Read Te B'aib'ara Ieremia 3 Bible Online

Ieremia 3 - Te B'aib'ara bible

Ieremia 3

¹E taku te UEA nako ia Iteraera: Ngkana e a manga mare te aine ae e raure ma buuna, e konaa are moan buuna ni manga mare riki ma ngaia? E aki, i bukina b'a e na kabuakaka aon te aba te baei. Ma a bon m'aiti riki antimi ngkami aika Iteraera nakon m'aitin ana tangira ainen mataawa. Ao N na kangaa ni manga kaokingkami?

²Kam na ti kataia ni kakaaea tabukin te tabuki teuana ike kam a tia n nako iai n taromaurii anti tabem'aang n aromi ni wene ni bure. [11] Kam tekateka i rarikin te kawai kaanga te tia kimoa ae e karaoa te bakairaa, bon ti ngkoe ae ko angaanga rab'atam nako ia aomata aika a m'ananga. E kabuakaka te aba ami bure n aki kakaonimaki.

³Ma ngaia are, I rawa Ngai ae te UEA ni kab'aka te karau n te aumeaang. Ma ko aki mamaa naba n te b'ai ae ko a tia ni karaoia kaanga te aine ae ainen matawa.

⁴Kam aranai b'a tamami ke raoraomi ae e a tia ni m'arua n te tai ae e maan;

⁵kam butiai b'a N na katoka uniu, ma kam aki katoka karaoan te bure.

⁶Ngke e uea Iotia[12] ao E taku te UEA: Ieremia, te abanuea are Iteraera [13] ma te ainenum'a ae e aki kakaonimaki are e a manga riki b'a te aine ae ainen matawa i aon taian tabuki ao i aan nuun taiani kai aika a korakora.[14]

⁷I ataia b'a e a tia n aki kakaonimaki te abanuea meang ao e a tia ni karaoi buure aika a m'aiti,

⁸ma e ngae n anne, ao I bon tangiria naba b'a e na okirai. Ma e aki, ngaia are I a kaakiia ma ni kanakoa. E noora te b'ai ae e riki tarina are te abanuea are Iuta, ma e bon aki tabe naba iai, ao I tarataraia ngke e a manga moana naba ana aki kakaonimaki kaanga tarina.

⁹E bon aki raraoma te abanuea are Iuta ngkai e riki b'a ainen matawa, ao e aki tabe naba ngkai e kabuakaka rab'atana ao te aba n ana m'akuri n taromaurii taian bouananti aika a karaoaki n taian atiibu ao taian kai.

¹⁰Ao te b'ai riki ae moan te buakaka, te botannaomata ae Iuta ngke e bakaaea te okirai.

¹¹A raoiroi riki Iteraera ngke a aki kataia ni bakaaea te okirai.

¹²Ieremia, ko na takaarua nako meang: Iteraera, bon ami UEA Ngai okirai! Kam aki kakaonimaki ao kam rangi ni kaunai, ma I bon nanoanga, ma ngaia ae, I kab'arai ami bure.

¹³Kam na ti kaotia raoi b'a kam bon kamangao ao kam taromaurii antiia ianena i aan kaai aika a korakora n taabo n aki akaaka.

¹⁴Bon ataei ngkami aika kam aki kakaonimaki, ma bon au b'ai ngkami. Okira mwengami! N na anaa temanna ke uoman man ami kaawa n tatabeua nako ao ami kaainga ao N na uotiia nako Tion.

¹⁵Ao i mwiina, N na rineia taan tautaeka aika a wanawana aika a na ongotaeka irou, ao a na kakaawakiningkami kaanga taan kaawakintiibu.

¹⁶E na riki rake m'aitimi, ao e na akea manenan uringakin te Atiniberita ke ni manga karaoa ae e boou. [15]

¹⁷E na riki te kaawa ni kabane ae Ierutarem b'a au kaintokanuea. [16] A na bane n nakomai botannaomata n taromauriai, ao a na aki manga iri nanon taningamatoaia ao nanoia aika a buakaka.

¹⁸Ao i mwiina, n aaba aika i meang, ngkami aika kaain Iuta ao Iteraera kam na manga ikotaki, ao kam na oki nakon te aba are I anganiia ami bakatibu.

¹⁹I aki toki n tangiria b'a N na karaoingkami b'a kaanga bon au ataei ma n anganingkami te aba ae te kabanea n tamaroa, te aba ae te kabane n tikiraoi i aon te aonnaba. I tangiringkami b'a kam aranai b'a “Tamami” ao kam na aki rairaki nako mairou.

²⁰Ma n onea mwiin anne, kam riki b'a kaanga te ainenum'a ae e urui taiani berita ni mare. Kam a tia n aki kakaonimaki nako iu. Bon aio au taeka Ngai ae te UEA.

²¹Kakauongo nakon taian karongoa mai aon taian tabuki! Bon aomatan Iteraera aika a tang ma ni buubutiai b'a N na kaekai aia tataro. A m'aninga taekau ao a rinea te kawai ae e kaairua.

²²N na kaangai nako ia, “Okirai, N na kamaiungkami man ami aki kakaonimaki.” Ao a kaeka ni kaangai, “Ti na okiriko, b'a bon ngkoe ara UEA ao Atuara.

²³Ti taromaurii bouannanti i aon taian tabuki ao e korakora karongoaara, ma bon akea manenaia boni Ngkoe ae Ko konaa ni kamaiura.

²⁴Ni moa man aia bong ara bakatibu ngke te botannaomata ngaira ae e uarereke, e a tia n anai ara uita ara nanai ni man ma natira mm'aane ao natira aine B'aara are te kananoanga. [17]

²⁵Ti a tia ni kakaaitarako kaanga aroia ara bakatibu, ao ti a mamaa n ara bure.”