Read Te B'aib'ara Etekiera 35 Bible Online

Etekiera 35 - Te B'aib'ara bible

Etekiera 35

¹E taku te UEA:

²Etekiera ae natin te aomata, ko na kabuaakakaia kaain Etom

³ao ko na kaangai nakoia: I a riki Ngai ae te UEA ae te Atua b'a ami kairiribai ngkai! Ao N na onika ami botannaomata nakon te aba ae akea manenana ae akea kanoana,

⁴ao kam na kiitan ami kaawa aika a buubura n urubekebeke. E na riki abami b'a te rereua, ao ane kam na ataai iai b'a bon te UEA Ngai.

⁵Kaain Etom, kam aki ti riki b'a ana kairiribai Iteraera n te tai ae e maan, ma kam bon tarataraia naba ngkana a kamaunaaki nako aomatana n te kabuanib'ai i bukin aia bure nako.

⁶Ma ngaia ae ngkai bon te UEA ae te Atua Ngai ae I maiu, ao ko reke n te bure n tiritiri ao ko bon riai n tiringaki.

⁷N na tiringiia am botannaomata ni kabane akana a nakonako i nanona.

⁸A na onrake aon am maunga ao e na onrake nanon am m'arua nako.

⁹ao e na wene n uruaki abam n aki toki. Bon akea temanna ae na manga maeka riki i nanon am kaawa nako. Kam na ataia b'a bon te UEA Ngai.

¹⁰Kam taku b'a ami b'ai te botannaomata ae Iuta ao Iteraera, ao ko konaa n taua taekan abaia. Ma bon Atuaia Ngai,

¹¹ao ngkai I bon maiu, N na katuaaeko i bukin karaoan ae e aki raoiroi nakoia Au aomata ngke ko un nakoia ao ko ribaia. Ao ane a na ataia b'a boni Ngai ae te UEA ae I katuaaeko!

¹²Ao ane ko na ataia n tokina b'a I ataia ae I ongo ngarem ngke a uruakaki ao ko taku b'a am b'ai abaia ae ko na anaia.

¹³Ko bon kamatauningaai naba, ma I ongo ni kabane.

¹⁴A na bane ni karaoa aia bootaki ni kukurei aomata n te aonnaba ngkana I kamaunanakoko,

¹⁵n arom naba ngke ko karaoa am bootaki ni kukurei ngke e kamaunaaki Iteraera. E na riki n akea manenan am botannaomata ae Etom b'a e na riki b'a te aba ae akea manenana. Ao ane ko na ataia iai b'a bon te UEA Ngai.