Read Te B'aib'ara Ieremia 9 Bible Online

Ieremia 9 - Te B'aib'ara bible

Ieremia 9

¹Tera ngke a riki matau b'a koburake n ran ni mata, n te aro are I konaa n tang iai ni bong ao ni ngaina i bukiia Au aomata ake a tia n tiringaki.

²Tera ngke I konaa n nakon te rereua ni kakaaea te tabo ni karabaraba mairouia aomata ni kabane aika a b'anganikewe ao aika a aki kakaonimaki nakon te Atua.

³Ao E kaeka te UEA: Taeka ni kewe mai nanon wiia au aomata ti te bo ma taian kanoanikatebe ma te kainikatebe. Are a rikirake maiai aia m'akuri n aonikai ngaiia n tatabemaniia nako, n te aro are bon akea temanna mai buakoia e kakoaua ae te Atua Ngai.

⁴Ieremia, a bane raraom ma am koraki n taekina te kewe i bukim, ma ngaia ae ko na aki onimakiniia.

⁵A kakuaia i bon irouia, ni kakaea te anga teuana ae e boou ni keweia raoraoia.

⁶A bane aomata n aonikaiia raoia nako ao bon akea temanna i buakoia ae kakoauaai b'a te Atua Ngai.

⁷Ma ngaia are, I kabooua nanoia Au aomata kaanga te koora ae e kabouaki n te ai ae e uram'aaka. Bon akea te anga riki teuana ae N na karaoia.

⁸A taku b'a a tangira te rau, ma bon te kewe ae e kamaamate aei, ti te bo ma te kanoanikatebe ae ko teke iai ae ko aki kaantaningaia.

⁹Ko na anganai bukina teuana, b'a e aera ngkai a na aki katuaaeaki. Bon aei au taeka Ngai ae te UEA ae Moan te M'aaka.

¹⁰I tang i bukin te tabo n uteute are i aon te aba ae e tabukibuki. Ai bon akea kain aona, ao e mate tanona n te kabuebue n te aro are bon akea te tia m'ananga ae e kan rikekei. Bon akea te kao ae e konaa ni kuneaki ikekei, ao a bane n tia mannikiba ma maan aika a aki manana ni mauna nako.

¹¹Ao I ongo ana kaeka te UEA, “Ngkana e tia Au m'akuri, ao e na riki Ierutarem ao kaawan nako Iuta b'a b'ariko ni b'ai aika a uruaki ike ti taian tiakaore [31] aika a maeka iai.”

¹²I taku nakon te UEA, “Bon akea mairoura ae e ataia b'a e aera ngkai e a riki te aba b'a te rereua ae e aki totouaki. Ko aki kab'arab'ara b'a tera bukina?”

¹³E taku te UEA: I kamaunaa te aba i bukina b'a a aki ongotaeka aomata i Rou ao a katinanikui au Tua nako ma au Taeka n reirei nako.

¹⁴A taningabono ao a taromauria B'aara, [32] n ai aron are a karaoia ngkoa aia bakatibu.

¹⁵Ma ngaia are, I berita Ngai ae te UEA ae Moan te M'aaka, ae Atuaia Iteraera, b'a N na kaboitiniia ni kaam'arakeia ma ni kamooia. [33]

¹⁶N na kamaenako ia i abaia ianena ae a tuai man ongongo taekana ma aia bakatibu. Ao n tokina, N na kanako ia kairiribai b'a a na tiringaia nikiraia.

¹⁷E taku te UEA ae Moan te M'aaka, “Kanako ia aine aika a kaboaki b'a a na tanginiwenei n tain te bootaki n taunimate, [34] ai moara ra riki aine ake a konaa n tang n takaarua.”

¹⁸Ao a taku aomata, “Kawaekoaia n nakomai b'a a na tang i bukira, ni karokoa a taonako matara n taian rannimata.

¹⁹Ao ngkai ngaira aika ti tang i Tion, ‘Ti a urubekebeke! Ti aki konaa n taona mamaara. A a tia n uruaki ara auti, ao ti a riai ni kiitana abara.’

²⁰“Ti butingkami aine b'a kam na kakauongo raoi nakon te b'ai ae E taekinna te UEA. Ti na reireiningkami te anene ni mate are kam konaa ni manga reireiniia natimi aine ma raoraomi:

²¹Ti mena i nanon ara nono, ma e karaba n roko te mate ri nanon ara winto nako. E bon oroia naba ara ataei ni kab'akaia ngke a takaakaro ao ara rorobuaka n ataei aika a rangi ni korakora naba.”

²²“E a tia n tuangiira te UEA b'a e na onrake te tano n rab'ataia aomata aika a mate, kaanga oin taian uita aika a tuai ni bootaki ke kaanga nakotariia maan.”

²³E taku te UEA: Kam na aki kamoamoa i bukin wanawanami ke korakorami ke kaub'aimi.

²⁴Ngkana kam tangiria ni kamoamoaingkami, ao kam iango raoi riki ngkana kam kamoamoaa taromauriakiu, Ngai ae te UEA. Te b'ai ae I tangiria riki bon kaotan te akoi te motikitaeka ae eti, ao te nanoanga nako ia aomata ni kabane n te aonnaba.

²⁵A na roko boong are N na katuaaia iai bootanaomatan Aikubita,

²⁶Etom, Ammon, ao Moaba, ao barongan te rereua. [35] A a tia ni korotabonim'aneaki mm'aane ni botannaomata aikai, ma a aki taromauriai. Ao bon ti te bo naba ma ngkami kaain Iuta. A a tia ni kaitiakaki rab'atami, ma a tuai man bitaki nanomi.