Read Te B'aib'ara Etekiera 10 Bible Online

Etekiera 10 - Te B'aib'ara bible

Etekiera 10

¹Ao I noora te b'ai are ai aron annang are e mena i aon maan ake iai baiia ni kiba, ao e mena i aona te kaintokanuea ae te tabeiro.

²E taku te UEA nakon te m'aane are e kunnikainna n te niiniira te riinen, “Nakonako i nanon taian wiira akana i rarikin maan akana iai baiia ni kiba ao anai taiani kooro aika a kabuebue n aron ane ko konaa n uotia. Ao i mwiina, ko na kamaaea i aon te kaawa are Ierutarem.” Ao I mataku ngke e karaoa nanon ana taeka te UEA.

³A tei maan ake iai baiia ni kiba i maiakin te Tembora ngke e nakonako te m'aane arei i buakoia. E kaona katawanangin te Tembora,

⁴ao e m'ananga nako mimitongin te UEA mai aoia maan ake iai baiia ni kiba ao a tei ni mataroan te Tembora. Ao e kaonaki te Tembora ni kabane ni mimitongina, ao e raitiiti n raneanea katawanangin te Tembora.

⁵Ao e korakora rurungaiia maan ake iai baiia ni kiba n ai aron b'anaan te Atua ae Moan te M'aaka ao e konaa n ongo te aba man katawanangin oon te Tembora.

⁶E tei te m'aane are e kunnikainna te niiniira te riinen i rarikin taiani wiira.

⁷E kaaenakoa baina temanna mai buakoia maan ake aman n anaa te ai mai buakoia ao e angan te m'aane arei tabeua taiani kooro aika a kabuebue. E anaa te kooro te m'aane arei ao i mwiina e nako.

⁸Ao I a manga uringnga b'a a bane ni iai baiia n tatabemaniia nako maan ake aua baina ni kiba aika ai aron bain te aomata i aan baiia ni kiba,

⁹ao I noori wiira ake aua i rarikiia maan akekei. A raneanea wiira aikai kaanga te tobati.[7]

¹⁰Ti te bo taiani wiira akekei n tatabeua nako ao iai taiani wiira teuana i nanoia i nuukaia,

¹¹n te aro are a na konaa ni buti nakon itera ni kabane n aki manga rarairaki. A buti taiani wiira akekei nakon taabo nako ike e nako iai maan akekei.

¹²Ao I bon namakinna naba b'a a onrake n taiani kanoanimata taiani wiira ao maan akekei, n reitaki ma mataia maan akekei, ma baiia, ao baiia ni kiba.

¹³I ongo te b'anaa ae e wetei baikai “te wiira are e minomino”.

¹⁴Iai aua ubuia n tatabemaniia nako maan ake iai baiia ni kiba akekei, ubun te kaom'aane, ubun te aomata, ubun te raian, ao ubun te ikare.

¹⁵(Bon maan naba ake I noori i rarikin te Karaanga are Keeb'ara.) Ngkana a mwemwe rake maan akekei i nanon te ang

¹⁶ma ni m'ananga, ao a m'ananga naba taiani wiira akekei ma ngaiia. Ngkana a taakin baiia ni kiba ni kiba nako, ao wiira akekei a bon airi naba ma ngaiia.

¹⁷Ngkana a toki maan akekei, ao a toki naba taiani wiira; ao ngkana a kiba, ao a m'ananga naba taiani wiira akekei ma ngaiia, i bukina b'a a tauaki aroia irouia maan akekei.

¹⁸Ao i mwiina, e kiitana mataroan te Tembora raneanean mimitongin te UEA ao e toki i aon maan ake iai baiia ni kiba akekei.

¹⁹A taakin nako baiia ao a kiba i nanon te ang ma taiani wiira akekei i rarikiia. Ao a toki ni mataroan te Tembora are i mainiku, ao E mena mimitongin te UEA i aoia.

²⁰I bon ataia raoi b'a bon maan naba aikai ake I a tia n noori i aan mimitongin te UEA i rarikin te Karaanga are Keeb'ara.

²¹Iai ubuia aika aua n tatabemaniia nako, ao baiia ni kiba aika aua, ao te b'ai ae kaanga taraan bain te aomata i aan nako baiia ni kiba n tatabeua nako.

²²Ti te bo taraan ubuia ma ake I a tia n noori i rarikin te Karaanga are Keeb'ara. A kaai ni m'ananga maan akekei n tatabemaniia nako ni kaineta mooa n aki rarairaki.