Read Te B'aib'ara Etekiera 32 Bible Online

Etekiera 32 - Te B'aib'ara bible

Etekiera 32

¹Tebwi ma uoua te ririki i mwiin kairakin te Uea are Ieoiakin ma nikiraia ara koraki b'a taenikai nako B'aburon, ao E taetae te UEA nako iu ni moanibongin te katebwi ma uoua n nam'akaina.[42] E taku:

²Etekiera ae natin te aomata, ko na kabuakaka uean Aikubita ao tuangnga te b'ai ae I taekinna: Ko karaoa aron te raian n aiwaa ni m'aninga nako n te aonnaba; ma bon akea manenam n ai aron te korokorotaire i nanon te karaanga, n rairairaki i nanon te bokaboka ma waem.

³Uean Aikubita ko na ongora irou. Bon te UEA Ngai ae te Atua, ae N na m'aneiko n au karaun ao N na karaoia te koraki n ianena b'a a na uaakiniko nako mataniwiin taari.

⁴N na karenakoko nako nanon te tawaana ae e mataata, ike a na roko mannikiba ao maan nako ni kana rab'atam.

⁵N na kamaaenikuna rab'atam ngkana e a buakaka i aon taiani maunga ao i nanon m'arua,

⁶ao e na raanga nako rab'atam i aon te aba ma ni kaon taian raanga n ran.

⁷N na kaona karawa ni kabutaa ma taian itoi n taian nang aika a matenten, b'a a aonga n toki ootan taai ma nam'akaina.

⁸E na riki n roroo taiani karawa, ma ni karootongitonga abami. Bon aei au taeka Ngai ae te UEA.

⁹A na tiaoki ianena aika ko tuai man ongongo taekaia ngkana I taekinna nakoia aron kamaunakim Irou.

¹⁰Ane a na maaku, ao ngkana I karaaitia au kabaang n tokanikai n te bong are ko na mate iai, ao e na ruru ni maaku aia uea n te b'ai ae e nang riki nakoia.

¹¹E na roko uean B'aburon ni buakaniko, ngkoe uean Aikubita!

¹²A na tiringaki am tautia irouia te taanga ni buaka aika taani iowawa n te aonnaba, ao a na bane ni kamanatuaaki b'aai nako ake ko karekei n te baabakanikawai.

¹³N na tiring ami nanai ni kao aika a am'arake i rarikin te karaanga, [43] ao bon akea te aomata ke taian man aika a na tiku ni kamantoaa ranna.

¹⁴E na itiaki te ran, ao a na rau taian raanga n ran. Bon aei au taeka Ngai ae te UEA ae te Atua.

¹⁵E na riki Aikubita b'a te aba ae akea kain aona ae akea manenana, ao bon akea te b'ai teuana ae e maiu ae e na konaa ni manga maiu ikekei. Ao ane ko na ataia ma am aomata b'a bon te UEA Ngai.

¹⁶Bon anne te kauring nakoim, ao e na kamanenaaki b'a te anene ni mate irouia aine ianena i bukin te b'aeb'aeti i bukiia am aomata. Bon aei au taeka Ngai ae te UEA ae te Atua.

¹⁷E taku te UEA ni katebwi ma nimauan te nam'akaina naba anne:

¹⁸Etekiera ae natin te aomata, ko na tanginiwenei i bukiia kaain Aikubita ao kabuakakaia nakon aia aonnaba maate, ike a na taunaki iai i rarikiia aomata mani botannaomata ake tabeua ake a korakora.

¹⁹Ko na kaangai nakoia: Ko na bae n tamaroa riki nakoia aomatan botannaomata ake tabeua, ma ko na bon mate naba ma n raoniia koraki ake akea atuaia n te aonnaba are inano.

²⁰Ko aki konaa ni birinako! E tauraoi aia kabaang kairiribai n tiringingkami ni kabane.

²¹A na rangi ni kukurei ni butim'aiko ma taan raoniko n te buaka taan kairiiri aika a ninikoria ake a mate i nanon te buaka nako abaia maate.

²²Ake a mena naba ikekei Aturia, ma taian ruanimate ni katobibia. A na bane n tiringaki n te buaka, [44]

²³ao a mena ruanimateia ni m'akoron abaia maate are e rangi n nano. A na bane ni b'aka ana tautia ni kabane n te buaka, ao e na katobibiaki n ruanimatena are n te nangananga ni b'aa. Bon taan kakamaakuia ngkoa aomata ngaiia n abaia ake a maiu.

²⁴“E mena ikekei Aram, ma ana tautia ni katobibia. A bane ni mate n te buaka, ao a b'aka rikaaki, n aki korotabonim'aneaki, nakon abaia maate. Ngke a mena ngkoa n te maiu a kabutanakoa te maaku, ma ngkai a wene ni mate ma ni kab'ainrangaki.

²⁵E wene Eram i rarikiia ake a mate n te buaka, ao e katobibiaki n ruanimateia ana tautia. A bane n tuai korotabonimm'aaneaki, a bane ni mate n te buaka. A kabutanakoa te maaku ngke a maiu ngkoa, ma ngkai a wene ni mate ma ni kab'ainrangaki, ma n uataboa katauaia koraki ake a mate n te buaka.

²⁶A mena ikekei ruanimateia tautia mai Meteka ao Tubara.

²⁷E aki reke nakoia te taunaki ae e riai n aroia koraki aika a kakannato ni bong ake ngkoa, ake a taunaki ma aia kabaang i aan atuuia ma aia otanga i aon rab'ataia. Aikai aomata aika a kakannato ake a karekea te biu irouia aia kairiribai.

²⁸Kam na konaaki buaka kaain Aikubita ao kam na taunaki i rarikiia tautia aika akea atuaia ake a mate n te buaka.

²⁹A mena ikekei ruanimateia uea ma taani kairiiri mai Etom. A korakora n aia tai. Ngkai a taunaki i abaia maate i rarikiia tautia ake akea atuaia ake a mate n buaka.

³⁰A mena ikekei ruanimateia taan tautaeka mai meaang,[45] ao ai uana naba ma kaain Titon. A kakamaaku ngkoa aia taanga ni buaka ae e korakora. Ma ngkai a wene n taunaki i abaia maate, ike a kab'ainrangaki iai n ai aroia tautia ake tabem'aang ake a mate n te buaka.

³¹Boni Ngai ae te UEA ae te Atua ae I taekina ae e kaangai: Ngkana e noori ruanimate aikai ni kabane ami uea are uean Aikubita, ao e na kukurei ma ana tautia b'a tiaki ti ngaiia n rawaawata.

³²I kanakoa nakoia aomata aika a kakamaaku ni kabutaa te aonnaba. Ma a na tiringaki ma tautia ma n taunaki i rarikiia tautia ake akea atuaia i abaia maate. Bon aei au taeka Ngai ae te UEA ae te Atua.