Read Te B'aib'ara Etekiera 23 Bible Online

Etekiera 23 - Te B'aib'ara bible

Etekiera 23

²Etekiera ae natin te aomata, ko na ongora karakinaia taari aine aika uoman.

³Ngke a uarereke ngke a maeka i Aikubita, a riki b'a ainen mataawa.

⁴Aran are te ikawai bon Nei Oora, are e bon tei i bukin Tamaria; ao are te ataei arana bon Nei Oorib'a, are e tei i bukin Ierutarem. [24] A manga riki b'a buu ao a bungia natiu.

⁵E ngae ngke e riki b'a buu Nei Oora, ma e bon waaki naba arona n aine ni mataawa ma n riri mwiin ana tangira are Aturia.

⁶E anga rab'atana nakoia tautia ake a beboo aia kaboraoi, ao nakoia naba aika a botonim'aane, ao aobitia aika rietaata, ao tautia ake taan buaka mai aoia aoti.

⁷E wene ni bure ma mataniwiin Aturia aika a kakannato ao a taromauri aia bouannanti aika a bati n ribaaki.

⁸N te tai are e karaoi iai baikai i Aikubita, e aki manga konaa ni katokia. A wene m'aane ma ngaia, ao e a bon tatauraoi naba nakon te wene ni bure.

⁹Ma ngaia are, I anga Nei Oora nakoia ana tangira ake kaain Aturia ake e rangi n baba n tangiriia.

¹⁰A buutii ana kunnikai, ao a raweia natina nako ao a tiringa neierei. A taetaekina Nei Oora aine n taabo nako i bukin te b'ai are e riki nakoina.

¹¹E noori baikai ni kabane Nei Oorib'a, ma e riki rake riki maiuakinan te wene ni bure i rouna nakon are e a tia ni karaoia tarina are Nei Oora.

¹²E aki toki naba Nei Oorib'a ni kakaaia aobitian Aturia ake a botonim'aane, ma tautia ake a kaboraoi ao taan buaka mai aoia aoti.

¹³E karaoi b'aai aika a kammaira.

¹⁴Ma e rangi ni buakaka riki katein Nei Oorib'a nakon tarina. E noori taiani banna ake a karaoi m'anen B'aburon ake a karaoaki i aon te oo ao a karanaki n te uraura.

¹⁵Iai rooia i aon koreaia ao taian m'aita i aon atuuia, ao a kauringnga taian aobitia irouia taani buaka mai aoia aoti i B'aburon.

¹⁶Ao n te tai are e bon taraia naba iai, e a tangiria naba ni wene ni bure ma ngaiia. Ngaia are, e kanakoa ana tia uarongorongo b'a a na kairaki nakoina.

¹⁷A m'aiti aia tai m'anen B'aburon n roko ni wene ni bure ao e a kam'araa irouia.

¹⁸E kariaia aomata nako b'a a na nooria ni bebeekan ao e aki tabe ngkana e riki b'a ainen mataawa. Ao bon anne bukina ngkai I tannako mai rouna, n aron are I karaoia nakon tarina.

¹⁹E aki toki ikanne Nei Oorib'a ma e riki rake kammairana ao e karaoa are e karaoia ngkoa i Aikubita.

²⁰E rangi n tangiria b'a e na nako ni wene ma m'anen Aikubita, ake a rangi n ataaki ni korakoran kani m'aaniia.

²¹Ao e rangi n tangiri boong ngkoa ake e riki iai b'a ainen mataawa ngaia ngke e uarereke, are te tai are a rangi ni kan wene ni bure iai m'aane ma ngaia.

²²E taku te UEA ae te Atua: Oorib'a, e ngae ngke ko a aki tangiria ni mena i rarikiia am tangira, ma a na bon katobibiiko kaanga kairiribai, ngkana I eekiko nako. [25]

²³N na bootia ni kabane mataniwi aika a uarereke aika a botonim'aane ao aia aobitia aika a rietaata taani buaka mai aoia aoti mai B'aburon ao Aturia, ao ai uana naba man barongan Kareria i Bekota, Tioa ao Koa.

²⁴A na roko aia taanga ni buaka ae e korakora mai meaang ma kaa ni buaka ao kaa ni m'am'ananga aika a uoti b'ai ni buaka. A na karin taian otanga ao taiani b'ara ni buaka ao a na katobibiko ao N na karaoia b'a a na motikii taekam ao a na katuaaeako ni kaineti ma oin aia tua nako.

²⁵E maraki nanou iroum, ma ngaia ae, N na karaoia b'a a na iowawa. A korei ni kanakoi b'airim ao taningam; a na tiringiia natim ao a na tiringiia ni kabane am utu ake a tiku ni maiu.

²⁶A na raeraeaki am kunnikai ao am b'ai ni katamaroa.

