Read Te B'aib'ara Taniera 3 Bible Online

Taniera 3 - Te B'aib'ara bible

Taniera 3

¹Ana baaire Nebukaneta b'a a na bane aomata n taromauria te bouananti te koora. E karaoa te bouananti ae te koora te uea are Nebukaneta, ae 27 te miita rietana, ao e kaan 3 te miita rababana, ao e kateia n te tabo ae e aoraoi i Rura n te burawinti are B'aburon.

²Ao i mwiin anne, ao e kanakoa ana taeka te uea nakoia ana aobitia ni kabane, ake taian nati ni uea m'aane, ma taian kowana, ma mataniwi ni buaka, ma taiani kamitina, ma taani kawakin m'ane, ma taani moti, ma taani kairiiri, ao ai taian aobitia ni kabane n te burawinti arei b'a a na bane n roko. A na ira katabuan te bouananti are e a tia ni kateia te uea are Nebukaneta.

³Ao ngke a bane raoi ni ikotaki n tei i matan te bouananti i bukin katabuana,

⁴ao e nako te taeka n te b'anaa ae e korakora ae e kangai, “Ngkami aika aomatan aaba nako, ma reeti nako, ao taetae nako!

⁵Kam na ongora tangin taiani bu, aika a rimwiaki n tangin te bikura, ma te raea, ma te tita, ma te aabi, ao te bikura; ma taiani b'ai ni katangitang riki tabeua. Ao n te tai naba are kam ongo iai tangin b'aai akanne, ao kam na bane ni bobaraaki n taromauriia te bouananti te koora are e a tia ni kateia te uea are Nebukaneta.

⁶Ao ane e aki bobaraaki n taromauri, ao e na anaaki naba n te tai anne n teweakinako nako nanon te ai ae e uram'aaka.”

⁷Ao ni bon te tai naba are a ongo iai tangin taiani b'ai ni katangitang, ao a bane ni bobaraaki botannaomata ma reeti nako, ma taetae nako n taromauria te bouananti are te koora are e kateia te uea are Nebukaneta.

⁸Tabeman kaaini B'aburon a karekea te tai aei b'a aia tai ni kabuakakaia I-Iutaia nakon te uea are Nebukaneta.

⁹Ao a taku nakon te uea are Nebukaneta, “Ko na maiu n aki toki te uea!

¹⁰Te uea ae ko karineaki, ko a tia n anga am taeka b'a ngkana a ongo te katangitang aomata ao a na bane ni bobaraaki n taromauri te bouananti are te koora,

¹¹ao te aomata are e aki bobaraaki n taromauri e na teweakinako nako nanon te ai ae e ura m'aaka.

¹²Ma iai tabeman kaain Iutaia ake ko kateia b'a taan taua taekan te burawinti are B'aburon ake Tiateraka, Metiaka, ao Abeteneko, aika a aki ongotaeka nakon am taeka te uea ae ko karineaki. A bon aki taromauria antim ke ni bobobaraaki nakon te bouananti are ko kateia.”

¹³Ao e rangi n un te uea n te b'ai arei, ao e kanaanako b'a a na kawaekoaaki uake teniman akekei nako matana.

¹⁴Ao e taku nakoia, “Tiateraka, Metiaka, ao Abeteneko, e boni koaua b'a kam rawa n taromauria antiu, ke ni bobaraaki nakon te bouananti are te koora are I kateia?

¹⁵Ma ngaia ae ngkai, n te tai are kam ongo iai tangin te bu, ma te bikura, ma te raea, ma te tita, ma te aabi, ao b'aai ni tangitang ake tabeua, ao kam na bobaraaki n taromauriia te bouananti. Ao ngkana kam aki, ao kam na teweakinako nako nanon te ai ae e ura m'aaka. Kam taku b'a iai riki te anti temanna ae e kona ni kamaiungkami?”

