Read Te B'aib'ara Taniera 4 Bible Online

Taniera 4 - Te B'aib'ara bible

Taniera 4

¹Ao aikai ana taeka te uea are Nebukaneta are e kanakoa nakoia botannaomata nako, ma reeti nako, ma taetae nako n te aonnaba: “Kam na mauri!”

²Kam na ongora nakon au rongorongo aika taekan kakai aika a kamimii are E a tia ni karaoi te Atua ae moan te m'aaka nako iu.

³Ai korakorara taiani kamimii ake E kaoti te Atua nakoira! Ai m'aakara ana kakai ake E a tia ni karaoi! Bon te UEA te Atua n aki toki; E na uea n taai nako.

⁴I rangi ni maiu raoi i nanon au bareti. I ebiebi ni kaub'aiu nako.

⁵Ma I miia te mii ke te kaotioti ae moan te kakamaaku ngke I matu.

⁶I kanakoa au taeka ni kaoiia au taan rabakau ni kabane ake i aon B'aburon b'a a aonga ni kona n tuangai nanon te mii arei.

⁷Ao i mwiina, a bane ni karinaki i nanon te bareti taan tabunea, ma ibonga, ao taani borau, ao I tuangiia miiu arei, ma a bon aki kona ni kab'ara nanona nako iu.

⁸Ao i mwiina, ao e rin Taniera (E aranaki naba b'a Beretiata, b'a ingoan antiu). E mena i nanona taamnein te Atua ae e tabu. Ma ngaia are, I a tuangnga miiu arei ni kaangai;

⁹Beretiata ae mataniwiia taani mamata, I ataia b'a e mena taamnein te Atua ae e tabu i nanom, are ko kona iai n atai taiani kamimii. Ao aio miiu. Tuangai b'a tera nanona.

¹⁰Ngke I matu ao I miia te aroka ae moan te korakora i nukan aonnaba.

¹¹Ao e a rikirake ni korakora ma ni korakora ni karokoa e a roota karawa, ao e a kona n nooraki irouia aomata nako n te aonnaba.

¹²A manguroroo baana ao e katine uaana aika a m'aiti aika a tau i bukini kanaia kaain te aonnaba ni kabane. A maeka maan aika aki manana i aan nuuna, ao a bane ni maiu b'aai nako aika a maiu ni uaana.

¹³Ngke I tabe n iangoa te kaotioti arei, ao I noora te anera ae e tabe n ruo rikaaki mai eta, ae e b'aina te tatauraoi.

¹⁴Ao e kanenea b'anaana man taku, “Korea te aroka ni kab'aka, ao erei m'aangana nako; ioi baana, ao kamrarai uaana. Kanakoia man aika kawakawa mai aana, ao mannikiba mai aon m'aangana nako.

¹⁵Ma ko na koroia mai botona, ao katuka te boto i nanon te tano, ma ko na niira te boto anne ni kabaea n te biti ma te buraonti. Ao katikua i nanon te tawaana ma taian uteute, ‘Kab'aka te aoi i aon te m'aane anne, ao katikua b'a e na maeka ma taian man ma aroka.

¹⁶E na aki iango n aomata i nanon itiua te ririki, ma e na iango ni man.

¹⁷Aio ana babaire te anera are e b'aina te tatauraoi. Ma ngaia are, a na bane aomata n ataia b'a E m'aaka te Atua ae moan te m'aaka i aon abanuean te aomata, ao E kona n angan ane E bon taku, n ai aroia aika rangi ni mangori.’

¹⁸E taku te uea are Nebukaneta, Anne te mii are I noria. Beretiata, tuangai nanona. Bon akea temanna i buakoia au taan rabakau ae e kona n tuangai nanona, ma ko konaa ngkoe, b'a a mena tamneia atua ake a tabu [4] iroum.

¹⁹Ao e rangi n aki kakoaua te mii arei Taniera, are arana teuana Beretiata n te aro are e aki reke te b'ai ae e na taekinna. Ao E taku te uea nakoina, “Beretiata, ko na aki raraoma n te rongorongo ane e kaotaki n te mii anne.” Ao e kaeka Beretiata, “Te uea ae ko karineaki, E bia aki nanonaki te mii aei nakoim, ma e bia nanonaki nakoia am kairiribai.

²⁰Te aroka are e rangi n rietaata are e roota karawa, are e kona n nooraki irouia aomata nako n te aonnaba ni kabane,

²¹a manguroroo baana, ao a m'aiti uaana n te aro are e a kona ni kam'arakeia iai kaain te aonnaba ae e b'anin. A maeka maan aika kawakawa i aana, ao a karaoi ngaoia mannikiba i aoni m'angana.

