Read Te B'aib'ara Etekiera 28 Bible Online

Etekiera 28 - Te B'aib'ara bible

Etekiera 28

¹E taku te UEA ae te Atua:

²Etekiera ae natin te aomata, ko na tuanga uean Turo [33] au taeka ae e kaangai: Ko rangi ni kainikatonga b'a ko iangoia b'a te atua ngkoe ao am kaintokanuea te kaawa ae Turo. Ane ko na taekinna b'a te atua ngkoe, ngke bon te aomata ngkoe.

³Ko taku n am iango b'a ko wanawana riki nakon Taniera [34] ma n atai b'aai ni kabane:

⁴E a tia ni karikiko b'a te kaub'ai wanawanam, b'a iai am auti ni b'aai aika a kaonaki n taian koora ma tirewa.

⁵Bon te tia karikirake ngkoe ae e rabakau ao te kabanea ni kaub'ai ngkoe, ma a tia ni kairiko kaub'aim nakon te kainikatonga!

⁶Ko kabotauko i bon iroum ma te atua, ma ngaia ae ngkai N nang karaoiko Ngai ae te UEA ae te Atua

⁷b'a konaia kairiribai aika a iowawa. A na urui am b'ai ni kabane ake ko karekei n am m'akuri korakora.

⁸A na tiringko kairiribai n te aro ni iowawa, ao e na riki taari b'a ruanimatem.

⁹Ko na bon teimatoa naba n taekinna b'a te atua ngkoe ngkana ko aitara ma aiam? A na buakaniko, ao ko na maraki kaanga aroia aomata tabem'aang.

¹⁰A na tiringko ianena, ao ko na mate ni mateia te koraki aika a aki taromauriai. Bon aei au taeka Ngai ae te UEA.

¹¹E taku te UEA:

¹²Etekiera ae natin te aomata, ko na anenea te kuna ni mate i bukin uean Turo [35] ao ko na tuangnga au taeka ae e kaangai: N te tai teuana, ko rangi n raoiroi, rabakau, ao ko rangi n taraa raoi.

¹³Ko maeka n te nne n aroka ao ko katokai i aom b'aai ni katamaroa aika a karaoaki n te atiibu ae e tamaroa ae e bati matana ao atiibu aika a tamaroa. A bane ni karaoaki n te koora ao a katauraoaki i bukim n te bong are ko bungiaki iai.

¹⁴I rinei baika a maiu ake iai baiia ni kiba b'a a teiakiniko ni mwengam i aon Au maunga are e tabu, ike ko nakonako i buakon atiibu aika a tamaroa aika a ura kaanga te ai.

¹⁵Ko rangi n raoiroi man te tai are ko bungiaki iai, ma tabeua te tai i mwiina ko a moanna ni karaoi b'aai aika a buakaka.

¹⁶Ko iokinib'ai ma botannaomata tabeman ao ko a rikirake ni iowawa ao ni buakaka. Ma ngaia are I kairoroiko b'a ko na kiitana Au maunga, ao baika a maiu aika iai baiia ni kiba ake a kakaawakiniko ake a manga kakioko nako man atiibu aika tamaroa.

¹⁷Kainikatonga n raoiroin taraam, ao e tanoata taekam b'a ko a moanna n tei ni baba. Ao bon anne bukina ngkai I kab'akako nako aon te tano ma ni kariaia uea tabem'aang b'a a na kakanikoko.

¹⁸Ko a tia ni kam'aneia taan iokinib'ai aika a m'aiti ake tekorakina n te aro are e a buakaka am tabo n taromauri. Ma ngaia are, I a kaurarakea am kaawa ae e buubura n te ai ma ni kab'aka. Ngkai a bane aomata n ti noora te mannang n te tabo are e tei iai ngkoa am kaawa ae e buubura,

¹⁹ao a kubanako aomatan botannaomata ake tabeua. E rangi ni kakamaaku katuaaeam, ao ko a mauna n aki manga oki.

²⁰E taku te UEA:

²¹Etekiera ae natin te aomata, ko na kabuakaka te kaawa ae e buubura are Titon[36]

²²ao tuangiia kaaina ni kaangai: Bon ami kairiribai Ngai ae te UEA ae te Atua! A na neboai aomata ngkana I katuaaingkami, ao a na nooria b'a I bon tabu.

²³N na kanakoa te aoraki ae e kamaamate b'a e na kamaunaingkami, ao N na kanakoia kairiribai b'a a na tauingkami ma n katobibingkami. A na tiringaki am aomata, ao ko na ataai b'a bon te UEA Ngai.

²⁴Ngkana e riki anne, ao ane a na aki manga iowawa kaawa akana i rarikin Iteraera aika a kabuakakaia ao a karikiia b'a a na namakinna b'a kaanga a mena ni katawanangin kaai aika kateketeke ma akanta. Ao a na ataai Iteraera b'a boni Ngai ae te UEA ae te Atua ae I karaoi baikai.

²⁵E taku te UEA ae te Atua: N te bong teuana N na ikotiia Iteraera mani botannaomata nako ake e uamaae nako i buakoia, ao a na bane n nooria botannaomata b'a I tabu. A na manga maeka riki Iteraera n te aba are I angan Au toro ngkoa are Iakob'a.

²⁶A na mano ao a na katei taian auti ma aia nne n aroka ni kureebe. A na aki manga reke n te kangaanga, b'a N na katuuaia aia kairiribai aika rangi n riiribaia. A na ataia Iteraera b'a bon aia UEA Ngai ao Atuaia.