Read Te B'aib'ara Ieremia 8 Bible Online

Ieremia 8 - Te B'aib'ara bible

Ieremia 8

¹Ao i mwiina, ane a na kenaki riia uean Iuta ao aia mataniwi, n ikotaki ma riia ibonga, burabeti, ao aomata ni kabane ake i Ierutarem

²ake a tangiria n taromauria taai, nam'akaina, ao taian itoi. Ane a na maenako taian rii aikai ao a na tiku n raea i aontano kaanga te mwi, ike e konaa n oota taai ma nam'akaina ao taian itoi i aoia.

³Iai i buakomi kaain Iuta aika a na tiku ni maiu, ma N na kairoroingkami b'a kam na nako abaia ianena, ao ane kam na tangiria riki ni mate. Bon aei au taeka Ngai ae te UEA.

⁴E taku te UEA: Kaain Ierutarem, kam na manga teirake ngkana kam tatanako ma ni b'aka, ao ngkana e bure kawaimi, kam na manga rairaki n oki. [27]

⁵Ma ngaia are, e aera ngkai kam rawa n oki nako iu? E aera ngkai kam baimatoai antimi ni kewe?

⁶I rangi ni kakauongo raoi, ma bon akea temanna ae e roko n te namakinna b'a e a tia ni karaoa ae e bure. Ao kam ira nako te kawai ae e kaairua n aki karaua n iangoia raoi [28] kaanga taanga ni buaka ake a toka i aoia aoti aika a biri nakon te buaka.

⁷A ataa te tai ni kiba nako i bukin te tai ni kam'aitoro maan aika taian taoki, taian taobe, taian tuwaaro, ao taian kureen ao ni manga kiba n oki. Ma kam aki ataa te b'ai ae I tangiria ngkami aika Au aomata.

⁸Kam taku, “Ti bon wanawana b'a iai taeka n reirei ao ana tua te UEA.” Ma I taku b'a a tia n rairi Au taeka ami tia reirei nakon taiani kewe!

⁹A a tia ni katinanikui baika I taekin ami taani wanawana, ai ngaia are, akea wanawanaia. A riai ni kam'aneaki ngkai ma ni kamaamaaeaki; a aki ataa te b'ai ae a riai ni karaoia.

¹⁰N na anga buuia ma aia tawaana nako ia ianena. A a bane n nanonrang ao n aki raoiroi aomata nako, te kainano ke te kaub'ai. Bon akea naba onimakinaia burabeti ma ibonga.

¹¹Ti te b'ai ae a anga nako ia Au aomata aika ikoaki kaakaiaki bon kantaningaan te raoi ae akea nanona.

¹²A na riai ni kamaamaaeaki i bukin aia bure aika a rangi n ribaaki, ma a bon aki roko n te bwerengaki. Ai ngaia are ngke I katuaaea Iuta, a na bane ni b'aka i aon te tano, ni mate kaanga aroia aomata ni kabane.

¹³N na kamaunaia, [29] Bon taiani kureebe ngaia aika akea uaaia; taiani biiku aika akea uaaia ke baaia. Bon akea te b'ai teuana ae a tia ni karaoia ni b'aai ake I tuangiia! [30] Bon aio au taeka Ngai ae te UEA.

¹⁴A taku i bon irouia kaain Iuta, “Ao tera ae ti a tataningaia? Ti riai ni biri rikaaki nakon kaawa ake iai ooia ma ni mate ikekei. Ti a tia ni kakaitaraa te UEA, ao motikan taekara bon te tiringaki ni kamooaki n te boitin.

¹⁵Ti a tia ni kantaninga te rau ma te tai ni kamaiu, ma bon akea te b'ai ae ti karekea b'a ti b'aai aika a kakamaaku.

¹⁶A a tia ni roko ara kairiribai ni kaawan Taan ake i meang, ao ti a maaku n tangitangin ikeiken aia aoti. A na kamaunaa Ierutarem ma ara botannaomata ni kabane ara kairiribai. Bon akea temanna ae e na reke maiuna.”

¹⁷E taku te UEA, “Taratara nako! I kanako ia naeta aika a kamamate b'a a na buakaningkami, Bon akea temanna ae e konaa ni katokia.”

¹⁸I taonaki n te rawaawata kaanga e a b'ara nanou.

¹⁹A tang au aomata i abaia ianena. Kakauongo! Ane ko na ongo aia taeka ae e kaangai, “E a tia te UEA ni kiitana Tion? E a aki Uea iai?” Ao I ongo ana kaeka te UEA ae e kaangai, “E aera ngkai kam kaunai n taromauriia bouannanti aika akea manenaia?”

²⁰A ngurengure aomata ni kaangai, A tia n roko bongin te kam'aitoro ma te kabuebue, ma e tuai mani kamaiura te UEA.”

²¹E rawawata nanou b'a a kamanatuaaki au aomata. Ao I maaku ao I tang.

²²E aera ngkai a tuai man kamaiuaki au aomata ngkana iai taiani b'ainaoraki ma taokita i Kireata?