Read Te B'aib'ara Etekiera 20 Bible Online

Etekiera 20 - Te B'aib'ara bible

Etekiera 20

¹Itiua te ririki i mwiin te uea are Ieoiakin ao ti a bane ngaira ni kairaki nako B'aburon b'a taenikai, a roko irou tabeman taani kairiiri mai Iteraera n katebwinan bongin te kanimaua n nam'akaina. A tekateka ao a buubutiai b'a N na kaongoia ana rongorongo te UEA. [21]

²Ao ni bon te tai arei E taku te UEA ae te Atua:

³Etekiera ae natin te aomata, a roko taani kairiiri aikai b'a a na kakaaea te b'ai ae I tangiria b'a a na karaoia. Ma ngkai I bon maiu, N na aki anganiia te kaeka teuana.

⁴Ko tangiria ni kauringiia, Etekiera? Ao kauringiia n aia bure aika a rangi n ribaaki ake a karaoi aia bakatibu.

⁵Tuangiia b'a n taai ake ngkoa Ngai ae te UEA ae te Atua, I rineia Iteraera b'a a na riki b'a au b'ai. Ao I kaoti nakoia aia bakatibu i Aikubita ao I karaoa te berita ae e matoa b'a N na riki b'a Atuaia ao Atuaia aia kariki nako.

⁶I tuea b'a N na kamaiuia mai Aikubita ma ni kairiia nakon te aba are I a kaman rineia. E mari te aba n te miriki ao ana karewe te manibeeru ao bon te aba ae te kabanea n tamaroa.

⁷I tuangiia b'a a na kaaki aia bouannanti aika a rangi n ribaaki ao a na aki manga bure n taromauriia antiia kaain Aikubita. I kauringiia b'a bon te UEA Ngai ae Atuaia,

⁸ma a bon kamangao naba nako iu. A rawa n ongo ao a teimatoa n taromauriia taiani bouannanti ao antiia ianena. Ao I baaireia b'a N na katuaaia Iteraera i Aikubita i bukin marakin nanou.

⁹Ma I taraa n ae I a tia ni kewe i bukina ngke I a tia n berita i mataia ni kabane b'a N na kairiia ni kaotinakoia mai Aikubita.

¹⁰Ma ngaia are, I kaotinakoia ao I kairiia nakon te rereua.

¹¹I anganiia au Tua ma au Reirei, b'a a aonga n ataa aron maiuia ae e raoiroi.

¹²Ao I tuangiia b'a a na karinea te bong ae te Taabati b'a kanikinaeana b'a a tabu b'a Au b'ai.

¹³Ma a kakaitaraai Iteraera i nanon te rereua. A rawa n iri nanon au Tua ma au Reirei nako, ao a karaoa te Taabati b'a kaanga te bong n aki akaaka. Ao I a baaireia b'a N na kamaunaia Iteraera n te rereua ae Au moan tai ni kamaunaia ao ai Au kabanea naba.

¹⁴Ma N na bon ngareakiniia iai, i bukina b'a a tia n noorai botannaomata aika a bati ni kaotinakoia Iteraera mai Aikubita.

¹⁵I aki karaoa anne ma I a tuangiia n te rereua b'a N na kairiia nakon te aba ae e tamaroa, te aba ae e maiu reirei are I a tia ni berita iai nako ia.

¹⁶I taekina aei i bukina ngke a aki ti katinanikui au Tua ma au Reirei, ma a kamatauningaa naba au Taabati ao a taromaurii taiani bouannanti.

¹⁷Ma e ngae n anne ao I bon aki kariaia b'a a na mate i nanon te rereua.

¹⁸Ma ngaia are, I kauringiia ataei b'a a na aki karaoa aron are a karaoia aia karo ke ni katotoong aia m'akuri aika a buakaka ke n taromauria aia bouannanti nako.

¹⁹I kauringiia b'a bon aia UEA Ngai ae Atuaia ai ngaia are a riai n iri nanon au Tua ma au Reirei nako.

²⁰I tuangiia b'a a na karinea Au Taabati ni kaotia b'a Au aomata ngaiia ao Ngai aia UEA ae Atuaia.

²¹Ma a bon kamangao naba naati nako iu. A rawa n iri nanon au Tua ma au Reirei nako, ao a karaoa te Taabati b'a kaanga te bong n aki akaaka. E a rangi ni maraki nanou ao I a baaireia b'a N na katuaaia i nanon te rereua.

²²Ma I bon aki. B'a N na bon ngareakinaki iai irouia botannaomata nako ake a tia n noorai ni kaotinakoia mai Aikubita.

²³Ai ngaia are I karaoa Au tuea ae e matoa b'a N na kamaaenikuniia Iteraera nakoia botannaomata nako,

²⁴i bukina b'a a tia n aki iri nanon au Tua ao a katinanikui au Reirei nako; a kamatauningaa Au Taabati ao a taromauri taiani bouannanti ake karaoaki irouia aia bakatibu.

