Read Te B'aib'ara Taniera 12 Bible Online

Taniera 12 - Te B'aib'ara bible

Taniera 12

¹Ao e taku te anera are e kunnikaia n te rinen, “Ao ane e na kaoti te anera are Kabiriera are e kakawakiniia am aomata. Ane e na roko tain te kangaanga, aika a tuai ma n noonoria taiani botannaomata ma ngke a moani kaoti nakon te aonnaba aio. Ao ngkana e roko te tai anne, ao a na bane ni kamaiuaki am aomata ake a m'akoro araia n ana boki te Atua. [22]

²Ao ane a na m'aati aika a manga maiu aika a tia ni mate: tabeman a na kukurei n te maiu ae akea tokina, ao tabeman a na uti nakon te kamamaaeaki ae akea tokina.

³Ane a na oota taani kairiiri n ai aron ootan karawa. Ao koraki ake a tia n reireiniia aomata karaoan te raoiroi; a na oota n ai aroia itoi n aki toki.”

⁴Ao e taku nako iu, “Ao ngkai Taniera, ko na kaina te boki, ao kanikinaea b'a e na aki kaukaki ni karokoa tokin aonnaba. Ane a na m'aiti aomata aika a na kabanea aia tai ni kan atai b'aai aika a na riki.”

⁵Ao i mwiina, I nooriia uoman anera aika a teitei i rarikin te karaanga, temanna n are te iterana, ao temanna n are te iterana.

⁶Ao e taetae are temanna nakon raona are temanna are e tei maikekei riki nakon tabo are e raanga mai iai te karaanga ao e kaangai, “A na toki n ningai rikin b'aai aika a kamimii aikai?”[23]

⁷Ao e tabeka baina te anera ni kauaai nako karawa, ao e berita n aran te Atua ae akea tokina. Ao I ongo ana taeka ae e kaangai, “E na nakon tenua ma te iterana te ririki. Ngkana e a toki karawawaataia ana Aomata te Atua, ao a na tia ni bane n riki baikai.”[24]

⁸Ao I ongo ana taeka ngke e taetae ma I aki ataa nanona. Ma ngaia are, I titirakinna ni kaangai, “Nao, ma a na kangaa aron tokiia?”

⁹Ao e kaeka ni kaangai, “Ko riai n nako ngkai, Taniera, b'a a na karabaaki ma n aki kaotaki nanon taeka aikai ni karokoa rokon te toki.

¹⁰Ane a na m'aiti aomata aika a na kaitiakaki. Ane a na aki ataa nanona aomata aika a buakaka; ao a na teimatoa ni buakaka; bon ti aomata aika a wanawana aika a na ataa nanona.

¹¹Ngkana e a katokaki te angakarea are e katoa bong, ao e a kateaki te b'ai ae moan te kakamaaku, ao e na riai n tia ni bane 1,290 te bong.

¹²A na kab'aia akana a teimatoa ni kakaonimaki ni karokoa banen 1,335 te bong.

¹³Ao ngkoe, Taniera, ko na kakaonimaki ni karokoa te toki. Ao ane ko na mate, ma ko na manga maiu n anaa kaniwangam n tokin aonnaba.”