Read Te B'aib'ara Etekiera 1 Bible Online

Etekiera 1 - Te B'aib'ara bible

Etekiera 1

¹Ni kanimauani bongin te kaaua n nam'akaina n te katenibwi n ririki,[1] I maeka Ngai ae Etekiera ae te ibonga are natin Buti te m'aane, ma Iutaia ake taenikai i rarikin te Karaanga are Keeb'ara i B'aburon. E uki karawa, ao I noora ana kaotioti te Atua.

²Bon ana kanimaua n ririki mai mwiin uotakinakoan te uea are Ieoiakin nakon te kataenikaiaki.

³Ao I ongo b'anaan te UEA ngke e taetae nako iu i rarikin te karaanga are Keeb'ara, ao I kaonaki n te m'aaka.

⁴I tararake ao I noora buakani karawa ae e roko mai meaang. E nako te iti man te nang ae e korakora ao e kaotaa karawa ni kabane n te raitiiti ae raneanea. Nukan te nang arei e ura ma n oota nako kaanga te biti ae e waanetiaki,

⁵ao i nuukana I noori b'aai aika a aua aika maiu. Ti te bo taraaia ma te aomata,

⁶ma iai ubun are teuana aika aua ao aai naba baina ni kiba.

⁷A eti rangaia, ma ti te bo waeia ma waen taiani kao ataei ao a raitiiti kaanga te buraati.

⁸Iai bain te man aei i aan baina ni kiba ake aai ae bain te aomata.

⁹A kaai n tannako maan aikekei ni kaun akuu ma baiia ni kiba aika a boo taboia. A buti n aki akaaka nakon taabo n aki akaaka, ao a aki raaraira rab'ataia.

¹⁰Maan akekei iai ubuia n tatabemaniia ae kaanga ubun te aomata mai moana, ubun te raian n iterana are te angaatai, ubun te kaom'aane man te maing, ao ubun te ikare mai buki.

¹¹Uaai bain maan akekei aika taakinaki nako ni bo ma baiia maan ake n iteraia ake uoua. Ao baiia riki ake uaai a rukumaki n nim ma rab'ataia.

¹²A buti maan ake aua akekei n ikotaki n ti teuana, ao a aki rarairaki i bukina ngke a kaineti taabo nako moaia.

¹³A raitiiti maan akekei kaanga te kooro ae e kabuebue, ao I noora te b'ai ae kaanga te oi ae e ura ae e butirake ao e buti rikaaki i buakoia. E nako te iti man te oi ni katoa te tai are e nako ia urana.

¹⁴A m'ananga maan akekei ni kewa kaanga kiban te m'akaro man te ai.

¹⁵ao i mwiina, I a tib'a ataia b'a iai taian wiira aika a mena i rarikiia maan akekei n tatabemaniia nako,

¹⁶ae e raneanea kaanga te tobati. Ti te bo wiirana nako ao e mena wiirana are teuana i nanon wiirana are teuana; kaanga e koreaki mai nuuka [2]

¹⁷b'a e aonga ni konaa ni buti nakon moaia aika a kakaokoro ao a aki manga rarairaki ni kaeti moaia.

¹⁸A buubura nainain wiira akekei ao a onrake n taiani kanoanimata ni katobibia.

¹⁹Ngkana a m'ananga maan akekei, ao a airi naba ma taiani wiira akekei, ao ngkana a teirake maan akekei mai aon te aonnaba, ao a teirake naba taiani wiira akekei.

²⁰A m'ananga nakon te tabo are a bon taku maan akekei, ao ti te bo naba ma taiani wiira akekei b'a a karaoa are a karaoia naba maan akekei, i bukina b'a a baaireaki aroia irouia maan akekei.

²¹Ma ngaia are, ni katoa te tai are a m'ananga iai ke a toki iai ke a kiba rake, ao a bon karaoa naba anne taiani wiira akekei.

²²Iai te b'ai ae kaanga taraan annangin karawa ae e riki man raneanean te kerutitaro.

²³Ao a tei i aan te b'ai are kaanga taraan annang n taakin baiia ake uaai maan akekei ni kaboi tabon baiia temanna nakon are i rarikina ni kamronron, ao a rabuna rab'ataia ni baiia riki ake uaai.

²⁴Ao I ongo tangin baiia ngkana a kiba; kaanga aron rurungaan naon taari, kaanga karongoaan te taanga ni buaka ae rangi ni korakora, kaanga b'anaan te Atua ae Moan te M'aaka. Ao ngkana a toki ni kibakiba, a manga rukumi baiia ni kiba i rarikin rab'ataia.

²⁵Ao ngkana e toki rebwerebwen baiia ni kiba, ao I ongo te b'anaa ae e roko mai aon te b'ai are kaanga taraan annang.

²⁶Ao i mwiina, I noora te b'ai ae kaanga taraan te kaintokanuea ae karaoaki man tabeiro, ao i aon te kaintokanuea anne bon te b'ai ae buraburan te aomata. [3]

²⁷Mai aon bebeena ni waerake, e bon raneanea kaanga te biti ae e mena n te ai ae e kabuebue, ao mai bebeena rikaaki kaanga taraan uran te ai. E katobibiaki te b'ai arei n oota ae e raaitiiti,

²⁸kaanga matan Nei Wirara ngkana e kaoti n tain buakan karawa. I a tib'a ataia b'a ngaia I a tia n noora raneanean mimitongin te UEA! Ma ngaia are, I bobaraaki ni kabooa matau ma aontano, ao I a manga rina n ongo te b'anaa ae e taetae nako iu.