Read Te B'aib'ara Ieremia 48 Bible Online

Ieremia 48 - Te B'aib'ara bible

Ieremia 48

¹E tuangai te UEA ae Moan te M'aaka ae Atuaia Iteraera, b'a N na kaangai nako ia kaain Moaba: Ko a reke n te kangaanga te kaawa ae Nebo; E na tauaki Kiriataim ao e na kab'ainrangaki, ao a na bon uruakaki nonona ao e na tiku n uruaki.

²Akea ae e na karineko, Moaba. Ana iangoa aron tiringakim kairiribai i Etibon. E na ti katuka te aki kakarongoa Au kabaang n oin ami kaawa are e aranaki b'a “Aki Karongoaa.”[160]

³Ane a na tangira buokaia kaain Oronaim, ngkana e a buakanaki aia kaawa ma n uruanaki.

⁴Ane e na maaenako Moaba! A na maikeike ami ataei

⁵ao a na tang i aoni kawaia ni waerake nakon te kaawa are Ruita; A na tuangaki taekan taiani kabuanib'ai i aon te kawai nako Oronaim.

⁶Biiri n rawei maiumi! Kaineta te rereua kaanga te aati ae e aki manana.

⁷Tao kam taku b'a kam konaa ni mano ni m'aakami ao kaub'aimi, ma ane kam na tauaki n reitaki ma antimi are Kemoti, ma ana ibonga, ao ana mataniwi nako.

⁸Bon akea mai buakon ami kaawa aika a na konaa ni biri nako man te urub'ai. I a tia n tuangiia ami kairiribai ni kaangai, “Kamaunai taiani m'arua ao aaba aika a aoraoi i Moaba.

⁹Kab'akai taian taoro i aon te tano n tiringi arokan te tawaana. Katikui kaawana b'a a na tiku n uruaki, ao akea ae e na maeka ikekei.

¹⁰I tangiria n tiringiia kaain Moaba, ao ngkana kam kabiri nako ia, N na bon kamaraiaingkami.”

¹¹Moaba, ti te bo ngkoe ma te wain ae e tiku n arona n aki kumekumeaki, n aki kaakab'aroaki man te tiaeki teuana nakon te tiaeki teuana.

¹²Ma ngkai, N na kanako ia kairiribai b'a a na kab'aroa te wain ma n urui taian tiaeki!

¹³Ao i mwiina, kam na mamaa i bukina ngke e aki konaa ni kamaiungkami antimi are Kemoti, n aron Betaera ae e aki konaa ni buokiia Iteraera. [161]

¹⁴Ko taekinna b'a a korakora ma n ninikoria am tautia.

¹⁵Ma bon te UEA Ngai, ae Moan te M'aaka, ao I berita b'a a na karanganakoi ami kaawa nako kairiribai. Ao a na bon mate naba ami taani buaka aika a bane aroia n te buaka.

¹⁶N na bon aki baenikai ngkai e na orea Moaba te kabuanib'ai!

¹⁷N na tuangiia botannaomata aika a kaan b'a a na tanginiwenei i bukimi ao a na kaangai, E koaua b'a e bon aki kananokawaki? E tautaekaniia tabem'aang ngkoa Moaba, ma ngkai e a tia ni maaenako m'aakana are e mimitong.”

¹⁸Kaain te kaawa ae Ribon, kam na aki manga oki ni karineaki, ma ngaia ae, kam na tekateka i buakon te baareka. Ane a na raeuaakaki oon ami kaawa ngkana a roko ami kairiribai ni buakaningkami. [162]

¹⁹Ngkami aika kaain Aroera, [163] tataninga i rarikin te kawai, ao ngkana a biri i rarikimi taan rawei maiuia, ao kam na titirakiniia ni kaangai, “Tera ae e riki?”

²⁰Ane a na kaeka ni kaangai, “E a tia Moaba n taenikai! Kam na kaai n tang ma ngaira ma te mamaa. Tuangiia aomata ni kabane n te Karaanga are Arenon b'a e a uruaki Moaba.”

²¹N na katuaai ni kabane kaawan Moaba: ai moara ra riki Oron, Iata, Meb'ata,

²²Ribon, Nebo, Beta Riberataim,

²³Kiriataim, Beta Kamura, Beta Meon,

²⁴Keriota, Botira, ao kaawan te aba are Moaba ni kabane.

²⁵E a moti Au babaaire a na kamanatuaaki ami taanga ni buaka, ao e na uruaki m'aakam.

