Read Te B'aib'ara Ieremia 43 Bible Online

Ieremia 43 - Te B'aib'ara bible

Ieremia 43

¹I tuangiia aomata ni kabane te b'ai are E a tia n tuangai te UEA.

²Ma a taku nako iu Ataria, Ioanan ao tabeman mm'aane aika a kainikatonga, “Ko kewe! E bon aki tuangko te UEA b'a ti na aki nako Aikubita.

³E na bae n tia n tuangko B'aruka are natin Nearia te mm'aane b'a ko na taekina anne. E tangiria kaain B'aburon b'a a na tauira, b'a a aonga ni uotiira nako B'aburon ke n tiringiira.”

⁴Ao a bane n rawa n tiku i Iuta Ioanan, aobitia n taanga ni buaka ake tabeman, ao aomata ni kabane n aron ana mwioko te UEA.

⁵B'aruka ma Ngai ao tabeman man te koraki ake a tiku ngkoa ma Ketaria, i bukina ngke e tuangiia aobitian B'aburon are te tia tararuaia taan tei are Nebutaratan b'a a na kakaawakina te natinuea te aine ma tabeman mm'aane, aine, ao ataei.

⁶Ma ngaia are, ti a kairaki nako irouia Ioanan ma aobitia ni kaineta Aikubita. Ao a kiitana Iuta te koraki n reitaki ma koraki ake a maaenako ngkoa nakon aba tabeua ao koraki naba ake a tib'a oki ni maeka i Iuta.

⁷A aki ongotaeka nakon te UEA ao a m'ananga nako Aikubita. A a tia n tekateka te koraki arei i Tabaneti

⁸ngke E taetae te UEA nako iu ni kaangai

⁹Ieremia, ko na uoti tabeua atiibu aika a buubura nakon mataroan autin te tautaeka i Tabaneti. Ko na taun taian atiibu i aan burikin te kawai n rin, ao ko na kakoaua b'a a matakuakiniko taian Iutaia ngke ko karaoa anne.

¹⁰Ao i mwiina, ko na tuangiia b'a bon Ngai ae te UEA ae Moan te M'aaka ae Atuaia Iteraera, ae I kanakoa Au tia m'akuri, ae Nebukaneta [145] ae kaain B'aburon. N na karokoa ikai mani karaoia b'a e na katea ana kaintokanuea ma ana autinrianna n uea i aon atiibu aikai, aika I a tia n tuangko b'a ko na tauni.

¹¹E na tiringiia aomatan Aikubita aika a m'aiti; ao tabeman a na mate n te aoraki ke a na uotaki nako b'a taenikai.

¹²N na kaurarakea temboran antiia kaain Aikubita, ao uean B'aburon e na kaurarakea antiia ke na uoti nako. Kaanga aroia taani kaawakin tiibu ngkana a taetaea kunnikaia ni kaitiakia ngkana a anaia, ao aron naba uean B'aburon ngkana e anaa te aba are Aikubita ni kaitiakia ao i mwiina e nako ma te tokanikai.

¹³Ane e na urua te atiibu ae e tabu are i Erioboriti i Aikubita ao e na kabuoka temboran antin Aikubita ni kab'akai.”