Read Te B'aib'ara Ieremia 31 Bible Online

Ieremia 31 - Te B'aib'ara bible

Ieremia 31

¹E taku te UEA: Iteraera, I berita b'a n te bong teuana a na manga moan riki naba ami baronga nako b'a Au aomata, ao Ngai N na riki b'a Atuami.

²I akoia aika a biri nako i nanon te rereua b'a a na rawei maiuia man te mate. I anganiia te rau, ao ngkana e roko raoi te tai, N na karaoa naba aei nako imi. Bon aei Au taeka Ngai ae te UEA.

³Tabeua boong aika a nako, E kaoti te UEA nako iu ao E taku: Iteraera, N na tangiriko n taai nako; bon anne bukina ngkai I aki toki n taotaona nanou ma n akoi.

⁴Kam rangi ni kakaawaki irou, ai ngaia are, N na manga katea ami botannaomata. Kam na manga b'ab'atere ni kukurei ma ni katangitang n taian timbere.

⁵Kam na uniki taiani kureebe i aon maungan Tamaria ao kam na kukurei n taiani kureebe.

⁶N te bong teuana ane a na takaarua koraki akana tararuaa maungan Tamaria ni kaangai, “Ti a nako Tion n taromauria te UEA ae Atuara.”

⁷E taku te UEA: Karaoa ami bootaki ni kukurei ao anene i bukin Iteraera, te botannaomata ae te kabanea ni korakora. Anga ami nebonebo ao takaarua, “Nakomai, Kamaiuia Am aomata, te UEA! Kamaiuia nikiraia Iteraera.”

⁸Boni Ngai ae te UEA, ae N na kairiia Au aomata b'a a na oki mai B'aburon ao man taabo nako n te aonnaba. A na mena ikekei te mataki ma te m'auku. Aine aika i aon kawaia n riki b'a tiina ao aine aika a na bung a na roko naba ma n riki b'a kaain te koraki n aomata ae e korakora.

⁹Ane a na tang ma n tataro ngkana I a kaokiia nakon mwengaia. N na kairiia i nanon raanga n ran. A na nakonako i aon te kawai ae e booraoi ao a na aki reke waeia. Boni Ngai tamaia Iteraera, natiu ae I rangi n tangiriia.

¹⁰Ongo irou, ngkami aika botannaomata aika kam kaan ma akana kam mena n taabo aika a raroa i taari. I kamaaeia nako ia Iteraera, ma N na manga ikotiia riki. N na kaawakiniia kaanga te tia kaawakintiibu ngkana e tararuaia ana nanai ni man;

¹¹N na kamaiuia mairouia aia kairiribai ake a na konaa ni kab'akaia.

¹²A na roko Au aomata n te Maunga are Tion ma ni karaoa aia bootaki ni kukurei; a na oota moaia i bukin Au kakab'aia. N na anganiia te uita, te kureebe, ao b'aan te oriwa, ao ai uana naba ma taian tiibu ao taiani kao. A na teetekeraoi Iteraera ao a na rikirake kaanga te nne n aroka ae e m'aiti te ran iai.

¹³A na bootaki ni kukurei ma n ruruoia, ateiaine ao rorobuaka, n ikotaki naba ma ami kara, i bukina b'a N na anganiia te raunnano ao N na onika rawawataia nakon te kukurei.

¹⁴N na kakab'aiaia Au aomata n te am'arake ae e raka riki nakon are a kainanoia, ao a na kukurei ibonga n anaa kanaia te iriko ni man are a bon taku. Bon aio Au taeka Ngai ae te UEA.

¹⁵E ongo te aba te tang ae e korakora mai Ram'a [103] Tangin Nei Rakera i bukiia natina, ao e rawa ni karauaki nanona, i bukina ngke a mate.

¹⁶Katoka tangim ao kaoi rannimatam. A na bane ni kabooaki mwiin b'aai ni kabane ake ko a tia ni karaoi i bukiia natim; ane a na oki man abaia kairiribai.

¹⁷Bon iai te kaantaninga i bukin am bong aika a na roko. Ane a na okira mwengaia natim. Bon aei Au taeka Ngai ae te UEA.

¹⁸A tangi nako iu Iteraera ao a taku, “Ti te bo ngaira ma taiani kao, ma Ko uruira Ngkoe ae te UEA, ao reireiniira aron te ongotaeka. Bon Atuara Ngkoe taiaoka kaokiira nakon mwengara.

¹⁹Ngke ti uarereke ngkoa, ti m'aninga nako ao ti bure, ma i mwiina ti uringaaba n te b'ai ae ti a tia ni karaoia. Ti mamaa ao ti b'ainrang. ao ti tangiria n okiriko.”