²⁷N na katoka bebeekanim ao ainen matawaam are ko moana karaoana mai Aikubita. Ko na aki manga oki n iangoi boong aikai.

²⁸Boni Ngai ae te UEA ae te Atua ae I tauraoi n anga ngkoe nakoia kairiribai aika a rangi ni buakaka are ko na nooriia b'a a rangi n ribaaki.

²⁹A na uoti b'aai nako n te aro ae e aki raoiroi ake ko bon karekei n am m'akuri korakora ao a na buuti kunnikaim ni kabebeekaniko. Ao a na bane aomata n nooriko b'a bon ainen mataawa ngkoe. A kairiko oin am bure

³⁰aika a kam'araa nakon aei. Boni ngkoe are ko kaantaningaaki b'a ko na wene ni bure ma m'anen botannaomata ake tekorakina ma n taromauri aia bouannanti.

³¹Ko a tia n riki ni buakaka riki nakon tarim are te ikawai, ao ko na riai ni mooi man te m'angko are e kanoaaki n uniu.

³²Boni Ngai ae te UEA ae te Atua ae I angan tarim are te ikawai te m'angko ae e buubura ae e kaakanoa, ae e on n uniu. Ao ngkana ko mooi man te m'angko anne, ko na b'ainingareaki ma ni kamaamaaeaki.

³³N tokina ko na manging ao a na akea raoraom, i bukina b'a e on te m'angko anne n te kakamaaku ao te urub'ai.

³⁴Ma ko na nima kanoana ni kabane! Ao i mwiina, ko na kamaerikirika te m'angko ao ko na kamanenaa maibiibina ni korekorea iai b'aab'aam i bukin rawaawatan nanom. Bon aei au taeka Ngai ae te UEA ae te Atua.

³⁵Ko a tia ni katinanikuai raoi, ma ngaia ae, I berita b'a ko na katuaaeaki i bukin b'aai aika a rangi n ribaaki aika ko karaoi ngkai ainen mataawa ngkoe.

³⁶E taku te UEA: Etekiera, ae natin te aomata, e a roko te tai are ko a riai n tuanga iai Nei Oora ao Nei Oorib'a b'a a bure. Ko na kauringiia i bukin maiuia aika a buakaka! [26]

³⁷E a tia n aki kakaonimaki ngke a taromauri taiani bouannanti, ao a tia ni karaoa te bure n tiritiri ngke a karean oin natiia b'a aia angab'ai nakon taian bouannanti.

³⁸Ao tiaki ti anne te b'ai ae a karaoia. A kabuakaka au Tembora ao a aki karinea te Taabati.

³⁹A kabuakaka au Tembora ni bon te bong are a anga iai natiu b'a aia karea nakon taiani bouannanti!

⁴⁰A kanakoia aia tia uarongorongo n anai nanoia m'aane man taabo aika a raroa. Ao taari aika uoman aikai ngkana a roko m'aane aikai, a tebotebo ao a katokai karan mataia ao b'aai ni katamaroaa.

⁴¹A tekateka i aon kaintekateka aika maraurau, ao te taibora i mataia i bukin b'aan te oriwa ao te b'ai ni kaboiarara are Au b'ai.

⁴²E aki toki ni kakarongoa aia ruu ni b'anaaia te koraki ni manging aika a roko man te rereua. Mm'ane aikai, a anganganiia aine taian m'ae n roroa ao baunuea aika a tamaroa,

⁴³ao I namakinna b'a a rangi n tangiria ni kani wene ni bure m'aane aikai ma aine aikai, e ngae ngke a kua n aroia n riki b'a aineni mataawa.

⁴⁴Ni bon koauana, a ngae n okioki m'aane aikai ni wene ni bure ma Nei Oora ao Nei Oorib'a, taari ake uoman aika taani bure.

⁴⁵Ma n te bong teuana ane a na bukiniia aine aika uoman aikai n te tiritiri ao te aki kakaonimaki, i bukina ngke a bon reke n te bure.

⁴⁶Ma ngaia ae bon Ngai ae te UEA ae te Atua ae I taetae nakoia taari aika uoman aikai ni kaangai: N na ikotiia te koraki ni kakiriwe ae a na kabuakakaingkami ma ni kimoaingkami.

⁴⁷A na karebanaingkami n atiibu ni karokoa matemi ma ni korobitingkami; a na tiringiia natimi ao a na kabuoki ami auti nako.

⁴⁸N na kataraoa baangin te bure n aine ni mataawa mai aon te aba aei, b'a a aonga ni kauringaki aine n taabo nako b'a a na aki karaoa aron ae kam a tia ni karaoia.

⁴⁹Kam na katuaaeaki ngkai kam a tia n riki b'a aineni mataawa ao i bukin taromauriaia bouannanti, ao kam na ataia iai b'a bon te UEA Ngai ae te Atua.