Read Te B'aib'ara B'aeb'aeti 4 Bible Online

B'aeb'aeti 4 - Te B'aib'ara bible

B'aeb'aeti 4

¹E a bua raneanean ara koora ao e a mangaingai; A wene n raea atiibun te Tembora i nanon te kaawa.

²A riki b'a kaanga boora aika atiibu, m'anen Tion aika rorobuaka n ataei, ake kaanga aron tamaroan koora ngkoa nakoira.

³E natinati te kameaanti aine, ma titebo au aomata ma taian tiakaore [2] ake a kikitaniia buniia.

⁴A mate ni baki ao n taka natiia b'a aki tabeakiniia; a bubuti natiia kanaia nakoia aomata ma akea temanna ae e anganiia kanaia.

⁵A mate i nuukan te kaawa aomata ngkoa ake a am'am'arake raraoi. A kakae kanaia i nanon turam aomata ngkoa ake a maiu ni kaub'ai.

⁶E rawaawata riki oreaia au aomata nakoia aomatan Etom, ake a oreaki iroun te Atua n te aro a e karina.

⁷A itiaki riki ara uea n aine nakon te tinoo. A ura ribaia n ai aron te ane, ao a takiakia ni maiureirei n ai aron te tabeiro.

⁸Ma ngkai a wene n aki kinaaki i nukan te kaawa, b'a a b'ata moaia b'a a mate; ai ti te kun i aon te rii, n ai aron te kai ae m'auteretere.

⁹E raoiroi riki mateia ake a mate n te buaka nakon mateia ake a mate n te baki, b'a akea kanaia are a na maiu iai.

¹⁰E uota te b'ai ae moan te kakamaaku te kaangaanga are e riki; b'a a kaburoi oin natiia tiina b'a kanaia.

¹¹E a bon koro unin te UEA; n te aro are E a bon kabueka Tion n akea nikirana.

¹²Bon akea temanna ae kakoaua b'a e kona n niniaki Ierutarem, ni moa mai roun te aomata n aki akaaka ni karokoa te uea.

¹³Ma e bon riki anne i bukina ngkai a bure burabeti ma ibonga, a tiringiia aomata aika a raoiroi.

¹⁴A titibaua aia taan kairiiri i nukan te kaawa n ai aroia matakii, ao a makunakuna n te raraa n te aro are bon akea ae kan tangiriia.

¹⁵A takaarua aomata ni kaangai, “Baane naako, b'a kam kam'araa, tai riingiira!” ma ngaia are a rere man te botannaomata teuana nakon teuana ma akea ae butim'aia.

¹⁶Akea riki manga taben nanon te UEA irouia; E a bon kamaenakoia. E a aki kubariia ara ibonga ma ara taan kairiiri.

¹⁷Bon akea te buoka ae roko, ti taratara ni karokoa bon akea ae ti a manga noria. Ti tataninga i bukin te i buobuoki man te botannaomata [3] ma bon akea ae i buobuoki.

¹⁸A toro karaniira ara kairiribai; e aki kona n reke naba nakonakora i nukan te kaawa. E a bon roko ara bong; e a roko te toki.

¹⁹A birim'aaka riki ngkana a raweira nakon te ikare ngkana e b'akara kanana mai karawa n raweia. A kakioira rikaaki i aon tabuki; a raweira i nanon te rereua.

²⁰A uotaanako buroora are mwiokon maiura, are E a tia n rineia te UEA,[4] are teuare ti onimakinna b'a te tia kawakiniira mai irouia ara kairiribai.

²¹Kam na ngarengare aika aomatan Etom ma Uti; Kakatonga n aron ae kam kona. B'a ae nang roko naba te kangaanga i aom; ko na kanakonakoaki naba ni bebeekan.

²²E a tia ni b'ara ana bure Tion; E nang kab'araira te UEA man te kataenikaiaki. Ma e na bon katuaeko te UEA ngkoe ae Etom, E na katereterei am m'akuri aika a kaairua.