Read Te B'aib'ara Ieremia 7 Bible Online

Ieremia 7 - Te B'aib'ara bible

Ieremia 7

¹E tuangai te UEA b'a N na tei i rarikin mataroan te Tembora

²ao n tuangiia aomata ake a na nako n rin te b'ai are E taekinna te UEA

³are Moan te M'aaka, ae Atuaia Iteraera: Kakauongo raoi, ngkami aika kaain Iuta! Bita maiumi ao maiuakina te raoiroi, ao i mwiina, N na kariaingkami b'a kam na maeka n oin abami.

⁴Kam na aki kaburababaingkami i bon i roumi! E mena au Tembora ikai i Ierutarem, ma tiaki nanona b'a N nang kamanoingkami.

⁵N na kaawakiningkami ti ngkana kam bita maiumi. Kam na aki aonikaiia raomi nako.

⁶Katoka karawaawataia iruwa, ma ataei aika a akea aia karo, ao aine aika akea buuia. Kam na aki tiringiia aika akea aia bure. Ao katoka taromauriaia anti tabem'aang.

⁷Ao i mwiina, N na kakukureingkami ni maiu n te aba aei ae I anganiia ami bakatibu.

⁸Ma kam na ti taraa te b'ai ae e riki! Kam onimakin taiani kewe aika akea manenaia.

⁹Kam iraa ao kam tiriaomata, kam kewe n te kabowi ao kam aki kakaonimaki nakon ami berita ni mare. Kam taromauri bouannanti, ao kam anga te b'ai ni kaboiarara nakon B'aara, e ngae ngkana akea te b'ai teuana ae a konaa ni karaoia anti aikai nako imi.

¹⁰Ao i mwiina, kam rin i nanon au Tembora ao kam taromauriai! Tao kam taku b'a N na kawakiningkami n te aro b'a kam na teimatoa ni kaakaraoa te bure?

¹¹Bon taan iraa ngkami, ao kam karika au Tembora b'a te tabo ni karaba. Ma I a tia n noori b'aai ni kabane aika kam a tia ni karaoi.

¹²Naako nako Tiro, ike e tei iai ngkoa iai au autinrianna ae e tabu. Kam na tarataraa te b'ai are I karaoia ngkoa ikekei. A tia ni bure au aomata aika Iteraera, ngaia are I kamaunaa iai Tiro!

¹³I kataia n taetae nako imi ngke kam tabe ni karaoa te bure, ma kam aki kan ongo.

¹⁴Kam na tai taku b'a e na kaawakiningkami te Tembora aei. I tuangiia ami bakatibu n taai aika a b'aka nako b'a a na kateia ma n taromauriai ikai, ma ngkai I a tia ni baaireia b'a N na kamaenikunna ni kab'aka, n aron are I karaoia nakon Tiro.

¹⁵Ao i bukimi ngkami aika kaain Iuta, N nang kanakoingkami man abau, N aron kanakoaia kaain Eberaim ao kaain baronga ake i meaang.

¹⁶Ieremia, ko na aki tataro i bukiia aomata aikai! N na aki kan ongo Ngai ae te UEA.

¹⁷Kam noora te b'ai ae a karaoia kaain Iuta i nanon aia kaawa ao i nanon kawain nako Ierutarem?

¹⁸A rikoi aia ataei, ao a kauraa te ai tamaia, ao tinaia a kabooboa te buraawa b'a a na kariki i bukin antiia te aine are a aranna b'a ueanainen Karawa. [26] A bon anga naba te wain nako ia anti tabem'aang, b'a I aonga ni matauninga.

¹⁹Ma a bon aki ti kamatauningaai, ma a bon kamatauningaia naba ni karaoi baika a na kamamaaeaki iai.

²⁰Ao ngkai N nang kaiekaa Iuta Ngai ae te UEA ae Moan te M'aaka n uran uniu ni karokoa akea nikiran b'aai nako—ana akea aomata ke maan, ke taiani kainam'arake ke taian uita.

²¹E taku te UEA nako ia kaain Iuta: Bon te UEA Ngai ae Moan te M'aaka, ae Atuan Iteraera, N na bon aki butim'aai taiani karea mairoumi. Ma ngaia are, kam na aki tabe naba ma uotakiia nako iu. Kam na bon kuukan b'a kanami.

²²I aki tuangiia ami bakatibu b'a a na anga karea nako iu, ngke I kaotinako ia mai Aikubita.

²³Ma I ti kaangai nako ia, “Ngkana kam ongo i Rou ma ni karaoi b'aai aika I tuangngkami, ao N na riki b'a Atuami, ao ngkami kam na riki b'a Au aomata, ao a na akea ami kangaanga.”

²⁴Ma a aki kan ongo ami bakatibu. A bonotaninga, ao ngkana I tangiria b'a a na nakon te kawai teuana, ao ngaiia a aki toki n nakon te kawai teaina.

²⁵Man te tai are a kiitana iai Aikubita ami bakatibu, I kanako ia au taani m'akuri aika burabeti b'a a na taetae i buku.

²⁶Ma kam aki kubarai ao kam karikirakea riki taningabonomi ao karaoan te bure nakon are a karaoia ami bakatibu!

²⁷Ieremia, e ngae ngkana tao tera ae ko karaoia, ma a na bon aki ongo naba aomata.

²⁸Ma ngaia ae ko na kaangai nako ia: Kaain Iuta, bon te UEA Ngai ae Atuami, ma kam rawa n ongo taeka i Rou, ma kam aki bitaki ngke I katuaaingkami. Ao ngkai, kam bon aki kani kaota naba te aro ni kakaonimaki nako iu.

²⁹Kam na kamaraa atuumi ao tewenakoi irami. Kam na anenea te anene ni mate i aon te tabuki ae akea kain aona. Kam a tia ni kaunai ngkami aika aomata, ao kam a tia ni kiitanai.

³⁰Kam a tia n aki ongotaeka i Rou ngke kam karin taiani bouannanti aika a rangi n ribaaki i nanon au Tembora, ao ngkai e a rangi n ribaaki te Tembora i Rou.

³¹Kam a tia ni katea te baonikarea i Tobeta n te M'arua are Innom ike kam tiringiia ami ataei iai ma ni kabuokiia b'a taiani karea nako ia anti tabem'aang. I bon tuai man tuangkami b'a kam na karaoa te aekaki aei.

³²Ma ngaia are, kam na tarataraa raoi! Ane e na aki atongaki te tabo anne b'a Tobeta ke te M'arua are Innom n te tai teuana. E na aranaki b'a te M'arua n Tiritiri, i bukina b'a ane kam na taun ami mate ikekei ni karokoa e a aki reke nen moana,

³³ao ane a na raea rab'ataia aomata i aon te tano. Ane a na roko mannikiba ma maan ni kang rab'ataia, ao akea temanna ae e na konaa ni kakamaakuia ni kanako ia.

³⁴Ngkana e a bane te b'ai are N na karaoia nakon abami, ao ane e na akea te b'anaa ae e konaa n ongo te aba ni b'ain nako Ierutarem ake a uruaki ma kaawan Iuta, akea te b'anaa ni kukurei, akea b'anaan te bootaki ni kukurei ke karongoaan te bootaki ni mare.