Read Te B'aib'ara Etekiera 13 Bible Online

Etekiera 13 - Te B'aib'ara bible

Etekiera 13

¹E taku te UEA:

²Etekiera ae natin te aomata, ko na kabuakakaia burabetin Iteraera ake a taetae n arau, ma a kab'arab'arai rongorongo aika a bon karioi man oin aia iango. Tuangiia b'a e a roko te tai are e na ongo te aba iai au rongorongo.

³Boni Ngai ae te UEA ae te Atua ae I taekinna b'a e a roko te kangaanga i aoia burabeti aikai! A bon aki noori taian mii ni burabeti-a bon otoi aia rongorongo i bon irouia!

⁴A aki raoiroi riki burabetin Iteraera nakon taian tiakaore ake a kakaaea kanaia i buakon b'ain te kaawa ae e uruaki. [10]

⁵A aki tuangiia aomata taekan te kangaanga ae e nang roko ke n tuangiia kamaamaten karaoan te bure nako iu.

⁶A taekina te kewe burabeti aikai ngke a taku b'a a taetae i buku, ma I bon tuai rineia b'a au burabeti. A taku b'a e na koro bukin aia taeka.

⁷A taku b'a a kab'arab'ara au rongorongo, ma a onrake n taiani kewe-I bon aki taetae nakoia!

⁸Ma ngaia ae N nang katuaaia burabeti aika a b'anga ni kewe aikai i bukin burebureaia Iteraera n aia rongorongo aika a kaairua.

⁹N na eekiia nako ao N na manga karikiia b'a au aomata. A na aki manga atongaki b'a Iteraera ke n toua Iteraera. Ane a na tib'a uringnga b'a bon te UEA Ngai ae te Atua.

¹⁰A rawa burabeti aika ni karaoa ae e raoiroi. A tuangiia aomata b'a e na reke te rau, e ngae ngke bon akea te rau ae e nooraki. Bon taani m'akuri ngaiia aika a taku b'a a konaa ni katoka ieien te oo ae e aki matoa ngkana a beniia.

¹¹Ma ngkana I kanakoa buakan karawa, te karau te atiibu, ao te ang ae e korakora, ao e na bon b'aka te oo anne.

¹²A na titiraki aomata nakoia taani m'akuri b'a e aera ngkai e aki matoa n te been.

¹³Bon Ierutarem te oo anne. Ao boni Ngai ae te UEA ae te Atua ae I kanakoa te ang ae e korakora, buakani karawa, ao te karau te atiibu b'a e na urua.

¹⁴A kataia burabeti aika a b'anga ni kewe aikai ni karabaa te buakaka i Ierutarem, ma N na korouaa te kaawa ni kab'aka, ni kabane ni karokoa aana. Ao ngkana e b'aka, a na tiringaki burabeti aikai, ao ane a na ataia aomata ni kabane b'a boni Ngai ae I karaoi baikai.

¹⁵A na namakina uniu Ierutarem ao burabeti aika a b'anga ni kewe. Ao i mwiin anne, N na katanoataa b'a e a tia ni b'aka te kaawa ao a tia ni mate burabeti aika a b'anga ni kewe,

¹⁶i bukina ngke a berita nakoia au aomata b'a e na reke te rau. Bon aei au taeka Ngai ae te UEA.

¹⁷Etekiera ae natin te aomata, ko na kabuakakaia ainen Iteraera ake a kab'arab'araa te rongorongo are bon oin aia iango.

¹⁸Tuangiia b'a a reke n te kangaanga! A kabaei kunnikai aika a m'aaka i aon toun baiia ao i toan ram'aia, ma ni keweia aomata b'a aongkoa a konaa n tuangiia aomata kanoan aia bong aika a na roko. A na bon aki nako man tataekinan taiani kewe aikai.

¹⁹A tuangiia aomata b'a a na uoti rekenibaia tabeua te abuta te b'are ao uoua taiani kariki, ao ngaiia a na anganiia taian rongorongo aika a kamamaaeai. A kabongana te kewe ni motikitaekaia aika a akea aia bure nakon te mate ao a buokiia taani bure n anganiia te inaomata. Ao a kakoauaaki irouia aia aomata!

²⁰I ribai taiani m'akuri n tabunea are a m'anaia iai aomata b'a a na kakoaua aia kewe. N na buuriia man tounibaiia ma ni kainaomataia aomata ake a kam'aneia kaanga taiani mannikiba.

²¹N na raeraei taiani kunnikai ake a kabaea i aon ram'aia ma ni kamaiuia Au aomata man m'aakaia te moan tai ao te kabanea naba n tai. Ao ane a na ataia iai b'a bon te UEA Ngai ae te Atua.

²²A karaoi b'aai aika N na bon aki karaoi. A keweia aomata aika a raoiroi ao a kaungaia b'a a na karaoi m'akuri aika a kaairua, ao a anai nanoia aomata aika a buakaka b'a a na teimatoa ni karaoa te bure ma ni kaburei toroni maiuia.

²³N na bon aki manga kariaia aine aikai b'a a na anga te rongorongo ae a kaairua ma ni kamanenai taiani tabunea, ao N na kainaomataia au aomata man aia babaaire. Ao ane a na ataia iai b'a boni Ngai ae te UEA ae I karaoi baikai.