Read Te B'aib'ara Etekiera 43 Bible Online

Etekiera 43 - Te B'aib'ara bible

Etekiera 43

¹E kairai te m'aane arei nakon mataroan te Tembora are mai mainiku,

²ike I a noora iai raneanean mimitongin Atuaia Iteraera, ae e roko mai mainiku. Ti te bo korakoran te tang are I ongo ma rurungaan naoni marawa, ao a bane n raneanea b'aai nako ake i rarikina n raitiitin ootan mimitongina.

³Ti te bo te mii arei ma are I nooria ngkoa ngke E roko te Atua n urua Ierutarem, ao ti te boo naba ma are I nooria i rarikin te Karaanga are Keeb'ara. I enikuri ni bobaraaki ni kabooa matau ma aontano,

⁴ao E roko mimitongin te UEA man te mataroa are mai mainiku ma n rin i nanon te Tembora.[53]

⁵E kateirakeai Tamnein te UEA, ao e uotai nakon katawanangin te Tembora, ike I a nooria iai b'a ngaia E a kaona nanon te Tembora mimitongin te UEA.

⁶E tei te m'aane arei i rarikiu, ao I ongo Ana taeka te UEA mai nanon te Tembora.

⁷Etekiera ae natin te aomata, bon Au kaintokanuea te Tembora i aon te aba. N na maeka i buakoia Iteraera ikai n aki toki. A na aki manga oki ni kamatauningaai ngaiia ma aia uea n taromauri taian bouannanti ni baangotan te aba ke ni katei taian kanuringa i bukiia aia uea aika a tia ni mate.

⁸A katei aia bareti uean Iteraera ni katenaia ma au Tembora ae e tabu n te aro are ti te bo marenaia ma Ngai. Ao i mwiina, a kamatauningaai n aia m'akuri aika a buakaka, ao I kamaunaia ni korakoran uniu.

⁹Ma ngkana a katoka taromauriaia anti tabem'aang ma n urui aia kanuringa aomata ma aia uea, ao N na maeka i buakoia n aki toki.

¹⁰E riai ni katuaeaki n te mamaa Iteraera i bukin karaoan te bure nako iu, ma ngaia are, kona tuangiia taekan au Tembora are e tabu. Kariaia b'a a na iangoia,

¹¹ma ngkana a bon raraoma n aia bure, ao ko na kab'arab'araa nakoia tamnein ao tein te Tembora, taian mataroa, baairean karaoana, ao baairean nnen taiani kateitei. Ko na kab'arab'arai taian tua i bukin te taromauri ikekei, ao i mwiina, ko na korei taekan baikai, b'a aonga ni konaa ni kamateb'aii ma n ongotaeka nako iai.

¹²A na riai ni katabuaki te tabo are e mena iai te Tembora i aon te maunga are e tabu! Bon aei te kabanea ni kakawaki n tua i bukin te Tembora.

¹³Ni kaineti ma te kainibaaire are e b'ainaki n te Tembora, e na riai ni karaoaki te baonikarea n aron aei: e na iai te kainikawawaa ni katobibia oina ae nimabwi te mirimiita rababana ao nimabwi te tientemiita nanona, ao uabwi ma nimaua te tientemiita m'aoton mataniwiina are mai tinaniku.

¹⁴Iteran te baonikarea are te kabanea n rinano, mai tabona mai eta ni karokoa oina bon teuana te miita rietana. M'akorona are i eta riki, e a manga koerikaaki buuburana ni katobibiia n te m'aiti ae nimabwi te mirimiita ni katobibia, ao rietana ae uoua te miita. Te m'akoro riki are i mwiina, e a manga koerikaaki naba man taubukin are te kauoua ni m'akoro n te m'aiti ae nimabwi naba te mirimiita ni katobibia.

¹⁵Te kabanea ni m'akoro mai eta, are e kakabuokaki iai taiani karea, bon uoua naba te miita rietana. A rietaata riki korona ake ni koonana ake aua nakon tabona ni kabane.

¹⁶E b'aoki taubukin te baonikarea, b'a onoua te miita n iterana nako.

¹⁷E bon b'aoki naba m'akorona are mai nuuka, 7 te miita n iterana n tatabeua nako, ma mataniwiina mai tinaniku ae 25 te mirimiita rietana. (Kainikawawaana bon 50 te miirimiita rababana.) E mena kaintam'araken te baonikarea man iterana are mainiku.

¹⁸E taku te UEA ae te Atua nako iu: Etekiera ae natin te aomata, ngkana e tia karaoan te baonikarea, ao e na manga katabuaki n anga te aba taiani karea i aona ao n tatauriaki aona n te raraa. Aio te b'ai ae ko na karaoia:

¹⁹Bon ti ibonga ake man te baronga are Rewi man ana utu Tatoka are te ibonga aika ana m'akuri n au Tembora; bon au Tua aei. Ma ngaia ae kam na anganiia te kaom'aane te teei b'a a na tiringnga b'a te karea i bukin aia bure.

²⁰Anaa tabeua raraan taiani man ao kabira iai koonan te baonikarea ake aua, ao tabeua i aon koonan m'akoron te baonikarea are mai nuuka, ao tabeua riki ni katobibia mataniwiina. E na kaitiaka te baonikarea te b'ai anne b'a e aonga n tau i bukin te angakarea nako iu.

²¹Ao i mwiina, ko na anaa rab'atan te kaom'aane nako tinanikun te tabo are e mena iai Tembora ao kabuokia n te tabo ae a tia ni katauaki.

²²N te bong are i mwiina, e na kareanaki te kooti ae akea buakakan rab'atana b'a te karea i bukin te bure. Ko na kaitiaka te baonikarea n raraana, n aron are ko karaoia naba n raraan te kaom'aane.

²³Ao i mwiina, ko na rinea te kaom'aane te teei ao te tiibu m'aane ae te teei aika a akea buakakan rab'ataia,

²⁴ao uotiia nakon au Tembora. E na kamraraa te taoro te ibonga i aoia ao e na anga b'a te karea are kakukureiau.

²⁵Kam na riai n anga te kooti, te kaom'aane ao te tiibu te m'aane ni katoa bong i nanon boong akana itibong akana i mwiina. A na akea toabuakan rab'atan taiani man aikai.

²⁶A na kaitiaka te baonikarea ibonga i nanon boong aikai, b'a e aonga n tau ni kamanenaaki i buku ma ni manga tauraoi nakon te kabonganaaki.

²⁷Ao mai i mwiin te tai anne, a na kabonganaa te baonikarea aei ibonga n anga te karea are kakukureiau ao te karea i bukin te buubuti Au kakab'aia. Ao ane N na kukurei irouia Iteraera. Bon aei Au taeka Ngai ae te UEA ae te Atua.