Read Te B'aib'ara Taniera 6 Bible Online

Taniera 6 - Te B'aib'ara bible

Taniera 6

¹Ao e baireia te uea are Taraiati b'a e na rineia tebubua uangaun koowana aika a na taui nakoa aika kakaawaki i nanon ana tautaeka.

²Ao e rineia teniman taian aobitia aika a rietaata ake a na tararuaia koowana akekei, ao a na kaawakin ana m'ane te uea b'a e rawa ni kainano, ao temanna mai buakoia bon Taniera.

³Ao e waekoa n nooraki b'a e konab'ai riki Taniera nakoia naake raona n aobitia aika a rietaata. Ao i bukin rianakon ana konab'ai, ao e a rineia te uea b'a te tia taraa te tautaeka ae e b'anin.

⁴Ma ngaia are, a kakaea kabuakakaan ana kairiiri Taniera n te tautaeka naake raona ni mataniwi ao aobitia aika a rietaata, ma e bon aki reke i bukina ngke bon te aomata ae e onimakinaki Taniera, ao akea ana m'akuri ae e kairua, ke aki nakoraoi.

⁵Ao a taku i bon irouia, “Ti bon aki kona ni kunea kabuakakaan Taniera, ma ti ngkana te b'ai ae iai reitakina ma ana aro.”

⁶Ma ngaia are, a nako n nora te uea ao a taku, “Te uea ae Taraiati, ko na uea n aki toki!

⁷A bane ni bo nanora ngaira aika ti tararua am tautaeka, aobitia aika a rietaata, taani kairiiri, taan iango, ao koowana, b'a ko na karaoa te tua teuana ae e matoatoa. Ko na tua b'a akea temanna ae e na bubutiia te anti temanna ke te aomata temanna i nanon te maan ae tenibwi te bong ma ti ngkoe. Ao ane e ri aon te tua anne, ao e na karenakoaki i nanon ooia raian.

⁸Ma ngaia ae ko na karaoa te tua aei te uea, ao ko na tiainaia, ao e na kamatoaki ni kaangai, aia tua kaain Miria ma kaain Bootia ae e aki kona ni bitaki.”

⁹Ao te uea are Taraiati e tiainaa te tua arei.

¹⁰Ao ngke e ataia Taniera b'a e a tia n tiainaaki te tua arei, ao e a nakoni mwengana. Ao iai wintoon ana auti ae e uki ni kaitaraa Ierutarem. Ao e nako ni katorobubua i matan te winto, ao e tataro nakon te Atua. E tataneiai n tataro tenua te tai n te bongina.

¹¹Ao ngke a nooria ana kairiribai b'a e tataro nakon te Atua,

¹²ao a bane nako nakon te uea ni kabuakaka Taniera. A taku, “Te uea ae ko karineaki, ko a tia n tiainaa te tua b'a ane e aki bubutiiko ma e bubutiia te anti temanna ke te aomata temanna i m'aain koron tenibwi te bong, ao e na karenakoaki nako nanon ooia raian.” Ao e kaeka te uea, “Eng, bon anne te tua ae e matoa, aia tua kaain Miria ma kaain Bootia ae e aki kona ni bitaki.”

¹³Ao a taku nakon te uea, “Ma Taniera are temanna te taenikai mai Iuta e aki kan ongo, ao e rawa n ongotaeka nakon te tua are ko karaoia. E tataro tenua te tai n te bongina.”

¹⁴Ao ngke e ongo aei te uea, ao e rangi n rawaawata nanona, ao e kataia ni kakaea te anga are e na reke maiun iai Taniera. E keiaki ni kakaea ni karokoa bungintaai.

¹⁵Ao a manga oki ana kairiribai Taniera nakon te uea ao a taku nakoina, “Ko ataia te uea ae ko karineaki b'a bon akea aia tua kaain Miria ma kaain Bootia ae e karaoaki iroun te uea ae e kona ni bitaki.”

¹⁶Ma ngaia are, e a anga ana taeka te uea i bukin Taniera b'a e na karenakoaki i nanon te m'anono are e kanoaaki irouia raian. Ao e taku nakon Taniera, “E bia kamaiuko Atuam ane ko toro i rouna ma te kakaonimaki.”

¹⁷Ao e kainaki matan te b'angab'anga arei n te atiibu, ao e kanim'a ana kanikina ma ana aomata aika a kakannato i aon te atiibu arei, n te aro b'a akea temanna ae e na kamaiua Taniera.

¹⁸Ao i mwiina, e a okira ana bareti te uea, ao e aki matu ni kangainaa, ao e aki am'arake, ao akea naba te kamataku nakoina.

¹⁹Ao e uti m'aaka te uea ngke e moaningabong, ao e kawaekoa nakon nneia raian.

²⁰Ao ngke e roko ikekei, ao e weewete n te b'anaa ni kananoanga ao e kaangai, “Taniera ae ana toro te Atua ae e maiu! E kona ni kamaiuko te Atua ane ko toro i rouna ma te kakaonimaki mairouia raian?”

²¹Ao e kaeka Taniera, “Ko na maiu n aki toki te uea!

²²E kanakoa ana anera te Atua ni kaini wiia raian n te aro b'a a na aki kaikoakai. E karaoa aei i bukina b'a E ataai b'a bon akea au bure, ao bon akea naba au kairua nakoim, te uea ae ko karineaki.”

²³E rangi ni kukurei te uea, ao e tua b'a e na katikakirake Taniera mai i nanon te b'angab'anga. Ma ngaia are, a katikia ni waerake ao a nooria b'a bon akea ikoakina teutana, b'a e onimakina te Atua.

²⁴Ao e a manga anga ana taeka te uea b'a a na katikaki te koraki ake a kabuakaka Taniera, ao e karenakoia nako nanon te b'angab'anga are nneia raian, n ikotaki ma buuia ma natiia. A kaman raweaki rab'ataia man raebitiaki irouia raian i m'aain rokoia i aontano.

²⁵Ao e koroboki te uea are Taraiati nakoia botannaomata nako, reeti, ao taetae nako n te aonnaba ni kaangai: “Kam na mauri!

²⁶Au kaetieti nakoimi ni kabane kaain au tautaeka b'a kam na bane ni maaka ao ni karinea Atuan Taniera.

²⁷E kakamaiu ao e i buobuoki; E karaoi kamimii ma kakai i karawa ao i aonnaba. E kamaiua Taniera mairouia raian.”

²⁸Ao e kakab'aiaki Taniera i nanon ana tai ni uea Taraiati, ao Tairati are kaain Bootia.