¹⁶Ao a kaeka Tiateraka ma Metiaka, ao Abeteneko ni kaangai, “Te uea ae ko karineaki, bon akea te b'ai teuana are ti na manga taekinna.

¹⁷Ngkana arona b'a E konaa te Atua ae ti m'akuri i bukina ni kamaiura man te ai ae e ura m'aaka ao man m'aakam, ao E na boni konaa ni kamaiura.

¹⁸E ngae ngke e aki naba kamaiura, ma ti na bon teimatoa naba n aki taromauria antim, ao ti na bon aki naba bobaraaki nakon te bouananti te koora are ko kateia.”

¹⁹Ao e a rangi ni maraki nanon Nebukaneta, ao e a ura moana n un irouia Tiateraka, Metiaka ao Abeteneko. Ma ngaia are, e kanakoa ana taeka b'a e na kauraaki te ai ae itiua te tai kabuebuena nakon are boni kabuebuen ae e tataneiai te aba iai.

²⁰Ao e tuangiia ana tautia ake kabanea n ninikoria mai buakoia ana taanga b'a a na kabaeia m'aane ake teniman akekei, ma ni karenakoia nako nanon te ai are e ura m'aaka.

²¹Ma ngaia are, a kabaeia naba ma b'aiia ake i aoia, aia kabaraaki ma niiniiraia, ma b'araia, ao b'aai ni kabane, ao a karenakoia nako nanon te ai are e ura m'aaka.

²²Ao i bukin matoatoan ana taeka te uea b'a e na kakorakoraaki uran te ai arei, ao e a rangi ni korakora te ai arei n te aro are a bue ni mate iai tautia ake a tewenakoia uaakekei.

²³Ao i mwiin anne, ao a b'aka i nuukan te ai are e ura m'aaka Tiateraka, Metiaka ao Abeteneko n aroia ake a kabaeaki iai.

²⁴Ao e kuba n teirake Nebukaneta ma te miroaroa, ao e titirakiniia ana aobitia ni kaangai, “Tiaki ti boni kabaeia teniman te aomata ma ni karenakoia i nanon te ai are e ura m'aaka? Eng, ti boni karaoa anne te uea ae ko karineaki.”

²⁵Ao e kaekaia ni kaangai, “Ma e aera ngkai I nooriia aman te m'aane n nakonako i nuukan te ai? Kai a b'ara kabaeaia, ao a aki bue, ao kaanga e taraa n anera teuare te kaaman.”

²⁶Ao e m'ananga Nebukaneta nako rarikin te ai ao e takaarua ni kaangai, “Tiateraka, Metiaka ao Abeteneko aika Ana toro te Atua ae moan te m'aaka! Otinako.” Ao a otinako naba n te tai arei.

²⁷Ao a bane ni ikotaki ana aobitia te uea ma ana kowana, ao mataniwiin ana taanga ni buaka b'a a na nooriia m'aane ake teniman. E aki bue iran atuia naba teaina ma kunnikaia, ao bon akea naba te buaiai i aon rab'ataia.

²⁸Ao e taku te uea, “Neboa Atuaia Tiateraka ma Metiaka ao Abeteneko! E a tia ni kanakoa ana anera ni kamaiuia Ana aomata aika a toro i rouna ma ni kakoaua. A kukurei n anga riki rab'ataia nakon te kamateaki nakon ae a na bobaraaki n taromauria te anti temanna i rarikin Atuaia.

²⁹Ma ngaia are, I aki manga kariaia te botannaomata, ke te reeti, ke te taetae teuana b'a e na taetae n aki akaaka nakon Atuaia Tiateraka, Metiaka ao Abeteneko. Akana a karaoa anne, a na korokoreaki rab'ataia ni kauarerekeaki, ao a na uruakaki aia auti. Bon akea te Atua riki temanna ae e kona ni kakamaiu n aron aei.”

³⁰Ao te uea e a manga karikirakeaia riki Tiateraka, Metiaka ao Abeteneko nakoni nneia aika a rietaata n te burawinti are B'aburon.