Read Te B'aib'ara Etekiera 19 Bible Online

Etekiera 19 - Te B'aib'ara bible

Etekiera 19

¹Etekiera, ko na anenea te kuna ni mate i bukiia ana taani kairiiri Iteraera ake uoman: [20]

²Bon te raian te aine ae e ninikoria tinam ae e kaikawaia natina i buakoia raian.

³E reireina temanna mai buakoia aron kakaean kanana, ao e a rabakau te nati arei aron kanakiia aomata.

⁴Ao ngke e ongo te botannaomata taekana, ao a kam'anea i nanon m'anono, ao a kamanenai taian matau ni uaakinna nako Aikubita.

⁵E tataninga tinana ni kaantaningaa okina. Ma n te tai ae aki maan ao e a toki ana kakantaninga ao e a manga kaikawaa bunna temanna, are e a manga riki rake naba n tiritirina ma ununna.

⁶E kaai ni kakaaea kanana ma raian ake tabeman ao e a rabakau kanakiia aomata.

⁷E urui taian nono ao e kamaunai kaawa; e kakamakuia aomata nako ni bekorarana ae e korakora.

⁸A iangoa aron matena botannaomata, ao a roko aomata man taabo nako b'a a na taakina aia karaun ma ni kam'anea i nanon aia b'ai ni kam'ane.

⁹A kaakiia i nanon nnen te man ao a uotia nako B'aburon. E a kainaki te raian, n te aro are e aki manga ongo te aba bekorarana ae e korakora i aon tabukin Iteraera.

¹⁰Bon te kai ae te kureebe tinam ae e maiu i rarikin te raanga n ran. E rangi n m'aiti te ran, ai ngaia are e a kaon m'aangana n taiani uaa aika a m'aiti.

¹¹A riki m'aangana ake a korakora b'a kanikinaean te m'aaka, ao e rietaata riki nakon taian aroka ni kabane a bane n nooria aomata nako korakorana ma marurungin neierei.

¹²Ma I katikia rikaaki ni marakin nanou mai wakaana ao e karenakoa i aontano, ike e a m'autakataka uaana angin te rereua ae e kabuebue. A kui m'aangana ake a korakora ao a bue.

¹³Ao i mwiina, e a unikaki i nanon te rereua ae e kabuebue ni m'auteretere,

¹⁴ike e a bue iai kaina, ao e a kaurarakei m'aangana nako te urarake. Bon akea nikiran m'aangana; E tiku ni ngaongao. E na riai n aneneaki te anene ni mate aei ma te nanokawaki.