Read Te B'aib'ara Etekiera 45 Bible Online

Etekiera 45 - Te B'aib'ara bible

Etekiera 45

¹Ngkana e tib'aaki te aba ae Iteraera nakoia baronga ake tebwi ma uoua, ko na katuka te tabo are Au b'ai. E na riai n 12.5 te kiromiita ab'akina ao 10 te kiromiita rababana.

²E na riai ni mena te Tembora n te m'akoro n aba ae 255 te miita ab'akina ma rababana, ao e na riai ni katobibiaki te Tembora anne n te tabo ae e uki ae 25 te miita warebwena.

³N na anga iteran te tabo aei, tebwi ma uoua ao te iterana te kiromiita ab'akina ao nimaua te miita rababana, ae na nako mai iai, are e na mena iai te Tembora, te tabo are e rangi n tabu.

⁴E na riki b'a m'akoron te aba aei ae e tabu, ae e kaokoroaki i bukiia ibonga ake a m'akuri i nanon ana Tembora. A na tei naba iai taian auti ao te m'aake ike e tei iai te Tembora.

⁵N na anga iteran abau are te iterana nakoia kanoan Rewi ake a m'akuri n au Tembora, ao taiani kaawa ake a na maeka iai ikekei.

⁶I rarikin abau ae e tabu bon te tabo ae 12.5 te kiromiita ab'akina ao 3 te kiromiita rababana. E na b'ainaki aei irouia Iteraera ao e na reke naba iai te kaawa are Ierutarem.

⁷E na riai ni kaokoroaki te aba i bukiia taan tautaeka. Ni moa man tian te tabo are e tabu are i maeao ao e reitinako ni wairio nakon Taari are te Mereterenian, ao i marenan tian abau mai maeao ma Taari are te Mereterenian, ao marenan tian abau are mai mainiku ma te Karaanga are te Ioretan. Are nanona ab'akin te aba aei bon ti te bo ab'akina ma taiani m'akoro n aba ake a anganaki barongan Iteraera.

⁸E na riki te tabo aei b'a tib'an te tia tautaeka n abaia Iteraera, b'a e aonga n aki manga karawaawataia aomata, ma e na anga nikiran te aba nakoia barongan nako Iteraera.

⁹E taku te UEA ae te Atua: Kam a tia ngkami aika taan tautaeka i Iteraera, e a bati n tau kimoaia ma keweia Au aomata! I tangiringkami b'a kam na katoka karaoan te bure ao kam na moana karaoan te raoiroi ma te eti. Kam na aki manga oki ni kanakoia Au aomata ma te kairoro man oin abaia. Bon aei Au taeka Ngai ae te UEA.

¹⁰Ma ngaia ae, ma n te tai aei, kam na kaboonganai taian b'ai n tau rawaawata ao b'aini baaire n te ananau aika a eti.

¹¹E na b'ainaki te eba b'a te kainibaaire i bukin te m'aau, ao te bate b'a te kainibaaire i bukin te ran. Ao e na booraoi kanoaia ma oma oma, ae e booraoi ma tebwiina eba ke 10 te bate.[55]

¹²Te kainibaaire i bukin te rawaawata ae e na b'ainaki bon te tiekera.[56] Teuana Tiekera e na booraoi ma 20 kira (Kuraem), ma 60 Tiekera e boo raoi ma teuana mina.

¹³A na riai taani kairiiri i Iteraera ao aomata n uoti nakoim teuana te kaonobwi man aia tai n te uita b'a te angab'ai nakoim.

¹⁴A na riai naba n uota teuana te katebubua aia b'aa n oriwa. A na baaireaki baikai n te bate, ao 10 te bate ti te bo ma teuana te oma ke teuana kore.

¹⁵A na kamanenaaki taian angab'ai aikai b'a te karea are te uita, ao ai uana naba ma te karea are kakukureiau[57] ao koraki akana a buubuti Au kakab'aia. N na kukurei Ngai ae te UEA n taian karea aikai ao N na kab'arai aia bure Au aomata.

¹⁶A na uoti angab'ai aikai Iteraera nakoim.

¹⁷Ma kam na katauraoi maan ake taiani karea ngkami aika taan kairiiri i bukin te Toa ae Moan Otin Nam'akaina, taian Bootaki i bukin te Taabati, ao bootakin te aro ake tabeua, ao ai uana naba ma te uita ma te wain. A na bane ni kabonganaaki baikai i bukin taiani karea i bukin bure, te karea te uita, te karea are kakukureiau, ao nakoia akana a buubutiai Au kakab'aia. N na bon kukurei ao N na kab'araa aia bure Au aomata.

¹⁸E taku te UEA ae te Atua: E na riai ni kareanaki te kaoteteei ae akea toabuakan rab'atana b'a te karea i bukin kaitiakan te Tembora ni moanibongin te moan nam'akaina.

¹⁹E na anaa teuana te raraa te ibonga ma te karea aei ao e na taataauri iai bouan te Tembora, ao ai uana naba ma koonan te baonikarea ao bouan te mataroa n te kawai n rin nakon te katawanang are i nanona.

²⁰E na karaoaki naba te bootaki ae aron anne ni kaitiuan bongin te nam'akaina, b'a a aonga ni kab'araaki aia bure aomata aika a bure n tiaki aia kaantaninga ke n te aro ae a aki ataia, ao e aonga n teimatoa n itiaki au Tembora.

²¹E na moanaki mani kaabongin te moan nam'akaina, ao e na reiti nako i nanon itiua te bong, ao a na bane aomata ni bukamarua te Riao ma ni kana te kariki are e aki karikaki.

²²Ni moani bongina, e na uota te kao te tia tautaeka ao e na anga b'a te karea i bukin ana bure ao i bukin aia bure aomata.

²³E na uouoti itiman taian kao ao itiman taian tiibu m'aane b'a te karea are kakukureiau ni kabanea bongin te Toa, ao ai uana naba ma karea i bukin te bure. A na riai maan aikai n akea toabuakan rab'ataia.[58]

²⁴E na riai naba ni katauraoi 9 te kirokuraem te uita ao 3 te riita b'aan te oriwa ake kareanaki ma teaina te kao m'aane ao teaina te tiibu m'aane.

²⁵E na moanaki te Toa ae M'anganikaai ni katebwi ma nimauani bongin te kaitiua n nam'akaina, ao e na reiti nako i nanon itiua te bong. E na katoa bong te tia tautaeka ni kakatauraoa m'aitin te man n aron are e karaoia naba are n te Toa are Riao, ni kabane bongin te Toa aei, ao ai uana naba ma te m'aiti n uita ao b'aan te oriwa i bukin taiani karea. [59]