Read Te B'aib'ara Etekiera 27 Bible Online

Etekiera 27 - Te B'aib'ara bible

Etekiera 27

¹E taku te UEA:

²Etekiera ae natin te aomata, ko na anenea te kuna ni mate i bukin Turo, [32]

³te kaawa are e kateaki i rarikin taari i bukin te kaboob'ai ma botannaomata ake a mena i mataniwiin taari. Ko na tuangiia kaain Turo aei te rongorongo mairou: Turo, ko kainikatonga i bukin nakoraoin tamaroam,

⁴ao arom n taua aron taari. Bon te kaibuke ngkoe ae e kabaaki raoi.

⁵A kabonganaa te kai are te tiira taani kaba man te Maunga are Oman ni karaoi iai taian kairababa tiiran Reb'anon i bukin karaoan taian aneang.

⁶A karaoaki okeni Batian b'a taian bwe, a koreaki m'aiangon Kubero i bukin aon te eke, are e a manga katamaroaaki ao ni kamawawaaki ni koron te ereb'anti.

⁷A kamanenai taian rinen aika tamaroa taani kateitei mai Aikubita i bukin taian ie, b'a aonga ni konaa aomata nako n nooringkami. E kabonganaaki te kunnikai ae e buru ma ae e beebo i bukin kanuuan te teeke.

⁸A bweenarina mm'aanen Titon ma Arewata ao a mm'aane ake a rangi ni m'aatai n te m'akuri bon taiani kaaben.

⁹A karaoa te onob'ai mm'aanen Keeb'ara aika a rabakau. A bane kaimoa man taabo nako ni boob'ai n am titoa nako ake n am matabaiawa.

¹⁰A kaaina am taanga ni buaka i taari tautian Bootia, Ruuta, ao Buta aika a ninikoria, ni kaawakiniko n taian otanga ma taian b'ara ni buaka, ma ni karikiko b'a te aomata ae e kakannato.

¹¹A roko am taan tei mai Arewata ao Tiritia, ao a taratara man taua nako m'anen Kammata. A katinei aia b'ai ni buaka i aon am oo nako, ao e rangi n tikiraoi.

¹²A iokinib'aia te tirewa, te biti, te tiin, ao te buange b'a am b'ai ni bob'ai nako ia taani bob'ai mai Taretiti maiaki.

¹³A iokinib'ai taian toro ao b'aai aika a karaoaki n te buraati kaain Kuriiti, kaain Tubara ao kaain Meketo,

¹⁴ao kaain Beta Tokarema a iokinib'ai taian aoti, ao taian miure.

¹⁵Ko bon karikirake naba ma kaain Roteti, ao aomata mani botannaomata ake a mena i mataniwiin taari a anganiko koron te ereb'anti ma kaai aika ebone b'a boon am b'ai ni kaboob'ai.

¹⁶Etom e iokinib'aia te b'ai ni katamaroa te atibu ae kiriin, te kunnikai ae e beebo, te kunnikai ae e manimaniaki, te rinen ae e tamaroa, te ane, ao taian ruube.

¹⁷E anganiko Iuta ma Iteraera aia kabanea n raoiroi n uita, ao kabanean raoiroin aia biiku, ana karewe te manibeeru, b'aan te oriwa, ao kaboiararaan te am'arake b'a boon am b'ai ni kaboob'ai.

¹⁸A noora te b'ai ae ko ana anga kaain Tamateko ao n uoti nakoim wain mai Erebon ao buraen te tiibu ma Taara.

¹⁹A iokinib'aia te biti ma kaboiararaan te am'arake I-Wetan ao I-Iawan ake i rarikin Utara.

²⁰A kaakanakoi nakoim te kaintekateka i aon te aoti aika taiani burangketi kaain Tetan,

²¹ao kaain Arabia ao taan tautaeka i Keta a iokinib'aia taian tiibuteteei, taian tiibu, ao taiani kooti.

²²A kaakanakoi nakoim b'aini kaboiararaan te am'arake aika a tamaroa, atiibu aika a kakaawaki, ao taiani koora b'a boon am b'ai ni kaboob'ai.

²³Ko bon karikirake naba ma taan kabob'ai man kaawa aika Aran, Kanne, Eten, Tieba, Atura, ao Kiremata,

²⁴ao a anganiko kunnikai aika a boobuaka, kunnikai aika a manimaniaki aika a beebo, b'ai n taewae, ao te roobu ae e matoatoa.

²⁵A uotaki aia b'ai ni kaboob'ai n taian kaibuke aika korakora nakon taabo nako akana a kan nako iai. Ti te bo ngkoe ma te kaibuke ae e onrake n taiani kaakoo aika a rawaawata

²⁶ao e borau i nanoni marawa, ma ko taerake n te angmainiku ae e nene.

²⁷A bane ni bua b'aai ni kabane ake a toka iai am kaako aika a kakaawaki, am kaimoa ma am taani kateitei, taan iokinib'ai ao tautia.

²⁸E na ongo te aba takaaruaia am kaimoa aika a b'ab'a mai aon mataniwiin taari.

²⁹A na bane ni kiitanaki taiani kaibuke; a na tei i mataniwiin taari taan bwenarina ao kaimoa ao taiani kaaben,

³⁰ma n tang n nanoangaiko. A na kaoti nanokawaakiia n taun atuiia n te baareka ao n rabinobino i nanon taiani mannang;

³¹a koromaraia ao a kunnikainiia n te kunnikai ae e mangaingai ngke a tabe n tang ni korakai.

³²A anenea te kuna ni mate ae e kaangai i nanon aia tai n rawaawata: “Turo, ko korakora riki nakon taiani kaawa nako. Ma ko a wene ngkai n aki kakarongoa i kabin marawa.

³³“A kukurei botannaomata ake a reke irouia am b'ai ni kaboob'ai; a rikirake ni kaub'ai taiani uea n taabo nako n am b'ai ni kaboob'ai aika a kakaawaki.

³⁴Ma ko a inako i kabin marawa, ma am kaako ao am kaimoa aika a uamaaenako.

³⁵A bane ni miimi aomata nako ake a maeka i mataniwiin taari n te rongorongo aei. A maaku aia taan tautaeka, ao e korobokiaki te maaku i aon ubuia.

³⁶A aki konaa ni kakoauaa taan iokinib'ai nako n te aonnaba n te b'ai ae a tia n riki. E kakamaaku matem, ao ko a nako n aki manga oki.”