anania! E aki kanakoko te UEA, ao ko karaoia aomata aikai b'a a na kakoaua te kewe.

¹⁶Ai ngaia are E taku te UEA b'a e na baairea taekam. Ko na mate i m'aain banen te ririki aei i bukina ngkai ko a tia tuangiia aomata b'a a na kakaitaraa nanon te UEA.”

¹⁷E mate Anania n te kaitiua n nam'akaina ni bon te ririki naba arei.