Read Te B'aib'ara Ieremia 44 Bible Online

Ieremia 44 - Te B'aib'ara bible

Ieremia 44

¹Ao E tuangai te UEA b'a N na taetae nako ia taian Iutaia ake a maeka ni kaawan nako Miketora, Tabaneti, ao Membiti (Nobi) i Aikubita meang, ao ake a maeka naba i Aikubita maiaki. E tuangai b'a N na kaangai nako ia:

²Bon te UEA Ngai ae Moan te M'aaka, ae Atuaia Iteraera. Kam noora arou ngke I kamaunaa Ierutarem ao kaawan nako Iuta. A wene n akea kanoaia ao n uruaki n te bong aei,

³i bukina ngke a kaunai kaain Iuta ngke a manga taromaurii anti aika a bon tuai man buokiia ma aia bakatibu.

⁴I aki toki ni kakanakoa Au burabeti ae Au tia m'akuri b'a e na taetae nako ia kaain Iuta ni kaota ribaakin aia bure aika a buakaka. A kauringaki irouia burabeti b'a a na katoka karaoan te bure,

⁵ma a rawa n ongo ao a aki kan toki n taromauriia anti tabem'aang.

⁶Ao n tokina, e a oro uniu kaanga te ieka ae e korakora, ao n te bong aei e a wene Ierutarem ao kaawan nako Iuta n akea kanoana ma n uruaki.

⁷Ao e aera ngkai kam kamatoa naba ni manga uaa koron te kaanganga riki teuana? Te kabuanib'ai are e na aki ti uruaningkami, ma e na uruani naba natimi ao ami ataei aika a uarereke.

⁸Kam a tia ni kaunai ngke kam a manga taromauriia te bouananti ao kam kabuoka te b'ai ni kaboiarara nako ia anti ngke kam roko ikai mai Aikubita. Kam na mate n te mate ae e ribaaki, n te aro are a na kamanenaa aran Iuta b'a te taeka ni karereanti.

⁹Ngke kam maeka ngkoa i Ierutarem ma Iuta, kam katotongia ami bakatibu ni karaoi m'akuri aika a buakaka, kaanga ami uea ma ami ueanaine nako.

¹⁰Ni karokoa naba te bong aei, kam teimatoa n ami kainikatonga n tauingkami b'a kam na aki ongo taeka nakon Au tua ma Au reirei nako ake I anganiia ami bakatibu.

¹¹Bon te UEA Ngai ae Moan te M'aaka, ae I baaireia b'a N na kamaunaingkami n taiani kabuanib'ai.

¹²Bon ti tabeman ake a tangiria n tiku i Iuta, ao ngkami kam tangiria n nako Aikubita. Ma ane kam na mate n te mate ae e kakamaaku n te buaka ke te baki, n te aro are a na kamanenaa aran Iuta aomata tabem'aang b'a te taeka ni karereanti.

¹³I katuaaea Ierutarem n te buaka, te baki, ao te aoraki, ao anne naba aron ae N na katuaaingkami iai.

¹⁴Bon akea iroumi ae e na reke maiuna. Ane kam na iaiangoa okiran Iuta n te bong teuana, ma bon ti tabeman maibuakomi aika a na reke birinako ia man te mate ma n reke okiia.

¹⁵E bon rangi ni korakora m'aitiia taian Iutaia mai meang ao Aikubita maiaki aika a ongora irou ngke I tuangiia te b'ai are e taekinna te UEA. Angiia mai buakoia te koraki akekei boni mm'aane aika a bon atai buia b'a a aki toki ni kakabuoka te b'ai ni kaboiarara nako ia antiia. Ma ngaia are, a kaai n takaarua ni kaangai:

¹⁶Ieremia ti bon aki tabe ngkana ko taetae n aran te UEA. Ti na bon aki kan ongo!

¹⁷Ti a tia n berita b'a ti na taromauria te anti are Nei Atiterota, are te Ueanaine i Karawa, ao bon anne raoi te b'ai ae ti na karaoia. Ti na kabuoka te b'ai ni kaboiarara nakoina ao n anga te karea are te wain nakoina, n arora, ma ara bakatibu, ao ara taani kairiiri ngke ti maeka ngkoa i Ierutarem ao kaawan Iuta nako. A a bon rangi ni m'aiti karara. Ti a maiu ni kaub'ai, ao bon akea te b'ai teuana ae e buakaka ae a tia n riki nakoira.

¹⁸Ma man te tai are ti katoka iai kabuokakin te b'ainikaboiarara ma te anga te karea are te wain nakon Nei Atiterota, ao ti a bon mate naba n te buaka ma te baki.

¹⁹Ao a manga taku aine, “Ngke ti maeka ngkoa i Iuta, ti taromauria Ueanainen Karawa ao ti anga te Karea are te Wain ao te kariki ae e kaokoroaki ae kaanga bannan te aine arei. A bon atai baika ti karaoi buura, ao a bon kariaia.”

²⁰Ao I taetae nakon te koraki ni kaangai:

²¹Kam bon aki ataia b'a te UEA E ataa te b'ai are kam karaoia ma ami bakatibu, ma ami taani kairiiri ao ami uea, ao aomata ni kabane; are kam kabuoka te b'ai ni kaboiarara nako ia anti tabem'aang i Ierutarem ao n taabo nako i Iuta?

²²Ao ngkana E aki konai moan ami bure te UEA aika a ribaaki, ao E kamaraiaa te aba ao E onikia nakon te rereua, n aron ae e riki n te bong aei.

²³E riki te kabuanib'ai aei i bukina ngke kam taromauri anti tabem'aang ao kam kakaitaraa te UEA ma n rawa n ongo i Rouna ke n iri Ana tua ma Ana reirei nako.

²⁴Ao i mwiina, I tuangiia mm'aane ao buia, te b'ai are E taekinna te UEA ae Moan te M'aaka, ae Atuaia Iteraera ae e kaangai:

²⁵Kam bon teimatoa ni karaoa ami berita ikai i Aikubita are kabuokakin te b'ai ni kaboiarara ao te anga Karea te Wain nakon Ueanainen Karawa.

²⁶Kaawakin taiani berita aikai! Ma N na ti tuangkami te b'ai ae e na riki. Ngkai bon te UEA Ngai ae te Atua, I tuea b'a N na aki manga butim'aai ami berita ake kam karaoi n arau.

²⁷N onea mwiin arou ngkoa are te tararuaingkami nakon tarataraan te tai are N na karaoa iai te kamaraki nako imi. Iai i buakomi aika a na mate n te buaka, ao tabem'aang a na mate ni baki.

²⁸Bon ti tabeman aika a na reke birinako ia n okira Iuta. Ao i mwiina, ane a na ataia ni kabane ake a nako ni maeka i Aikubita b'a ngkana I taekinna b'a iai te b'ai ae e na riki, ao e na bon riki-I aki tabe ma te b'ai ae kam taekinna.

²⁹Aei aron are kam na ataa iai arou ni kakoroa bukin Au taeka are N na katuaaiangkami i Aikubita.

³⁰N na anga Uean Aikubita are Obera nako ia akana a tangiria n tiringnga, [146] n arou ngke I anga Tetekia[147] nakon Nebukaneta, [148] are e tangiria naba n tiringnga.