²²“Te uea ae ko karineaki, boni ngkoe te aroka are e rietaata ma ni korakora. Ko a tia n rikirake n rangi ni korakora n te aro are ko a roota karawa, ao e rooti taabo nako n te aonnaba aei m'aakam.

²³Ngke ko bon tabe ni mataku te uea ae ko karineaki, ao e ruo rikaaki te anera mai karawa ao e taku, ‘Korea te aroka n tiringnga, ma katuka teutana botona i nanon te tano. Niira botona ane teutana anne ni kabaea n te biti ma te buraonti, ao katikua ikanne i nanon te tawaana i buakon taian uteute. Ke e ruo te aoi i aon te m'aane anne, ao kamaekaa ikanne i buakoia maan i nanon itiua te ririki.

²⁴“Te uea ae ko karineaki, ai anne ngkanne nanona, anne ngkanne te b'ai ae e na riki nakoim i nanon taai aika a na roko are E kaotia nakoim te Atua ae e m'aaka.

²⁵Ko na kakioaki nako man te kaawa, ao ko na maeka ma maan aika a moaanti. Ko na kang uteute n ai aron te kao, ao ko na matu n te tabo ae e katawanang, n te aro are e na ruoniko te aoi, ao e na riki aei nakoim i nanon itiua te ririki. Ao ko na okira te Atua n tokina, ao ko na kakoaua b'a boni Ngaia ae E taua taekan ueaia aomata ni kabane, n te aro are E kona n anai ao ni manga anganiia tabem'aang ake E bon taku.

²⁶E tuatua te anera arei b'a e na katukaki te boto arei i nanon te tano. E nanonaki iai b'a ko kona ni manga uea riki ngkana ko kakoaua b'a E taua taekan te aonnaba aei ni kabane te Atua.

²⁷Ma ngaia are, ‘Te uea ae ko karineaki, karaoi kanoan au kaetieti. Katoka karaoan te bure, karaoa ae e raoiroi, ao nanoangaia akana aki kaub'ai. [5] Ao i mwiina, e a tib'a kona n rikirake ueam.”

²⁸Ao a boni bane n riki baikai nakon te uea are Nebukaneta,

²⁹Tebwi ma uoua te nam'akaina i mwiina, ao e tabe n nakonako ni katobibi i taubukin ana bareti i B'aburon,

³⁰ao e taku, “Nooria, ai korakorara B'aburon. I kateia b'a au kaawa ae atuun au tautaeka b'a kaotan korakorau ma m'aakau, ma mimitongiu, ao kakannatou.”

³¹I m'aain are e nang taetae te uea, ao e taetae te b'anaa mai karawa ni kaangai, “Te uea ae Nebukaneta ko na ongora n te b'ai ae N nang taekinna! E a anaaki m'aakan ueam mairoum.

³²Ao ane ko na kakioaki nako man te kaawa, ao ko na maeka ma taian man aika a moaanti, ao ko na kana te uteute n ai aron te kao i nanon itiua te ririki. Ao ane ko na kakoaua b'a iai m'aakan te Atua ae e m'aaka i aon ana tautaeka te aomata, ao E kona n anga nako ngaiia nakon temanna are E bon taku.

³³Ao e koro nanon te taeka arei n te tai ae e waekoa. E teweaki nako Nebukaneta man te kaawa, ao e am'am'arake n taian uteute n ai aron te kao m'aane. E ruonaki rab'atana n te aoi, ao e a m'arairai irana n ai aron buraen te ikare, ao ukinibaina n ai aron ab'akin ukinibain te mannikiba.

³⁴E taku te uea, “Ngke e a koro itiua te ririki, ao I tararake nako karawa, ao e oki nanou. I neboa te Atua ae e m'aaka, ao I anga te karinerine ma te kamoamoa nakon teuae E maiu n aki toki. “E na tautaeka n aki toki, ao akea tokin ueana.”

³⁵E taraia aomatan te aonnaba b'a kaanga baika akea bonganaia; a mena i aan Ana babaire anera ake i karawa, ma aomata aika i aon te aba. Bon akea ae e kona ni kaitaraa Ana iango ke ni waea te b'ai ae E karaoia.

³⁶“Ngke e oki nanou, ao a bane ni kaokaki nako iu karineau, ma kakannatou, ao mimitongin ueau. A bane ni butim'aeai au aobitia ma au aomata aika a kakannato, ao I a manga anganaki m'aakau ni uea, ma te karinerine ae e a korakora riki nakon are mai m'aaina.

³⁷Ma ngaia are ngkai, I neboa Ueani karawa ngai ae Nebukaneta, ao ni karinea ma ni kamoamoa ueani karawa. A bane ni koaua ma n eti baika E karaoi, ao E kona ni karinanoa te aomata ae e kainikatonga.”