Read Te B'aib'ara Etekiera 9 Bible Online

Etekiera 9 - Te B'aib'ara bible

Etekiera 9

¹Ao i mwiin anne, I ongo takaaruan te UEA ae e kaangai, “Nako mai nako Ierutarem, ngkami m'aane akana kam rineaki b'a kam na urua te kaawa. Uoti ami b'ai ni buaka!”

²I nooria onoman m'aane aika a roko n rin man mataroan te Tembora are mai meang, a taui b'ai ni buaka aika a rangi ni kamaamate n te tatabemaniia nako. E raoniia te kaitiman ae e kunnikainna n te niiniira te riinen, ao e uoti b'aai aika e na koroboki i aona. A rin m'aane akekei i nanon te Tembora ao a tei i rarikin te baonikarea.

³Ao e kiitana nnena mimitongin te Atua are aon taian bouannanti ake maan ake iai baiia i nanon te Tembora ao e nako nakon te mataroa n rin. Ao e taku te UEA nakon te m'aane are e kunnikaia n te niiniira te rinen,

⁴“Nakonako i nuukan te kaawa ae Ierutarem ao kanikinaai ram'aia aomata ni kabane aika a b'ara nanoia raoi ao a nanokawaki ni b'ai aika a rangi n ribaaki aika a tia ni karaoaki.”

⁵Ao I ongo b'anaan te Atua ngke e rairaki nakoia m'aane ake niiman ni kaangai, “Iria, ao tiringiia aomata ni kabane n akea temanna ae kam na nanoangaia.

⁶Tiringiia unim'aane, rorobuaka, ateiaine, tiina, ao ataei. Ma kam na aki kumeia aomata aika iai te kanikina i aon ram'aia. Ao kawaekoaia n tiringiia taani kairiiri ake a tei ikekei.”

⁷Ao E taku te UEA, “Kabuakaka te Tembora ni kab'arikoi taiani mate i nanon katawanangin te Tembora. Waakina ami m'akuri!” Ao a m'ananga nako n tiringiia Iteraera.

⁸Ao I tiku n ti ngai, ma ngaia are, I boobaraaki ao I tang nakon te UEA ni kaangai, “E aera ngkai Ko karaoa aei? E a bon rangi ni maraki nanom irouia kaain Ierutarem n te aro are a nang bane n tiringaki?”

⁹Ao E kaeka te UEA ni kaangai, “A tia Iteraera ma Iuta ni karaoi b'aai aika a rangi ni kakamaaku. E a onrake abaia irouia taan tiriaomata, ao e a onrake Ierutarem n te tiritiri. A taku b'a I a tia ni kiitaniia, ao I aki konaa n noori b'aai ake a tia ni karaoi.”

¹⁰Ma ngaia ae N na aki nanoangaiia ke ni kab'araa aia bure. A na riai ni katuaaeaki i bukin te b'ai ae a tia ni karaoia.”

¹¹Ao e rairaki te m'aane are e kunnikainna n te niiniira te riinen ao e taku, “I a tia ni karaoa te b'ai are Ko mwiokoai iai.”