Read Te B'aib'ara Etekiera 16 Bible Online

Etekiera 16 - Te B'aib'ara bible

Etekiera 16

²Etekiera ae natin te aomata, ko na kauringiia kaain Ierutarem i bukin aia bure aika a rangi n ribaaki

³ao tuangiia te b'ai ae I taekinna ae e kaangai: Ierutarem, ko bon bungiaki n te aba are e maeka iai ngkoa kaain Kanaan. Tamami bon kaain Amora, ao tinami bon kaain Eta. [12]

⁴Ngke kam bungiaki, ao bon akea ae e koroiko mairoun tinam ke n teboka rab'atam. Bon akea ae e kabira rab'atam n te taoro ma b'aan te oriwa, [13] ao n niiriko n taiani burangketi.

⁵Bon akea temanna ae e tangiria ni karaoi baikai, ao bon akea naba ae e nanoangaiko. E na aki kubaraki, ma ni karenakoaki nako nanon te tawaana, ma n aki m'aninga te aba taekam.

⁶I nooriko ngke ko wene ikekei, ma n rabinobino i nanon raraam, ma n aki tangiria b'a ko na mate.

⁷I aki tabe ma ngkoe, kaanga te aomata ae e tabeakina arokana ae e uarereke. Ko a ikawai ma n riki b'a te ataeinaine ae e botonaine ma mmamam aika a tamaroa ao iran atuum ae e m'arairai, ao ko bon beebekan naba.

⁸Ngke I a manga nooriko riki, ao ko a bon tau nakon te iein. Ma ngaia are, I a rabuniko n niiniirau.[14] Ao i mwiin anne, I karaoa au berita ae e matoa b'a bon au b'ai ngkoe ao Ngai ae te UEA ae te Atua N na kaawakiniko.

⁹I teboka raraam ni kanakoi ao I kabiriko ni b'aan te oriwa.

¹⁰I anganiko te kabanea n tamaroa n niiniirau ae te kabanea ni boobuaka, ao ai uana naba ma taiani kauniwae aika a karaoaki man te kabanea n tamaroa ni kun ni man.

¹¹I anganiko te burenibai, te m'ae n roroa,

¹²m'am'an te b'airi, taian taabia, ao te baunuea ae e tamaroa.

¹³A karaoaki am b'ai ni katamaroa man te koora ma te tirewa, ao a karaoaki am kunnikai man taian riinen aika a korotinaki. E kam'aaki kanam te kariki man te buraawa ae te kabanea ni mte, ao ko kaakana ana karewe te manibeeru ao b'aan te oriwa. Bon ti te bo botonainem ma te ueanaine,

¹⁴ao a bane n ataia aomata nako n te aonnaba. Boni Ngai ae te UEA ae I a tia ni buokiko b'a ko na riki b'a te ateiaine ae e taatangiraki.

¹⁵Ko ataia b'a ko konaa n anaa nanoia m'aane nako akana ko tangiriia, ma ngaia are, ko anga rab'atam nakoia akana a rirarikim ni kabane.

¹⁶Ko karaoa oin am baangota ao ko katamaroa ni kunnikaim tabeua. Ao bon anne te tabo ike ko anaia iai taan roko b'a a na wene ni bure ma ngaiia. A na bon aki manga riki b'aai aikai!

¹⁷Ko karaoa te bouannanti man taiani b'ai ni katamaroa aika taiani koora ma tirewa ake I anganiko, ao i mwiin anne, kam bure n taromauri taiani bouannanti aikai.

¹⁸Ko kunnikaiia n taiani kunnikai ake ko karekei mairou, ao ko anganiia b'aan te oriwa ma te b'ai ni kaboiarara ake I anganiko.

¹⁹I anganganiko te buraawa, b'aan oriwa, ao ana karewe te manibeeru, ao ko karean ni kabane b'a kakukureian taiani bouannanti aikai. Boni Ngai ae te UEA ae I mataku ngke e riki aei.

²⁰Ma ko bon karaoi b'aai riki aika a buakaka riki nakon anne, ko anga oin natim b'a am karea nakon taian bouannanti aikai!

²¹Ko tiringiia natiu, b'a ko aonga ni konaa n anaia b'a am karea.

