Read Te B'aib'ara Etekiera 29 Bible Online

Etekiera 29 - Te B'aib'ara bible

Etekiera 29

¹Tebwiina te ririki i mwiin anaakin te Uea are Ieoiakin ao nikira ni kabane b'a taenikai nako B'aburon, ao E taetae te UEA nako iu ni katebwi ma uouan bongin te katebwina n nam'akaina.[37] E taku:

²Etekiera ae natin te aomata, ko na kabuakaka Uean Aikubita. Ko na tuangiia ma ana aomata

³Au taeka ae e kaangai: Uean Aikubita, ti te bo ngkoe ma te korokorotaire ae e wene i nanon te karaanga. Ko karaoa aron ae bon am b'ai te Naire ao ko karaoia bon i bukim. Ma ngkai I a riki b'a ami kairiribai Ngai te UEA ae te Atua!

⁴N na kaaki te matau i nanon m'angaim ao N na katikiko ni kaotinakoko mai nanon te ran, ao a na bane n nim ikan am karaanga ma rab'atam ae inaina.

⁵N na karenakoko ma taian ika nako nanon te rereua, ao e na b'aka rab'atam i aon te tano ae e matoatoa. Ko na tiku n aki taunaki, ao a na kana irikon rab'atam maan aika a aki manana ma mannikiba.

⁶Ao i mwiina, a na ataia kaain Aikubita ni kabane b'a bon te UEA Ngai. Ko rawa ngkoe ma am botannaomata ni buokiia Iteraera ao bon ti te bo ngkoe ma te m'akoro ni kai ae e m'aotoua.

⁷Ngke a kaaenakoi baiia b'a a na kakaaea buokaia mairoum, ao ngkoe ko kam'aotoua nakon uam'akoro, ma n korei anganibaiia ma ni kab'akaia.

⁸Ma ngaia ae N na kanakoa te taanga ni buaka Ngai ae te UEA ae te Atua b'a e na buakaniko, ngkoe ae uean Aikubita. A na tiringiia am aomata ma am man,

⁹ni karokoa e rereua abam. Ao i mwiina, ko na ataia b'a I karaoi baikai. Ko taekinna b'a ko karaoa te Karaanga are te Naire man taua arona.

¹⁰Ngkai I a eekinakoko ma am karaanga. E na akea boonganan am botannaomata ao e na riki b'a te aba ae akea uaana ni moa man kaawan Miketora i meaang nako Atiwan i maiaki, ni karokoa tian Itiobia.

¹¹E na bon akea naba aomata ke te man ae e na kataia ni m'ananga nako Aikubita, i bukina b'a akea kanikinaean te maiu iai i nanon abwi te ririki.

¹²E na riki b'a te aba ae te kabanea n akea kain aona n te aonnaba aei. A na bane n uruaki kaawan nako Aikubita i nanon te abwi n ririki akanne, ao N na kamaaea nakoia am aomata nakoia bootanaomatan nako te aonnaba.

¹³Ao ngkana a bane ririki aika a abwii aikai, N na manga kaokiia am aomata man taabo ake I kauamaenakoia iai.

¹⁴A na manga maeka riki i nanon oin abaia i Aikubita. Ma a na riki b'a te abanuea ae e mamaara

¹⁵ao a na aki manga korakora n tautaekana te botannaomata, n aroia are rimoa.

¹⁶A na aki manga onimaki au botannaomata ae Iteraera i aon am botannaomata. Ni koauana, ngkana a ururing Iteraera ni uringa te b'ai are e riki ngkoa nakon Aikubita, ao a na bae n namakina aia kaairua ngke a rairaki nakoim ni kakaaea buokaia. Ao i mwiina, a na ataia Iteraera b'a boni Ngai are te UEA ae te Atua ae I karaoi baikai.

¹⁷Uabwi ma itiua te ririki i mwiin anaakin te Uea are Ieoiakin ma nikira ni kabane b'a taenikai nako B'aburon, ao E taetae te UEA nako iu ni moanibongin te moan nam'akaina. E taku: [38]

¹⁸E a tia ni buakana te kaawa ae e buubura are Turo Uean B'aburon are Nebukaneta. E kairoroia ana tautia b'a a na uoti uotaia aika a rawaawata n te aro are a mm'aa nako iran atuuia ni mara, ao a uraura aon angaia ma ni maneka. A bon aki konaa naba n taua te kaawa are e buubura arei Nebukaneta ma ana taanga ni buaka.

¹⁹Ma ngaia ae ngkai N nang anga bootanaomatan Aikubita nakoim. E na anai kaub'ain Aikubita aika kakaawaki ma n anga nakoia ana taanga ni buaka nako.

²⁰E na riki Aikubita b'a kaniwangana, i bukina ngke e a tia n iri au babaaire ngaia ma ana taanga ni buaka. Bon aei au taeka Ngai ae te UEA ae te Atua.

²¹Etekiera, ngkana e taenikai Aikubita, N na manga kakorakoraia Iteraera, ao N na anganiko te m'aaka n taetae nakoia. Ao ane ko na ataai iai b'a boni Ngai ae te UEA ae I karaoi baikai.