Read Te B'aib'ara Etekiera 34 Bible Online

Etekiera 34 - Te B'aib'ara bible

Etekiera 34

¹E taku te UEA:

²Etekiera ae natin te aomata, ti te bo taan kairiiri i Iteraera ma taan kaawakin tiibu aika a kaawakiniia au tiibu, aika Iteraera. Ma I tangiriko b'a ko na kabuaakakaia taani kairiiri aikai ma ni kaangai nakoia: Boni Ngai ae te UEA ae I kaangai, E a roko te kaangaanga i aomi taan kairiiri i Iteraera! Kam bon iangoi aromi i bon iroumi ao kam kaaki taekaia Au tiibu.

³Kam nim aia miriki ao kam kabonganai buraeia b'a ami kunnikai. Ao i mwiina, kam tiringiia ake kabanea n tamaroa b'a kanami. Ma kam bon aki tararuaia maan!

⁴Kam aki roko n te kaawakiniia aika a mamaara ke ni kamaiuia aika a aoraki ke ni bauti ikoakiia aika a ikoaki. Kam kairiia mani katiotionakoia ao kam aki roko n te kakaaia aika a m'arua. Kam iowawa ao kam aki raoiroi nakoia Au tiibu.

⁵Ai ngaia are, a maaenako nakon taabo nako, ao a buakanaki mani kanaki irouia maan aika a aki manana.

⁶Ma ngaia are, a maaenako au tiibu ni kabutaa te aonnaba. A tiotio nako i aon tabuki ma maunga, ao bon akea temanna ae e tabeakiniia ni kakaaia.

⁷Ngkai, kam na ongora ngkami aika taani kaawakin tiibu nakon te b'ai ae N na taekinna Ngai ae te UEA nakoimi.

⁸Ngkai I bon maiu Ngai ae te UEA ae te Atua, ao e raoiroi riki ngkana kam ongora Irou. A tia n aki karauaki Au tiibu irouia maan aika a aki manana ake a bon tiringiia ma ni kaniia i bukina b'a akea te tia kaawakin tiibu. A bon aki kani kakaaia tiibu Au tia kaawakin tiibu. A bon iangoi aroia i bon irouia ao tiaki tiibu.

⁹Ma ngaia ae kam na ongora Irou ngkami aika taani kaawakin tiibu.

¹⁰I katanoataa b'a ai Au kairiribai ngkami taani kaawakin tiibu Ngai ae te UEA. N na anaia Au tiibu mairoumi ao N na aki manga kariaingkami b'a kam na riki b'a aia taani kawakin tiibu; ao N na bon aki naba kariaia b'a kam na manga iangoi aromi i bon iroumi. N na kamaiuia Au tiibu mairoumi ma n aki kariaingkami b'a kam na kang.

¹¹I tuangkami Ngai ae te UEA b'a N nang bon kaawakiniia Au tiibu ma n tararuaia

¹²n aroia taani kawakin tiibu ngkana a kaawakiniia aia tiibu ake a maae nako ma ni manga kaokiia. A tia ni bua Au tiibu man te bong are e rootongitong are e kananokawaki ngke a maae nako i buakoia botannaomata. [48] Ma N na kamaiuia

¹³ma ni kaokiia man aia botannaomata ianena ake a maeka iai. N na riki b'a aia tia kawakin tiibu ao N na kaam'arakeia i aon aia maunga nako Iteraera ao i nanon taiani m'arua ao taawana aika a maiu reirei.

¹⁴A na manoraoi ngkana a am'arake n taabo ni uteute aika a maiu reirei ao tabuki aika a mawaawa.

¹⁵I berita b'a N na tararuaia ma ni kaawakiniia b'a a na aki reke n te kangaanga,

¹⁶ma ni kakaaia ake a bua ma ni kaokiia ake a tiotio nako, ma ni bauti ikoakiia ake a ikoaki, ao n tararuai maiuia aika a mamaara. N na boni kamateia naba aika a marikarika ao a korakora, i bukina b'a I kakaaraoa ae e raoiroi n taai nako.

¹⁷E taku te UEA ae te Atua nakoia Ana tiibu, aika Iteraera: N na tararuai raoi ngkami n tatabemaningkami nako ni kakaaea b'a antai te tiibu ae e korakora ao aika a mamaara.

¹⁸Tabeman maibuakomi a kang uteute aika manguroroo, ao i mwiina, a toubekai nikiraia ngkana a ngae. Tabeman a mooi n te ran ae e itiaki, ao i mwiina, a nakonako i nanon te ran ni kamantoaa ao ni kabokaboka nikirana.

¹⁹Are nanona b'a e aki reke kanaia ke nimaia Au tiibu ake tekorakina.

²⁰Ma ngaia ae N na kakaokoroia aika a korakora ma aika a mamaara Ngaia ae te UEA ae te Atua.

²¹Kam a tia ni kamanenai koromi aika a korakora ngkami aika kam korakora ni kakioia nako aika a mamaara,

²²ma N na kamaiuia ao e na aki manga karaoaki ae e aki raoiroi nakoia. N na kaokoroia aika a raoiroi ma aika a buakaka.

²³I mwiin anne, N na karekea ami tia kaawakin tiibu man te utu are ana toro te Uea are Tawita. A na kaai n reke ami tia kaawakin tiibu ae ti temanna ngkami aika kam korakora ma aika kam mamaara, ao e na kaawakiningkami raoi.

²⁴E na riki b'a ami tia kairiiri, ao N na riki b'a Atuami. Bon aei au taeka Ngai ae te UEA.

²⁵Bon Au tiibu te botannaomata ae Iteraera, ao I karaoa Au berita ae e matoa b'a a na maeka ma te rau. N na kakionakoia maan aika a aki manana man te rereua ao te buakonikai, b'a aonga n aki maaku Au tiibu.

²⁶A na maeka ni katobibia Au maunga are e tabu, ao N na kakab'aiaia ni karokoa te karau ae e korakora [49]

²⁷b'a e na buokiia ni karekei uaan arokaia ma ni karekei aia uita. N na kainaomataia man te tautoronaki ao N na karikiia b'a a na maeka n oin abaia n akea aia kangaanga. Ao i mwiina, a na ataia b'a bon te UEA Ngai.

²⁸A na aki manga kimoaaki irouia botannaomata aika ianena, ao a na aki manga tiringaki ni kanaki irouia maan aika a aki manana.

²⁹N na karika aia tawaana b'a a na kariki taiani uita aika a m'aiti, b'a a aonga n aki manga baki ke ni ngareakinaki irouia ianena.

³⁰Ao ane a na bane n ataai aia aomata nako b'a I kaawakiniia Au aomata aika Iteraera. Bon aei Au berita Ngai ae te UEA.

³¹Bon Au tiibu ngaiia; ao Ngai Atuaia, ao boni Ngai ae I kaawakiniia.