²⁵I anganiia taian tua ake a uota te rekenikai ao tiaki te maiu,

²⁶ao I kariaia b'a a na anga nako iu taiani karea aika a aki kariaiakaki, n reitaki ma naati m'aane ake taiani karimoa. I karaoa aei b'a N na kakamaakuia b'a a na ataia b'a boni Ngai ae te UEA ae I katuaaia.

²⁷Etekiera, ko na tuangiia Iteraera b'a a bon katinanikuai ma ni kamarakai

²⁸ngke a anga karea ni kaboiarara, ao te wain nakoia anti i aon te tabuki ao i aan aroka aika korakora. I bon rangi n un, i bukina b'a a karaoi b'aai aikai n te aba are I a tia n anganiia!

²⁹I titirakiniia b'a a taromaurii anti aikai ia, ao a kaeka ni kaangai, “Ni baangotan te aba.” Ao a bon aranaki naba ngkai taabo aikai b'a taiani baangota.

³⁰Ao i mwiina, ko na titirakiniia Iteraera b'a e aera ngkai a katotoong aia m'akuri aia bakatibu aika a buakaka

³¹b'a a manga taromauri bouannanti ao a anga oin natiia b'a taiani karea. A karaoi taiani bure aikai ao a bon teimatoa naba ni kaantaningaia b'a a bon konaa n bubutiai te rongorongo b'a N na kaotia nakoia. Ngkai bon te UEA ae te Atua Ngai ae I maiu, ao N na bon aki anganiia te kaeka.

³²Tao a taku b'a a konaa ni katotoongia aroia botannaomata ake tekorakina ni waakina aroia i bon irouia n taromauri taiani bouannanti aika a karaoaki n taiani kai ma atiibu. Ma bon anne te b'ai ae e na riki!

³³Ngkai I bon maiu Ngai ae te UEA ae te Atua, ao N na bon tautaekaningkami ni baiu ae e korakora. Kam na namakina korakoran uniu

³⁴ao m'aakau, ngkana I boobotingkami man taabo ake kam uamaae nako iai

³⁵ma ni kairingkami nakon te rereua ae e katobibiaki irouia botannaomata. N na kaaitibo ma n itaramata ma ngkami. Ao i mwiin anne, N na anganingkami motikan taekami

³⁶ma katuaaeakimi, n aron are I katuaaia naba ami bakatibu i nanon te rereua i rarikin Aikubita. [22]

³⁷N na kairoroingkami n tatabemaningkami b'a kam na iri taiani kainibaaire n ara booraraoi ae e matoa.

³⁸N na kaokoroia taani bure aika taani kamangao maibuakomi, e ngae ngkana N na kaokiia mai buakoia botannaomata nako ake a maeka b'a taenikai iai ngaiia, a na aki kariaiakaki b'a a na okira Iteraera. Ao i mwiina, ane ko na ataia b'a bon te UEA Ngai.

³⁹Waaki nako n taromauria ami bouannanti n te tai aei, ngkoe ae Iteraera, b'a N nang karaoiko b'a ko na aki karineai n te tai ae e aki maan b'a ko nang anga b'aintangira nakoia.

⁴⁰ngkana e roko te bong anne, a na bane n taromauriai Iteraera i aon te Maunga are Tion, are Au maunga are e tabu i Ierutarem. N na manga atongingkami riki b'a Au b'ai, ao N na manga butim'aai ami angab'ai ma ami karea nako.

⁴¹Ngkana I kaokingkami man taabo ake kam uamaae nako iai, N na rangi ni kukurei iroumi, n ai aron kukureiu ni boiararan bubun ami karea. A na bane n nooria botannaomata nako n aonnaba b'a I tabu,

⁴²ao kam na ataia b'a bon te UEA Ngai are I kaokingkami nako Iteraera, te aba are I berita iai nakoia ami bakatibu.

⁴³Ao i mwiina, kam na uring ami bure aika a buakaka, ao kam na ribaingkami i bon iroumi i bukin karaoan b'aai aika a buakaka. A karaoingkami b'a kam na aki butim'aeaki irou,

⁴⁴ma ngaia ae kam bon riai ni katuaaeaki. Ma N na karaoa nakoimi te b'ai ae e na reke iai karinean arau, ao kam na ataia b'a te UEA ae te Atua Ngai.

⁴⁵E taku te UEA,

⁴⁶Etekiera ae natin te aomata, rairaki nako maiaki ao kauringiia taiani buakonikai

⁴⁷ake N na kaura ma ni kabuoki aroka ni kabane aika a mawaawa ma aika a m'au. Bon akea te b'ai ae e konaa ni katoka te ura n te aro are e na rakanako nako meaang ma ni kabuoki b'aai ake a mena i aon kawaina.

⁴⁸A na bane n ataia aomata nako b'a bon Ngai ae I kaura, ao e bon aki konaa ni katokaki.”

⁴⁹Ma I ngurengure, te UEA ae te Atua, I aki tangiria ni karaoa te b'ai anne! A taku aomata b'a I kamangaongaoiia n Au rongorongo nako.”