Read Te B'aib'ara Ieremia 32 Bible Online

Ieremia 32 - Te B'aib'ara bible

Ieremia 32

¹E taetae te UEA nako iu n ana katebwina n ririki te uea are Tetekia [104] [105] i aon Iuta, are bon ana katebwi ma wanua n ririki te uea are Nebukaneta n uea i aon B'aburon.

²N te tai anne, a tia ni katobibia Ierutarem tautian B'aburon, ao I mena ngai n te karabuuti n aia katawanang n tei n te bareti.

³E a tia n tua Tetekia b'a N na tauaki ikekei i bukin b'aai ni kabane ake I tuangiia aomata ake E taekin te UEA ae a kaangai: Bon te UEA Ngai, ao N nang katokanikaia uean B'aburon i aon Ierutarem.

⁴E na tauaki te uea are Tetekia ao e na uotaki nakon te Uea are Nebukaneta, are e na i taramata n taetae ma ngaia.

⁵Ao i mwiin anne, e na uotaki nako Tetekia nako B'aburon, ike e na tiku iai ni karokoa tian are N na karaoia nakoina. Ma ngaia are, ngkana kam buaka ngkami aika kaain Iuta ma kaain B'aburon, ao kam na konaaki. Bon aei Au taeka Ngai ae te UEA.

⁶Rimwi riki, I a mena n te karabuuti, ao E taku te UEA nako iu:

⁷Ieremia, e na kawariko ai tarim are Anamera, are natin tarin tamam are Tiarum. Ane e na kabonakoa ana tawaana are i rarikin te kawa are Anatota, ma i bukina ngkai bon am koraki ni kaan, ao bon iai riaim ni kabooa, ao ngkana ko karaoa anne, e na bon tiku ni kaawakinaki n te utu.” E a tia n tuangai te UEA b'a N na kabooa [106]

⁸Ao e roko Ananera, n aron are E a tia ni berita iai te UEA ao e taku, “Taiaoka kabooa te tawaana are i rarikin Anatota i abaia te baronga are Beniamin. Bon iai riaina iroum ni kabooa, ao ngkana ko kabooa e na tiku iai i nanon ara utu.” E a tia n tuangai te UEA b'a N na kabooa

⁹mai roun Anamera, ai ngaia are, I karaoa arei. Boona bon tebwi ma itiua te m'akoro n tirewa, ao I katinei ni kabane i aon te kainikatine.

¹⁰I tiainaia ao I kanikinaea mwiin te m'akuri, ao I anga b'a e na kakoauaaki, ao I katinea rawaawatan te m'ane i aon taiani kainikatine.

¹¹Ao I mwiina, I anai katotoon mwiin te m'akuri ni boob'ai ake uoua te katoto are e kanikinaeaki, are kanoana taian tua ma aroia, ao te katoto are e uki

¹²ao I angan B'aruka are natin Neria te mm'aane are tibun Maateia, ao I anga ngaia nakoina i matan Anamera ma taani kakoaua ake a tia n tiainaa kaboakina, ao ai aomata ake tekateka ni mamataku mai nanon te katawanang.

¹³I taku nakon B'aruka i mataia ni kabane,

¹⁴“E a tua te UEA ae Moan te M'aaka ae Atuaia Iteraera, b'a ko na anai mwiin taiani m'akuri aikai, ni kauoua, mwiin te m'akuri are e kabob'ai are e kanikinaeaki ao katotoona, ao ko na karin i nanon te tiaeki te tano, b'a a aonga n tiku i nanon ririki aika a bati.

¹⁵E a tia n taekinna te UEA ae Moan te M'aaka, ae Atuaia Iteraera, b'a a na manga kabooi taian auti, tawaana, nne n aroka ni kureebe man te aba aei.”

¹⁶Ao i mwiina, I tataro ni kaangai:

¹⁷Te UEA ae te Atua, Ko arora naako baim ao Ko karaoa karawa ao te aonnaba. Ko konaa ni karaoi b'aai ni kabane.

¹⁸Ko kaota am akoi nako ia roro aika ngaa, ma ko bon katuaaia aomata i bukin aia bure aia karo. Bon te UEA Ngkoe ae Moan te M'aaka.

¹⁹Ko karaoi am babaaire ni wanawanam ae e korakora, ao Ko karaoi b'aai aika a korakora ni kabane aika Ko a tia ni baairei ni m'aakam ae e korakora. Bon akea te b'ai teuana ae ti konaa ni karaoia ni karabaa mai matam, ao Ko anganiira kaniwangara ke ni katuaaira n aron are e bon riai n reke nakoira.

²⁰Ko kakannato i bukin Am m'akuri aika a kamimii i Aikubita, ao Ko bon teimatoa ni karaoi i aon Iteraera ao ai uana naba n taabo nako n te aonnaba.

²¹Ko kakamaakuia kaain Aikubita n am kakai, ao Ko arora baim ae e korakora ni kamaiuia Am aomata aika Iteraera mai Aikubita.

