Read Te B'aib'ara Taniera 5 Bible Online

Taniera 5 - Te B'aib'ara bible

Taniera 5

¹Ao e kaoiia teuana tengaa aomata aika a kakannato te uea are Beretiata nakon ana baka n am'arake ae e buubura, ao a kaai ni mooi wain.

²Ao ngke a tabe ni mooi, ao e tua Beretiata b'a a na uotaki nakoina taiani koora ma m'angko ma boora ake taian tirewa ake e anai tamana are Nebukaneta man te Tembora are i Ierutarem. Ao e tib'ai nakoia ana iruwa ake a kakannato, ma buuna nako, ao nakoia buuna naba ni kewe b'a a na mooi iai.

³Ao n te tai ae e aki maan, ao a roko ana m'angko ma boora ake taiani koora, ao a bane ni mooi mai iai

⁴ao a neboa te anti are e karaoaki man te koora, ma te tirewa, ma te buraonti, ma te biti, ma te kai, ao te atiibu.

⁵Ao e rina ni kaoti bain te aomata, ao e koroboki i aon oon nanon te bareti n te tabo are e rangi n oota nako iai ootan te taura. Ao te uea e noora te bai arei ngke e tabe ni koroboki.

⁶E mainarake te uea ao e rangi ni maaku n te aro are a ruru waena.

⁷Ao e takaarua b'a a na kawaekoaaki taan tabunea, ma ibonga, ao taani borau. Ao ngke a rin, ao e taku te uea nakoia, “Ane e kona ni wareka te koroboki aei man tuangai nanona, ao e na karinaki te niiniira ae e uraro are aia b'ai uea, ao e na kabaeaki te m'ae ni karineaki ae te tiein ae te koora i roroana, ao e na riki b'a te kateniman ni m'aaka i nanon te abanuea.”

⁸Ao a bane n roko ana taani iango te uea ma bon akea temanna ae e kona ni wareka te koroboki arei, ke n tuanga te uea nanona.

⁹Ao e rikirake te maaku ae e korakora iroun te uea are Beretiata n te aro are e a mainarake moana, ao a aikoa ataa te b'ai ae a na karaoia ana taani iango te uea.

¹⁰Ao e ongo tinan te uea n aine karongoaan te uea ma ana taani iango, ao e a rin nako nanon te tabo n am'arake. Ao e taku, “E na maiu te uea n aki toki! Taiaoka, karaua nanom, ao tai kanakoa nanom.

¹¹Boni iai te m'aane temanna n abanueam ae iai ana konab'ai ae e raka, e wanawana, e m'aatai n te kab'ara mii, e rabakau ni kaiwa, ao e atai nanoni baika a raba;

¹²ma ngaia ae ko na kawaekoa te aomata ae Taniera are e aranaki ngkoa iroun te uea b'a Beretetiata, ao e na tuangko nanoni baikai ni kabane.”

¹³Ao e uotaki ni karinaki Taniera n te tai ae e waekoa nako matan te uea, ao e taku te uea nakoina, “Boni ngkoe Taniera, taenikain Iutaia are e anaiko tamau are te uea mai Iuta?

¹⁴I a tia n ongo b'a e mena tamnein te Atua ae e tabu i nanom n te aro are iai iroum te konab'ai, te rabakau ao te atatai.

¹⁵A karinaki taani iango ao taan tabunea b'a a na wareka te koroboki, ao a na tuangai nanona, ma a bon aki kona ni kunea nanona.

¹⁶Ao ngkai, I a tia n ongo b'a ko kona ni kunei nanon baika a raba, ao ni kab'arai nanoia. Ngkana ko kona ni wareka te koroboki ma n tuangai nanona, ao e na katokaaki niiniiram are e uraro are b'ain te bareti, ma ni kabaeaki i roroam te m'ae ni karineaki are te tiein te koora, ao ko na riki b'a te kateniman ni m'aaka i nanon te abanuea.”

¹⁷E kaeka Taniera, “Kaawakina am b'ai n tangira, ke anganiia tabem'aang. N na wareka te b'ai ane e korobokiaki nakoim te uea ae ko karineaki ma

¹⁸“Nooria te uea, bon te Atua ae e m'aaka ae E karika taman Nebukaneta b'a te uea ae e korakora, ao E anganna te m'aaka ma te karineaki.

¹⁹E rangi ni korakora n te aro are a maaku man ruru botannaomata, ao aekaki n reeti nako i rouna. E tiringa ane e kan tiringnga, ao e kamaiua ane e kani kamaiua. E karinea ke e tewenakoa ane e bon taku.

²⁰Ma i bukina ngke e a manga kainikatonga ma n taningabono, ao n tiritiri, ao e a kam'awaki man ana kaintokanuea ao e bua nnena ni karineaki.

²¹E kanakoaki man te kaawa, ao e a riki b'a kaanga ana iango te man. E maeka ma taian aati, e kana te uteute n ai aron te kao m'aane, ao e maeka n taabo aika a katawanang, aika akea katanana iai man te aoi. Ao n tokina ao e a kakoauaa b'a bon te Atua ae e m'aaka ae e taui aron ueaia aomata, ao E kona n anga nakon ane E bon taku.

²²Ma ko rawa ni kananorinanoko, ao ko bon atai baikai ni kabane b'a bon natina te m'aane ngkoe.

²³Ko kakaitaraa UEAN karawa ngke ko uoti m'angko, ma taiani boora ake a anaaki man ana Tembora. Ao ko mooi mai iai ngkoe ma am taani iango, ma buum, ao buum ni kewe, ao kam kamoamoaia anti ake a karaoaki man taiani koora, tirewa, buraati, biiti, taiani kai, ao atiibu, anti aika a aki noraaba ao a aki konaa naba ni kakauongo, ao a bon aki ataa te b'ai teuana. Ao kam aki karinea te Atua ae e mena maiumi i nanoni baina, ao E bairei b'aai ni kabane aika kam karaoi.

²⁴Ao bon anne bukina are E kanakomaia iai te bai te Atua b'a e na koroi taeka aikai.

²⁵Ao aikai taeka ake a koreaki: Te Ware, Te Ware, Te Rawaawata, Te Bwenauaaki.

²⁶Ao aikai nanon taeka aikanne: Te Ware, E a tia ni wareki m'aitin am bong te Atua, ao E na karokoa n tokina;

²⁷Te Rawaawata, Ko a tia ni katineaki n te b'ai n tau rawaawata, ao ko kuneaki b'a ko a rangi ni beebete;

²⁸Te bwenauaki, E a tia ni bwenauaaki ueam, ao a anganaki kaain Miria, ma kaain Bootia”

²⁹Ao e anga ana taeka Beretiata n te tai ae e waekoa b'a e na katokaaki niiniiran Taniera are te niiniira are e uraroo are niiniiraia uea, ao e na kabaeaki i roroana te m'ae ni karineaki ae te tiein te koora. Ao e na riki b'a te kateniman ni m'aaka i nanon te abanuea.

³⁰Ao e tiringaki Beretiata are ueani B'aburon ni bon te tairiki naba anne;

³¹ao e anganaki Taraiati are kaain Miria are ai 62 ana ririki ni maiu b'a te tia onomwi n ueana.