²²Ko rangi n tabetabe ni karaoa te bure ma ainen mataawa n te aro are ko rawa n iangoi boong ake ko uarereke iai ma n rabinobino ni bebeekan i nanon raraam.

²³Boni Ngai ae te UEA ae I taetae ni kaangai ko a reke n te kangaanga! Ko aki ti karaoi baika a buakaka aikai,

²⁴ma ko bon karaoi naba taabo i nanon kawain nako te kaawa

²⁵ike ko kab'ainrangko iai ni wene ni bure ma aomata nako akana a kaoti i rarikim. Ao ko kabatia karaoan anne n te bong teuana ma te bong teuana!

²⁶Ko kamaraka nanou n anga rab'atam nakoia kaain Aikubita, ike a bon kaman tia ni wenewene ma ngkoe.

²⁷Ma ngaia are, I katuaaeko ni kariaia kaain Biritia aika kairiribai aika a nanonrang b'a a na anai abanueami tabeua. E ngae ngkana a rawawata ni kateimi aika a rangi n ribaaki.

²⁸E aki toki nanom ni wene ni bure, ma ngaia are, ko ri mwiin Aturia ni kakioa ao ko wene ma ngaiia. Ao ko bon aki rauaki naba,

²⁹ma ngaia are, ko a manga rimwiia kaain B'aburon. Ma ko bon aki rauaki naba irouia taani boob'ai aikai.

³⁰Boni Ngai ae te UEA ae I taekinna b'a ko a rangi n ribaaki n te aro are ko nang karaoi m'akuri aika ko na karekei iai baika ko tangiri.

³¹Ko wene ni bure ni kawain nako nuukan te kaawa, ao ko rawa ni butim'aea te m'ane ngkana ko tia. Ma ko kaokoro ma ainen matawa nako ake a tangira te m'ane.

³²Ti te bo ngkoe ma te aine ae e wene ni bure ma ianena ao e rawa ni wene ni bure ma buuna.

³³E kabooaki ainen mataawa, ma ngkoe ko anga b'aintangira nakoia am tangira ao ko kamaraa atoia b'a aonga n roko ni matu ma ngkoe.

³⁴Bon ainen mataawa ngkoe ae ko kaokoro. Akea ae kairoroiko b'a ko na katotoonga temanna. Ko aki kabooaki; ma ko kabooia! Eng, ko bon kaokoro.”

³⁵Ao ngkai, Ierutarem, ainen mataawa! Ongora te b'ai ae e taekinna te UEA.

³⁶Aio te b'ai ae e taekinna te UEA: Ko buuta am kunnikai, ao ko anga rab'atam kaanga ainen mataawa nakoia am tangira ao nakoia am bouannanti aika a rangi n ribaaki, ao ko tiringiia natim b'a taiani karea nakoia am bouannanti.

³⁷Ma ngaia are, boni Ngai ae te UEA ae N na bootia am tangira, ake ko tangiriia ma ake ko ribaia. A na katobibiko, ao N na buuta kunnikaim b'a a na matakuakiniko ngke ko bebeekan.

³⁸N na kuneko b'a ko bure b'a ko a tia n riki b'a te ainenum'a ae e aki kakaonimaki ao te tia tiritiri, Ao n anga motikan taekam b'a ko na kamateaki!

³⁹I mwiin anne, N na anga ngkoe nakoia am tangira, ake a na kab'akai taabo nako ake ko aki toki ni wewene ni bure iai. A na anai am kunnikai ma am b'ai ni katamaroa, ao a na katikuko ma akea kunnikaim ao akea am b'ai.

⁴⁰A na tiringko am tangira ma te koraki ni kamangao; ao a na korokorea rab'atam ngkana e a mate

⁴¹ao a na kabuoka am auti nako. Ao a mataku koraki n aine ake te korakina ni b'aai ake a riki nakoim aika a kakamaaku. I berita b'a N na katoka arom n aine ni mataawa ma te anganga b'ai nakoia am tangira nako.

⁴²Ao i mwiin anne, e na toki uniu, ao e na rau nanou. N nang aki manga oki n unun ke ni kokoo.