²⁰Kaain Iteraera, bon natiu ngkami aika kam rangi n tangiraki. E koaua b'a I aki tangiringkami nakon b'aai nako? Ngke I aki toki ni karawaawataingkami, ma I tangiringkami b'a kam na meemena i rarikiu, b'a I aonga nanoangaingkami. Bon aio Au taeka Ngai ae te UEA.

²¹Au aomata aika kam tangiraki, kam na kanikinaea kawaimi n okira mwengami n taiani b'ariko n atiibu ma boua aika kanikina. Bon te kawai naba are kam kiitana naba iai mwengami.

²²Tera ngke kam teimatoa ni kakaonimaki? N na bon kakoauaa b'a n te tai teuana ao a na manga kaokoro b'aai nako, kaanga kaokoron te aine ae e kaawakina te mm'aane.

²³E taku te UEA ae Moan te M'aaka ae Atuaia Iteraera: I berita b'a N na kainaomataia kaain Iuta ma ni kairiia rikaaki nakon aia kaawa ni koaua. Ao ngkana I karaoa aei, a na manga taetae riki ni kaangai, “Ti tataro b'a E na kakab'aia mwengana te UEA, te maunga ae e tabu i Ierutarem ike e tei iai ana Tembora.”

²⁴A na maeka aomata i Ierutarem ao ni kaawan nako Iuta. A na riki tabeman b'a taan ununiki ao tabeman a na riki b'a taani kaawakin tiibu.

²⁵A na manga reke maiuia ma korakoraia koraki akana a kua ma ni kainano,

²⁶ao a na marurung raoi ngkana a tia n uti ni matu.

²⁷N te bong teuana, a na riki Iteraera ma Iuta b'a Au tawaana ike a na rikirake iai Au aomata ma Au man.

²⁸Ni boong ake ngkoa, I baairea kouwaakaeaia, ma kab'akaia, ma uruanan aroia. Ma ngkana e roko te bong anne, ao N na manga baairea aron unikaia ao buokaia b'a a na rikirake.

²⁹Akea ae e na manga nakonako ni kaangai, “A kanaki kureebe aika a mao irouia kaaro katuka te b'ai ae e mao i nanon wiia natiia.”

³⁰N te bong arei, a na bane aika a kana te kureebe ae e mao n namakina maona, ao akana a bure a na motikaki taekaia nakon te mate.

³¹E taku te UEA: E na roko te tai are N na karaoa iai te boraraoi ma Iteraera ao Iuta.

³²E na bon kaokoro ma te boraraoi are I karaoia ngkoa ma ami bakatibu ngke I kaotinako ia mai Aikubita. E ngae ngke Atuaia Ngai, ma a bon urua naba te boraraoi anne.

³³Bon aei te boraraoi ae e boou ae I a manga karaoia Ngai ae te UEA ma ngkami Iteraera: “N na korea Au tua i nanoia ma aia iango. N na riki b'a Atuaia, ao a na riki b'a Au aomata.

³⁴“A na aki manga reireina temanna i bon irouia aron te ongotaeka i Rou. I berita Ngai ae te UEA nako ia ni kabane b'a a na ongotaeka irou, ti te bo aomata nako ma taan tautaeka. N na kab'arai aia bure, N na m'aninga taekan aia m'akuri aika a buakaka aika a tia ni karaoi.”

³⁵Bon te UEA Ngai ae Moan te M'aaka. I tuanga taai b'a e na anga te oota ni katoa bong, nam'akaina ao itoi b'a a na oota n te tairiki, ao naao b'a a na rurunga.

³⁶N na aki konaa ni m'aninga n anga taian tua aikai, ao N na bon aki manga oki n totokoa rikiraken a na botannaomata Iteraera. Bon aei Au taeka Ngai ae te UEA.

³⁷Kam konaa ni baairei taiani karawa? Kam konaa n neweaba kabin te aonnaba? Ao anne bukina irou ngkai e kangaanga b'a N katinanikuia Iteraera n taai nako, e ngae ngkana a a tia ni bure. Bon aei Au taeka Ngai ae te UEA.

³⁸E taku te UEA: N te bong teuana, e na manga riki b'a Au b'ai Ierutarem. E na manga kateaki ma tiana ake a biri man te Taua are Ananera nakon te Mataroa are Koona.

³⁹E na waakinako te tia mai ikanne ni kaineta te Maunga are Kareb'a. ao i mwiina, e manga b'aoua nako Koa.

⁴⁰E na katabuaki naba te M'arua are Innom are e rangi n ribaaki b'a e na riki b'a Au b'ai, ao ai uana naba ma taiani karaabee ake i mainiku ake a ruorikaaki nakon te Mataroa are Aoti nako nanon te M'arua are Kiteron. E na aki manga oki n uruakaki Ierutarem.