Read Te B'aib'ara Ieremia 34 Bible Online

Ieremia 34 - Te B'aib'ara bible

Ieremia 34

¹Bon iai ana taanga ni buaka te Uea are Nebukaneta [110] ae e kaainaki irouia aomata nako man ana tautaeka. E m'ananga ngaia ma ana taanga ni buaka ni buakana Ierutarem ao kaawa nako ake i rarikina. E taetae te UEA nako iu n te tai anne

²b'a N na taetae nakon Tetekia ni kaangai: Boni Ngai ae te UEA ae N nang kam'ananga Nebukaneta b'a e na taua te kaawa are e buubura arei ma ni kabuokia ni kab'aka. [111]

³Ao ko na anaaki b'a te bure ma ni uotaki nakon Nebukaneta, ao e na itaramata ma ngkoe n taetaenikawai. Ao i mwiina, ko na uotaki nako B'aburon.

⁴I berita Tetekia b'a ko na aki mate n tain te buaka.

⁵Ko na boni mate i nanon te rau. A na tang aomata ngkana ko mate, ao a na kaura te ai ae e korakora ni kaota karineam, n aron are a karaoia uea ake a tautaeka i m'aaim nako ia ami bakatibu,

⁶Ao I m'ananga nakon Tetekia ao I tuanga te b'ai are E taekinna te UEA.

⁷Inanon te tai anne, e kataia uean B'aburon n ninia nonon Rakiti, Ateka, ao Ierutarem, ake kaawan Iuta ake tenua aika a tuai n tauaki.

⁸Ao a tia ni karaoa te boraraoi te Uea are Tetekia ma kaain Ierutarem b'a a na kainaomataia [112] [113]

⁹aia toro ake bon kaain Ebera, aika mm'aane ma aine, b'a e na akea temanna ae e na torona raona n Iteraera.

¹⁰Ao a bane ni boo nanoia aomata ma aia taani kairiri b'a a na kainaomataia aia toro ma n aki manga anaia b'a aia toro. Ao a bane ni kainaomataia,

¹¹ma rimwi riki, a manga biti nanoia, a manga kaokiia, ao a manga kairoroia b'a a na manga riki b'a aia toro.

¹²Ma ngaia are, E a manga tuangai te UEA b'a N na kaangai nako ia aomata:

¹³Bon Atuaia Iteraera Ngai: I karaoa ngkoa te boraraoi ma ami bakatibu ngke I kaotinako ia mai Aikubita, ike a tia n tautoronaki iai.

¹⁴Ao e taekinaki ni m'akoron te boraraoi anne b'a kam na riai ni kainaomataia tooro aika kaain Ebera i mwiin onoua aia ririki ni m'akuri iroumi. Ma a aki kan kubarai ke n ongo n te b'ai are I taekinna ami bakatibu.

¹⁵Tabeua te bong n nako, kam bita nanomi b'a kam na karaoa te b'ai ae N na kukurei iai. Kam bane ni kukurei ni kainaomataia raomi ni I-Iteraera, ao kam karaoa te boraraoi i matau, i nanon te Tembora are I taromauriaki iai.

¹⁶Ma kam a manga bita riki nanomi ao kam a manga kamatauningaai. Kam a manga bane ni kaokiia ami toro ake kam a tia ni kainaomataia n aron are a tangiria, ao kam a manga kairoroia nakon te tautoronaki.

¹⁷Kam a tia n aki ongotaeka i Rou ngkai kam a manga aki anga te inaomata nako ia ami toro. Ma ngaia are, N na anganingkami te inaomata-te inaomata ni mate n te buaka ke te mate n te baki. N na karikingkami b'a kam na rangi n ribaaki irouia botannaomata nako n te aonnaba.

¹⁸Kam bubutiai b'a N na riki b'a te tia kakoaua ngke kam karaoa te boraraoi i bukin kainaomatakiia ami toro. Kam korouaa te kaoteteei nakon uoua m'akoro, ao kam nakonako i marenan m'akorona akanne. Ma kam a tia ngkami aika kaain Ierutarem n urua te boraraoi anne n reitaki ma Au boraraoi ma Iteraera. Ma ngaia are, N na karaoa naba nakoim are kam karaoia nakon te kaoteteei.

¹⁹N na kariaia b'a a na anaingkami ni kabane ami kairiribai b'a taenikai, n reitaki ma taani kairiri i Iuta ma Ierutarem, ana mataniwi te uea, ibonga, ao aomata ni kabane aika a nakonako i marenan m'akoron te kao te ataei ake uoua.

²⁰A na tiringkami kairiribai aikai ma ni katikui rab'atami n aki akaaka i aon te tano b'a kanaia mannikiba ao maan aika a aki manana.

²¹N na bon anga naba uean Iuta are Tetekia ma ana mataniwi nako ia akana a tangiria n tiringiia. N na anga ngaiia nako ia tautian B'aburon b'a a na manga oki naba ni buakaningkami.

²²N na anga te babaaire, ao a na manga oki nakon te kaawa ae e buubura aei. A na buakanna, a na taua, ao a na kabuokia ni kab'aka. N na karika aia kaawa aika a buubura b'a kaanga taian rereua aika akea aika a maeka iai. Bon aei Au taeka Ngai ae te UEA.