Read Te B'aib'ara Etekiera 12 Bible Online

Etekiera 12 - Te B'aib'ara bible

Etekiera 12

¹E taku te UEA:

²Etekiera ae natin te aomata, ko maeka i buakoia taani kamangao. Bon iai mataia, ma a rawa n taratara; iai taningaia ma a rawa ni kakauongo.

³Ma ngaia are, ngkana e nang roo, ao aio te b'ai ae I tangiria b'a ko na karaoia. Ko booboti am b'ai kaanga ai aron ae ko nang uotaki nako b'a te taenikai. Ao i mwiina, ko na otinako nakon te tabo ae a na ko naa n nooriko iai ao ko na nakonako man te tabo teuana nakon te tabo teuana. B'a tao a na bae n kauringaki aroia ni kakamangao ngkana a matakuakiniko.

⁴Ngkana ko tia ni karaoa aei, ko na oki rikaaki nakon am auti. Ao rimwi riki n te tairiki anne ko na kiitana am auti kaanga ai aron ae ko nang nakon te kataenikaiaki.

⁵Ko na kab'angab'angaa oon am auti, ao kawakawa n otinako, ao uouota am baeki. Ko na kakoauaa raoi b'a a matakuakiniko aomata nako. [9]

⁶Katokaa am baeki i aon angam, ao karabaa matam, ao m'ananga nakon ae e roo b'a ko aonga n aki noora te aba are ko a kiitanna. A na riki baikai ni kabane b'a kauringakiia Iteraera.

⁷I karaoi b'aai ni kabane ake E taekin te UEA. I booti au b'ai tabeua. Ao ngke e bung taai, ngke a bon noorai aomata nako, ao I a kab'angab'angaa oon au auti. I katika au baeki, ao I tabekia nako aon angau ao I m'ananga nakon te roo.

⁸E taku te UEA n te moaningabong are i mwiina,

⁹E a kauringai te UEA b'a a na bon aki roko naba n te titiraki aomata aika a kakamangao b'a tera te b'ai ae I karaoia.

¹⁰Ma ngaia are, E a manga kaokai nakoia: Iai ana rongorongo te UEA ae te Atua i bukiia taani kairiiri i Ierutarem ao aomata ni kabane ake a maeka ikekei.

¹¹I a tia ni karaoi baikai ni kaotia nakoia te b'ai ae e riki nakoia ngkana a uotaki nako b'a taenikai.

¹²E na tabeki ana baaeki nako aon angana te tia kairiiri i Ierutarem ngkana e a bung taai ao e na otinako man te b'angab'anga are e karaoaki irouia tabeman n oon ana auti. E na karabaa matana, b'a e aonga n aki noora te aba are e a kitanna.

¹³E na taakina te karaun te UEA ni kam'anea ngke e tabe ni kiitana Ierutarem. Ao i mwiina, e na uotaki nako te kaawa are e buubura are B'aburon, ma e na aki manga oki n noora te tabo arei, e ngae ngke e na boni mate ikekei.

¹⁴A na uamaae nako ana mataniwi ao ana taanga ni buaka nakon taabo nako, ma e na rimwiia te UEA ma n tiringiia.

¹⁵E na kairoroia nikiraia kaain Ierutarem b'a a na maeka i abaia botannaomata ianena, ao a na uringaaba iai b'a bon ngaiia aika a karaoi baikai ni kabane.

¹⁶Iai tabeman aika a na reke maiuia i mwiin te buaka, te mate ni baki, ao man te aoraki ae e kamaamate. Anne aroia are a na konaa iai n tuangiia iai ianena korakoran ribaakin aia bure, ao bon te UEA ae E katuaaia n aron aei.

¹⁷E taku te UEA:

¹⁸Etekiera, ae natin te aomata, kona ioioaki ni maaku ngkana ko am'arake, ao ko na ruru ngkana ko mooi.

¹⁹Tuangiia Iteraera b'a bon Ngai ae te UEA ae I taekinna b'a e na roko te bong are a na bane n ruru iai kaain Ierutarem ngkana a am'arake ao ngkana a mooi. E na uruakaki abaia ao a na akea kaaina, i bukina ngke a tia n iowawa ao n tiritiri.

²⁰A na bane ni wene n uruaki kawa nako ao e na riki te aba b'a te rereua ae akea kain aona. Ao i mwiina, a na ataia iai b'a bon te UEA Ngai.

²¹E taku te UEA:

²²Etekiera ae natin te aomata, ko a tia n ongo aia taeka Iteraera ae a aki toki n tataekinna ae e kaangai, “A waaki nako boong, ao aikoa konaa ni koro bukin taeka ni burabeti.”

²³Ngkai ko na tuangiia aomata b'a N nang karaoa te b'ai teuana ae a na kakoauaa iai b'a e bure aia taeka anne. Bon akea riki ae e na manga konaa n taekina riki anne i aon Iteraera, i bukina b'a a nang koro bukin b'aai ni kabane aika I taekin n te tai ae e aki maan!

²⁴A na aki manga oki aomata n ongo taeka ni kauring aika akea manenaia ke taian rongorongo aika a kewe.

²⁵N na anganiia au rongorongo, ao e na bon riki te b'ai ae I taekinna. Kam na kauringiia taan kamangao akanne b'a e a roko te tai are a na katuaaeaki iai. Boni Ngai ae te UEA ae I karaoa te berita aei.

²⁶E taku te UEA nako iu,

²⁷“Natin te aomata, a taku Iteraera b'a bon ti taekan boong aika a na roko akana a taekinaki ni miim ni burabeti ma am rongorongo nako.

²⁸Ma ngaia ae, ko na tuangiia b'a a na koro bukin au taeka ni kabane, n aron are I a tia ni kauringiia iai. Bon aei Au taeka Ngai ae te UEA.