⁴³Ko kaunai ngke ko karaoi baika a rangi n ribaaki aikai ni kabane ao ngke ko m'aninga arou ngke I tararuaiko ngke ko uarereke. Ao i mwiina, ko a manga kabuakakaai riki ngke ko a manga riki b'a ainen mataawa. Ko bon riai ni katuaaeaki! Bon aei au taeka Ngai ae te UEA ae te Atua.

⁴⁴Ana tataekina te taeka ae e kaangai aomata i bukim ngkoe ae Ierutarem: “Ngkana e buakaka te tina ao e na bon buakaka naba natina te aine.”

⁴⁵Ko bon katotoonga tinam, ae ribaa buuna ma oin natina. Ko bon katotoonga naba tarim, ake a ribaia buuia ao natiia. Bon kaain Amora tamam, ao tinam kaain Eta. [15]

⁴⁶Tamaria bon tarim are te ikawai, are te kaawa ae e buubura are i meangim ma kaawa akana i rarikina nako. Tarim are karimwiim bon Totom, are te kaawa are i maiakim ma kaawa akana i rarikina nako.

⁴⁷Ko katotoongi maiuia ao kateia aika a buakaka, ao n te tai ae e waekoa ko a manga rangi n ribaaki riki nakoia.

⁴⁸Ma ngkai bon te UEA ae te Atua Ngai ae e maiu, e na bon aki buakaka riki Totom ma kaawa nako ake i rarikina nakoim.

⁴⁹A kainikatonga ao a buabeka; a toki nanoia ni b'aai ake a kainanoi ao a rawa ni buokiia aika a kananoanga aika a maiu ni kainano.

⁵⁰A taku b'a a raoiroi riki nakoia aomata ni kabane, ao a karaoi b'aai aika I ribaai. Ma ngaia are, I kamaunaiia.

⁵¹Kam a tia ngkami aika kaain Ierutarem ni kauoua buakakan ami bure nakoia kaain Tamaria. E a manga taraa n akea ana bure Totom ma Tamaria i bukin buakakan ami m'akuri.

⁵²Ma ngaia are, e na beebete riki katuaaia ngkana e kabotauaki ma ngkoe. Ko na bon kamaamaeaki i bukin am bure aika rangi n ribaaki.

⁵³N te bong teuana, N na kakab'aiaa Totom ao Tamaria ao kaawa nako akana i rarikina. N na bon kakab'aiako naba, ngkoe ae Ierutarem.

⁵⁴Ao ko na mamaa n te b'ai ae ko karaoia, ao a na kabebeteaki Totom ao Tamaria b'a a rangi ni mamaa n ai arom.

⁵⁵Ngkana e roko te bong arei, ko na manga okira arom ni kaub'ai ngkoe ma Totom ma Tamaria, ao a na manga okira aroia kaawa nako akana i rarikiia.

⁵⁶Ierutarem, ko rangi ni kainikatonga n te aro are ko a manga mata ni kakaniko nakon Totom.

⁵⁷B'a a bane ngkai aomata n ataa arom ae e buakaka. A ribaiko aaba aika Turia ao Biritia, ao ai uana naba ma kaain rarikim ake tekorakina, ao a karaoi taekam aika a kamamaa.

⁵⁸Ko na riai ni kabooi mwiin m'akuri aika ko a tia ni karaoi aika a kammaira ao aika a rangi n ribaaki. Bon aei au taeka Ngai ae te UEA.

⁵⁹Ierutarem, ko bon riai ni katuaaeaki, b'a ko urua am berita ao ko kaaki taekan ara boraraoi.

⁶⁰Ma I ururinga te boraraoi are I karaoia ma ngkoe ngke ko uarereke, [16] ma ngaia ae, N na karaoa te berita nakoim are e na akea tokina.

⁶¹Ko na bon mamaa ngkana ko uringa m'akuriana iroum, ao ai moara ra riki ngke I kaokiia tarim nakoim,[17] e ngae ngke ti aki aei kanoan te boraraoi.

⁶²N na kaawakina te berita ae e matoa aei, ao ko na ataai b'a bon te UEA Ngai.

⁶³N na kab'araa am bure, ma ko na riai ni iangoi am bure ma ni mamaa iai n te aro are ko na aki kakarongoa. Bon aei au taeka Ngai ae te UEA.