²⁶Kaain Moaba, kam taku b'a kam korakora riki nako iu. Ma N na tuangiia botannaomata tabeua b'a a na kamangingkami ao a na ngareakiningkami ngkana kam b'aka n rukurukumaki i nanon mumutami.

²⁷Kam b'ainingareia Au aomata ao kam karaoia b'a kaanga buure aika a reke ni karaoa te m'akuri.

²⁸Ao n te tai aei kam na kiitana ami kaawa ao kam na maeka kaanga te taobe ae e kamanoa n te aba ae e katati ke tabwenani b'aa aika a rietaata.

²⁹I ataa ami kamoamoa, ma aromi ao tikatikami n nakonako ma ni kainikatonga.

³⁰Ma I bon ataia naba ae e aki konaa ni kamaiungkami te kainikatonga.

³¹Ma ngaia are, N na tang ma n tanginiwenei i bukin Moaba ao kaawana are Kira Ereti.

³²Kaain Tibema, ti te bo ngkami ma te nne n aroka ni kureebe ae e tine amwiin uaan te kureebe, ma m'aanga aika a roota meaang nakon te kaawa are Iatera ao ni wairio nakon Taari are Mate. Ma kam a tia n uruakaki, ma ngaia are, N na tang i bukim, n ai aroia kaain Iatera ngkai a tang i bukin aia nne n aroka ni kureebe.

³³A a nako boong ni bukamaru i bukin taian nne n aroka ma taabo n ununiki i Moaba. Bon akea riki manga te takaarua ni kukurei mairouia aomata aika taan karaoa te wain.

³⁴E na ongo te aba te tang mai Etibon ae e roota Ereare ao Iaati; e na ongo te aba te tang mai Toa i Oronaim ao Ekera Teritiia. Ao e na m'auteretere Karaangan Nimrim ae e uarereke.

³⁵N na karaoi taekaia aomata ni kabane ake a kaakabuoka te b'ai ni kaboiarara nakon antiia kaain Moaba ke n anga taiani karea i aon aia baangota nako. Bon aei Au taeka Ngai ae te UEA.

³⁶I tang inanou i bukin Moaba kaanga ai aron te tanginimate ae e aneneaki n te kaib'ab'aa. I tang i bukiia kaain te kaawa are Kira Ereti, i bukina b'a a nako kaub'aia.

³⁷A bane n tia ni koromaraia ma ni korobuai. A a bane n tia ni korokoroi aon baiia, ao a bane ni kunnikaiia ni kunnikai n aki akaaka.

³⁸Akea te b'ai ae e karaoaki i aon taubukin autin Moaba ni kabane ao ni katawanangin nuukan te kaawa b'a ti te tang, i bukina ngke I a tia n urua Moaba kaanga te tiaeki are akea ae e tangiria.

³⁹E a wene n uruaki Moaba! Kakauongo nakon kaaina aika a tang ngkai a rairaki nako ma te mamaa. A a maaku botannaomata aika tabeua n te b'ai are e riki, ma a bon ngare naba.

⁴⁰Moaba, e kiba rikaaki te kairiribai kaanga te ikare ae e taakin baina i aon abami.

⁴¹A na tauaki ami kaawa aika a buubura ma ami nono, ao a na tauaki ni korakoran te maaku ami taan buaka.

⁴²E a roko n tokina am botannaomata, i bukina ngke ko a tia ni kataia ni kaaitaraai, Ngai ae te UEA.

⁴³A tataningaiko te maaku, taiani m'aruarua, ao taiani b'ainikam'ane.

⁴⁴Ngkana kam maaku ma ni biri, ao kam na b'aka i nanon te m'aruarua; ngkana kam kawakawa n otinako man te m'aruarua, kam na manga reke n te b'ainikam'ane. E a roko te tai are kam nang katuaaeaki iai.

⁴⁵A na tei i rarikin te kaawa are Etibon are e tautaeka iai ngkoa Taion, taan rawei maiuia i aan nuun te urarake man aia kaawa ae e buubura are e urarake. N te tai ae e aki maan, a na manga buburake taiani kaawa ake i aon tabuki ake tabeua, ike a maeka iai aomata aika a kakani buaka aikai.

⁴⁶Kaain Moaba, kam taromauria ngkoa Kemoti, are antimi, ma ngkai kam a reke n te kaangaanga, ao a na riki natimi b'a taenikai i abaia ianena.

⁴⁷Ma n te bong teuana, N na kairiia ami aomata n okirii mwengaia. Bon aei Au taeka Ngai ae te UEA.