Read Te B'aib'ara Etekiera 7 Bible Online

Etekiera 7 - Te B'aib'ara bible

Etekiera 7

¹E taku te UEA ae te Atua:

²Etekiera ae natin te aomata, tuangiia Iteraera te b'ai ae I tuangko ni kaangai: E na waekoa n roko tokin Iteraera! E nang uruaki abami

³b'a katuaaeana i bukin ami bure aika a rangi ni ribaaki. I a rangi ni un Ngai ae te UEA

⁴n te aro are N na bon aki manga nanoanga. N na oroingkami i bukin te buakaka ae kam a tia ni karaoia, ao ane kam na ataai iai b'a bon te UEA Ngai.

⁵Bon akea te aekaki ni kabuanib'ai ae e nang roko aei.

⁶A na toki maiumi ngkana e roko.

⁷E a roko ami bong ngkami aika Iteraera! E na roko te kanakonano i aon taubukin taiani maunga n onea mwiin taian bootaki ni kukurei.

⁸N na aki taotaona nanou ma ni katuaaeingkami i bukin m'akuri aika buakaka aika kam a tia ni karaoi. Kam na anganaki ae e bon riai n reke nakoimi.

⁹A rangi ni kakamaaku ami bure, n te aro are e na bon aki reke nanoangaami irou. Ao ane kam na ataia iai b'a bon Ngai ae te UEA ae I katuuaingkami.

¹⁰E a kaan te kabuanib'ai! E a mena n taabo nako te motibuaka ma te kainikatonga,

¹¹ao a biri nako buure aika a tiritiri. Bon akea i buakomi ae e na reke maiuna n te kabuanib'ai aei, ao a na bane ni maaerikiriki ami b'ai nako aika a rangi ni kakaawaki.

¹²E a roko te tai are a na bane iai aomata n uruaki aroia. E nang toki te kaboob'ai ma te kabonako b'aai,

¹³ao aomata akana a kaboonakoi aia b'ai a na aki konaa ni manga kabooi ni kaoki aia b'ai, i bukina b'a kam na bane ni katuaaeaki i bukin ami bure. N na bon aki bita nanou!

¹⁴E a tia ni katangaki te bu are te kanikina, ao a tia ni katauraoaki taian b'ai ni buaka. Ma bon akea ae nakon te buaka, i bukina b'a N na oroia aomata ni kabane i aon Iteraera n uniu.

¹⁵A mena n taabo nako te buaka, te aoraki, ao te baki! A na tiringaki aomata akana a maeka i tinanikun te kaawa n te buaka, ao akana a maeka i nanon taiani kaawa a na mate n te baki ke te aoraki ae e kamaamate.

¹⁶A na biri nako akana a reke maiuia nakon taian tabuki, kaanga taian taobe aika a kiitan taiani m'arua ni kakaaea kamaiuaia. Kam na bane n tang i bukin ami bure.

¹⁷Ane a na ruru baimi, ao a na turatura waemi.

¹⁸Kam na kunnikainingkami ni kunnikai aika a mangaingai i bukin kaotan nanokawakimi, ma ane e na taoningkami te maaku. E na koreaki taekan te kamaamaaeaki i aon matami, ao ane kam na korobuataui atuumi ma te korakai.

¹⁹Ane a na karenakoaki ami tirewa ma ami koora nakon nnen te maange i rarikin kawain nuukan te kaawa i bukina b'a bon aikai baika uoua aika kairingkami nakon te bure, ao ngkai a aki konaa ni kamaiungkami man uniu. A na bon aki tau naba i bukin kabooan te am'arake.

²⁰Kam na rangi ni kainikatonga ni kamanenaakin ami b'ai ni katamaroa ni karaoa iai te bouannanti i bukin antiia ianena aika a rangi n ribaaki. Ma ngaia ae, N na karika ami b'ai ni katamaroa b'a baika a akea manenaia.

²¹A na iraeingkami ma ni kamatauningaingkami ianena aika a buakaka.

²²Ane a na ninia au Tembora ma ni katikua b'a te tabo ae e aki tau i bukin taromauriau, ma N na bon tannako b'a e na bon aoria n riki anne nako ia.

²³E na mangaongao aon abami ni kabane! E na onrake aon Iteraera irouia taan tiritiri ao taan iowawa,

²⁴ma ngaia are, N na tuangiia botannaomata ake taiani kabanea ni buakaka b'a a na roko n anai mwengami. A na katoka te kainikatonga ane i nanon ami taanga ni buaka ae e korakora, ao a na karaoi ami tabo n taromauri b'a taabo aika a aki tau ni kamanenaaki.

²⁵Ane kam na maaku ao kam na korakai ni kakaaea te rau ma bon akea te rau.

²⁶Ane a na okioki te waaki aei, ao ane kam na ongo te rongorongo ae e aki kakukurei. A na buubutia te burabeti aomata b'a e na kaongoraaia au rongorongo. A na toki ni kab'arab'araa au Tua ibonga, ao a na aki konaa naba n anga taeka n reirei taan iango.

²⁷Ao a na bon bua naba aia kaantaninga ami uea ma ami mataniwi nako ao a tang ni korakai. Ane a na ruru baimi i bukin korakoran te maaku. N na katuaaingkami i bukin ami bure ao N na bon karaoa naba nakoimi aron are I a tia ni karaoia nakoia tabem'aang. Ao ane kam na ataia iai b'a bon te UEA Ngai.