Read Te B'aib'ara Etekiera 47 Bible Online

Etekiera 47 - Te B'aib'ara bible

Etekiera 47

¹Ao e kairai te mm'aane arei rikaaki nakon te Tembora, ike I noora iai te raanga n ran ae e raanga i aan te kawai n rin. E moana raangana man iteran te Tembora are mai maiaki, ike e raanga mai iai ri rarikin te baonikarea ni waaki nako ni waerake i nanon te katawanang.

²Ti nakonako i nanon te tabo are e mena iai te Tembora i nanon te mataroa are meaang ao ti katobibia te mataroa are i mainiku. Ao I noora te raanga n ran ae e uarereke ae raanga ni waerake man iteran te mataroa are maiaki.

³Ao e nakonako te m'aane arei ni waerake, ao i mwiina, e buuta ana kainibaaire ao e anaa ab'akin te raanga n ran are 500 te miita ab'akina n raanga rikaaki. E tuangai b'a N na nakonako i nanon te raanga n ran ikekei, ao e roko iabutin te ran i nimoimoin waeu.

⁴Ao i mwiina, e a manga anaa anaanaun te raanga n ran are e raanga rikaaki arei, ao e tuangai b'a N na nakonako i nanona ikekei. Ao e roko iabutin te ran i bubuan waeu. E a manga katika riki te 500 ni miita riki n ira rikaaki te raanga n ran ao e roko iabutin te ran i beebeeu.

⁵E manga katika riki 500 te miita n ira rikaaki te raanga n ran, ao e a roko te raanga n ran n te karaanga ae e konaa te aomata n ri nanona n uaua.

⁶E taku te m'aane arei, “Etekiera ae natin te aomata, ko na iangoa raoi te b'ai ae ko a tia n nooria.” Ao ti nakonako nakon mataniwiin te karaanga,

⁷ike I a noori taian aroka aika a m'aiti n iteran te karaanga ake uoua.

⁸E taku te m'aane arei: E raanga te ran aei ni waerake nakon te karaanga are Ioretan ao e tii nako n Taari are Mate, ike e a manga onika iai ranna ae e taari nakon te ran ae e raoiroi.

⁹A na m'aiti aekakin maan ma ika, i bukina b'a e na uota te maiu ao te ran ae e raoiroi nakon Taari are Mate.

¹⁰A na akawa aomata i taari ao a na taakin aia karaun i mataniwiin taari ni moa mai Enkeri ni karokoa En Ekeraim. A na rangi ni m'aiti aekakin taian ika n Taari are Mate

¹¹Ma a na tiku n taari taabo aika aom'aim'ai i mataniwiin taari, b'a a aonga ni kamanenaaki irouia b'a aia tabo n anai taoro.

¹²A na maiu taian kai n am'arake i mataniwiin te karaanga aei ao a na katiinakoi taiani uaa aika a raraoi ni katoa nam'akaina. A na aki rai baana, i bukina b'a e tebotebokaki n taai nako n ranin te raanga n ran are e raanga man te Tembora, ao e na kamanenaaki i bukin kamaiuaia aomata.

¹³E taku te UEA ae te Atua: Ko na tuangiia Iteraera: E na anganaki te baronga are Ioteb'a uoua tib'ana ngkana e tib'aaki te aba nakoia barongan nako Iteraera.[62]

¹⁴Ko na tib'aa raoi te aba, i bukina b'a I berita ngkoa nakoia ami bakatibu b'a n te bong teuana ao e na riki te aba aei b'a aia b'ai aia kariki. Aikai tian te aba.

¹⁵E na moa tian meaang man Taari are te Mereterenian, ni waerake nako Eteron, nako Rebo Amata, ni manga ri aona nako Tetata,

¹⁶Berota, ao Tiberaim, are bon te tia i marenan taian tautaeka aika uoua aika Tamateko ao Amata. E na toki te tia i Atera Atikon, are bon tian Auran.

¹⁷Ma ngaia are, e na biri te tia i marenan Taari are te Mereterenian ao Atara Enon, are bon Tamateko ma Amata.

¹⁸E na moanaki tian mainiku man tian tautaeka ake uoua are te tautaeka n Auran ao Tamateko. E na biri nakoaiaki n ira te Karaanga are te Ioretan, are e biri i marenan aaba aika Kireata ao Iteraera, ao e na toki n Taari are Mate are i rarikin te kaawa are Tama.

¹⁹E na moanaki tian maiaki mai Tama, ao i mwiina, e a manga biri nakoaiaki ni wairio nakon te koburake n ran are i rarikin Meribota-Kateti. Ao e na waaki nako n ira nako tabwenan b'aan Aikubita ao e na toki n Taari are te Mereterenian.

²⁰E na biri tian maeao i mataniwiin Taari are Mereterenian nakon te tabokeekee raoi are i maeaon Rebo Amata.

²¹Ao anne te aba are e na tib'aaki nakoia barongan nako Iteraera.

²²E na riai ni b'ainaki irouia Iteraera ao ianena aika a maeka i buakoia ake a bungiaki natiia i Iteraera. A riai n aranaki ianena aikai b'a bon Iteraera, ao e na reke naba

²³tib'aia n te aba nakon te baronga are a maeka iai. Bon aei Au taeka Ngai ae te UEA ae te Atua.