²²Ao i mwiina, Ko anganiia Iteraera te aba ae e rawata iai te miriki ma ana karewe te manibeeru, n aron are Ko a tia ni berita iai nako ia ara bakatibu.

²³Ma ngke e a reke irouia ara bakatibu te aba aei, ao a manga aki ongotaeka nakoim. Ao ngkai Ko a katuaaia Iteraera n te kabuanib'ai.

²⁴E a buakanaki ngkai Ierutarem, ao ti a kainano ni baki ma n aoraki. A a tia kaain Aikubita ni katei b'ain ninian oon ara kaawa, ao Ko konaa n nooria b'a E nang tauaki Ierutarem n aron are Ko a tia n taekinna.

²⁵Ma ngaia are, Ko aera ngkai Ko tuangai b'a N na karekeia taani kakoaua ma ni kabooa te tawaana n au tirewa, ao ngaia bon i aon kawaina n tauaki irouia kaain B'aburon?

²⁶E kab'arab'ara te UEA ni kaangai:

²⁷Ieremia, Bon te UEA Ngai ae te Atua, ao I bon konaa ni karaoi b'aai ni kabane!

²⁸E bon koaua b'a N nang bon kam'anangaa te Uea are Nebukaneta [107] b'a e na taua Ierutarem.

²⁹A a kaman buakana te kaawa kaain B'aburon, ao ane a na taua ma ni kaurarakea. E a tia ni kaunai kaain Ierutarem ngke a aki toki n tatam'arake nako taubukin aia auti ma ni kabuoka te b'ai ni kaboiarara nakon B'aara ao a anga te wain nako ia anti ake tabem'aang. Ao ngkai a nang kabuokaki auti aikai ni kab'akaaki!

³⁰N rongorongoia Iteraera ma kaain Iuta mai moana, a bon aki kakukureiai ao a kaunai n te b'ai are a tia karaoia.

³¹A a tia ni kaunai kaain te kaawa aei ni moa man te tai are e moan kateaki iai. I a tia ni baaireia b'a N nang urua

³²i bukin m'akuri aika a buakaka ni kabane aika a tia ni karaoaki irouia kaain Iuta ma Iteraera, n reitaki ma ibonga ma burabeti.

³³A tinanikuai; e ngae ngke I teimatoa n reireiniia, a bon aki kan ongo ke n reireiniia aroia ae e raoiroi.

³⁴A a tia ni katei taian bouananti i nanon au Tembora, ao ngkai e a aki tau i bukin taromauriau.

³⁵Ao a kairiia kaain Iuta nakon te bure ngke a manga karaoi taabo i bukin taromaurian B'aara n te M'arua are Innom, ike a karean iai natiia mm'aane ma natiia aine nakon Moreka. I bon tuai man tuangiia b'a a na karaoi buure aika a rangi n ribaaki aikai.

³⁶Ieremia, E boni koaua te b'ai are ko taekinna. A a rawaawata Iteraera n te baki ma te aoraki, ao e na bon taua Ierutarem Uean B'aburon are Nebukaneta.

³⁷E maraki nanou irouia kaain Ierutarem, ao N na kamaae nako ia nakon abaia ianena. Ma N na manga kaokiia n te bong teuana nako ikai ma ni kamaiuraoia.

³⁸A na riki b'a Au aomata, ao N na riki b'a Atuaia.

³⁹N angan nanoia te kantaninga ae ti teuana n te maiu aei b'a: neboakiu n taai nako, are e na bon nako ia mwiina ae e raoiroi ma aia kariki.

⁴⁰N na karaoa te boraraoi ma ngaiia ae akea tokina, N na aki manga kerikaaki man karaoan ae e raoiroi nako ia; ao N na karina maakaku inanoia, b'a aonga n aki rairaki nako mairou.

⁴¹N na kukurei ni karaoa ae e raoiroi nako ia, ao N na katea aroia b'a a na riki raoi b'a kaain te aba aei ni koaua.

⁴²E ngae ngke I a tia ni karokoa te kabuanib'ai i aoia aomata, ma n te bong teuana N na karaoi b'aai ni kabane aika a raoiroi i bukiia.

⁴³Ieremia, ngkana ko kabooa te tawaana, ko kaotia b'a a na roko boong aika a na kabooaki iai taian tawaana ma ni manga kaboonakoaki. Ko taku b'a e a tia n tauaki te aba aei irouia kaain B'aburon ao e a tia n riki b'a te rereua, akea aomata ma maan iai.

⁴⁴Ma a na roko boong, are a na kabanei iai aia tirewa aomata ni kabooi iai tawaana n taabo nako—i abaia kaain Beniamin, n te aono are i rarikin Ierutarem ao kaawan nako Iuta, ao n te aba are e tabukibuki, ao n aaba ake a rinano ake i maeao, ao n Rereua ake i Maiaki. A na riki taani kaboob'ai ma taani kaboonako b'aai ao taani kakoaua b'a ngaia aika a na tiainaa ao ni kanikinaea te beeb'a i bukin kaboonakoan te tawaana, i bukina ngkai N nang kaoka te aba aei nako ia Au aomata. Bon aei Au taeka Ngai ae te UEA.