Read Te B'aib'ara Etekiera 37 Bible Online

Etekiera 37 - Te B'aib'ara bible

Etekiera 37

¹Tabeua te tai i mwiina, I a manga namakina m'aakan te UEA b'a e niniai, ao E uotai nako Tamneina nakon te m'arua ae e onrake n taian rii.

²E kaneweabaai te UEA iai, ao I noori taian rii aika a m'au n raea n taabo nako.

³Ao E taku, “Etekiera ae natin te aomata, a na konaa ni manga maiu taian rii aikai?” Ao I kaeka, “Bon ti Ngkoe te UEA ae te Atua ae Ko konaa ni kaeka anne.”

⁴Ao i mwiina e tuangai b'a N na taetae ni kaangai: Taian rii aika kam m'au, kam na ongora nakon ana taeka te UEA nakoimi,

⁵N na ikeike nako aomi Ngai ae te UEA ae te Atua, ao kam na manga maiu.

⁶N na kabutaa n rabuningkami n taian iia ao te kun ao N na uka te ike ni maiu nakoimi. Ao i mwiina, kam na ataai iai b'a bon te UEA Ngai.”

⁷Ao I karaoa te b'ai are E tuangai te UEA, ma i m'aain banen au taeka, I ongo taian keruaatai. A manga toma taian rii!

⁸I noori taian iia ao te kun n rabuna te rii, ma bon akea te maiu i nanoia.

⁹Ao i mwiina, E taku te UEA: Etekiera, ko na kaangai ngkai nakon te ang, “E tuangko te UEA b'a ko na uki man taabo nako ao ko na uka te ikeike ni maiu nakon taian rab'ata aika a mate aikai, b'a aonga ni manga maiu.”

¹⁰I mwiin taekinan arei, ao e a uki naba te ang nakon taian rab'ata akekei, ao a manga maiu! A bane n teirake, ao e bon m'aiti aia koraki n te aro are a konaa ni katea te taanga ni buaka ae e korakora.

¹¹Ao E taku te UEA: Etekiera, ti te bo Iteraera ma taian rii aika a mate. A ngurengure b'a a m'au n te aro are akea kaantaningaan boong aika a na roko irouia.

¹²Ma ngaia ae ko na tuangiia ni kaangai, “I berita Ngai ae te UEA ae te Atua, b'a N na kauki taian ruanimate ma ni kainaomataingkami. N na manga kaokingkami nako Iteraera,

¹³ao kam na ataia b'a te UEA Ngai ngkana e koro bukin anne.

¹⁴E na anganingkami Tamneiu te ikeike, ao kam na manga maiu. N na kaokingkami nakon mwengami, ao kam na ataia iai b'a I kaawakina Au berita. Bon aei Au taeka Ngai ae te UEA.

¹⁵E taku te UEA:

¹⁶Etekiera ae natin te aomata, anaa te kai ao korea i aona ae e kaangai, “Te abanuea are Iuta.” I mwiina, ko na anaa te kai riki teuana ao korea i aona ae e kaangai, “Te abanuea are Iteraera.”

¹⁷Ko na taui kaai aika uoua aikai tabon are teaina n tomaia ma tabon are teaina, n te aro ae kaanga ai aron ae ti teaina te kai.

¹⁸Ao ngkana a titirakiniko aomata b'a tera nanona,

¹⁹ao tuangiia b'a N na manga tomai n ti teuana kain Iteraera ma kain Iuta. N na taui n ti teuana i nanoni baiu, ao a na riki n ti teuana.

²⁰Ko na taui kaai aikai n te aro are e ko na nooraki irouia aomata nako.

²¹ao i mwiina, ko na kaangai: N na manga ikotiia Iteraera ma ni kaokiia nakon mwengaia mairouia botannaomata ianena ake a maeka iai ngkai.

²²N na karikiia b'a te botannaomata ae ti teuana ao N na manga kamaekaia n te aba are Iteraera, A na tautaekanaki iroun te uea ae ti temanna, ao a na aki manga tib'auaaki nakon uoua te botannaomata.

²³A na aki manga taromaurii taian bouannanti ma ni karaoi m'akuri aika I aki kukurei iai. N na teboki aia bure ni kanakoi ma ni kaitiakiia, ao N na kaawakiniia man b'aai nako aika a na kam'araa iai. A na riki b'a Au aomata. ao N na riki b'a Atuaia.

²⁴E na uea i aoia temanna ae e nako mairoun Au toro are Tawita. A na bane n ikotaki i aan temanna te tia tautaeka ao a na ongotaeka nakon au Tua nako.

²⁵A na maeka ma aia kariki n te aba are I angan Au toro are Iakob'a, te aba are a maeka iai aia bakatibu. A na maeka ikekei n aki toki, ao ai uana naba ma natiia ma aia kariki nako. E na uea i aoia te aomata ae ai aron au toro are Tawita n aki toki.

²⁶I berita raoi b'a N na kakab'aiaia Iteraera n te rau ae akea tokina. N na kakawakiniia ma ni karikiia b'a te botannaomata ae e korakora. E na tei au Tembora i aon Iteraera n taai nako,

²⁷ao N na maeka i buakoia Au aomata ao N na riki b'a Atuaia.

²⁸A na bane n ataia botannaomata n te aonnaba ae e mena au Tembora i Iteraera ao I a tia n rineia Iteraera b'a Au aomata.