Read Te B'aib'ara Taniera 8 Bible Online

Taniera 8 - Te B'aib'ara bible

Taniera 8

¹I noora te kauoua ni kaotioti i nanon ana katenua n ririki ni uea te uea are Beretiata i aon B'aburon, [10]

²I a mena i nanon oon te kaawa are Tutian n te burawinti are Eram i nanon te kaotioti arei. Ao I tabe n teitei i rarikin te karaanga are Urai,

³Ao I noora te tiibu m'aane ae uaai korona aika a ab'ab'aki, ao e anaanau man boou riki korona are teaina nakon are teaina.

⁴I tabe n tarataraa te tiibu m'aane arei ngke e butubutu ni wairio, nakoiang, ao n nakoaiaki. Ao bon akea ae e konaa ni kaitaraa, ke ni maiu mai rouna. E karaoa are e bon taku, ao e rikirake ni kainikatonga.

⁵Ao ngke I tabe ni mimi b'a tera nanon te baei, ao e kaoti te kooti ae e bane birina mai maeao, e rangi ni bane birina n te aro are e a aki toko waena ma aontano. Ao iai korona teaina ae e terenako i marenan matana ake uoua.

⁶Ao e kanenei ni kaineta te tiibu m'aane are I nooria ngkoa n tei i rarikin te karaanga, ao e kabanea korakorana ni biri nakoina.

⁷Ao I mataku ngke e tabe n un ma te tiibu te m'aane. E bon rangi n un n te aro are e okianako ao e urui korona te tiibu m'aane ake uoua. Bon akea korakoran te tiibu m'aane ni kaitaraa. A b'aka nako aontano ao e toubekaaki, ao bon akea temanna ae e konaa ni kamaiua.

⁸Ao e rikirake ni kamoamoa te kooti arei, ao e a uruaki korona i bukini korakoran m'aakana. Ao a manga kaoti aua te koro aika a teretere raoi n onea mwiina, ao a kotoi taabo aika a kakaokoro n tatabeua nako.

⁹Ao e a manga kaoti te koro teuana i aon te koro teuana mai buakon kooro ake aua, ao e taona maiaki ma mainiku m'aakana ni karokoa te Aba ni Berita.

¹⁰E boni korakora n te aro are e kona ni kaaitaraa te taanga ni buaka mai karawa,[11] ma taiani itoi, ao e kab'akaia tabem'aang nako aontano ao e toubekaia.

¹¹Ao bon akea naba karinean mataniwiin te taanga ni buaka mai karawa i rouna, e katoka te angakarea are e katoa bong nakon te Atua, ao e uruaka te Tembora.

¹²Ao a tannako aomata mairoun te Atua, ao a anga ngaia nakoni m'aakan te koro arei, ao e a tewenakoaki te aro ni koaua nako aontano. E totokanikai te koro ni b'aai ni kabane ake e karaoi.

¹³Ao I ongo ana taeka te anera temanna ngke e titirakina raona are temanna, “A na maanra waakin b'aai aika a oti n te kaotioti aei? E na maanra ana tai te bure are e kakamaaku n onea mwiin te angakarea are e katoabong? A na maanra aia tai te taanga ni buaka mai karawa, ao te Tembora n toutouaki?”

¹⁴Ao I ongo aia kaeka anera ake tabeman ae e kaangai, “E na reitinako te aki angakarea ni karokoa uoua tengaa tenibubua te moaningabong ao te tairiki. Ao i mwiina, e a tib'a okira arona te Tembora.”

¹⁵I tabe ni kakaea nanon te kaotioti ngke e a ti kaoti naba temanna te aomata n tei i moau.

¹⁶Ao I ongo te b'anaa ae e weewete i aon te karaanga are Urai ae e kaangai, “Kabiriera, kab'arai nanoni kaotioti nakon teuanne.”

¹⁷Ao e roko Kabiriera n tei i rarikiu, ao I a rangi ni maaku n te aro are I a b'aka i aontano. Ao e taku nako iu, “Natin te aomata, ko na atai nanoia. Bon taiani kaotioti i bukin tokin te aonnaba.”

¹⁸Ao ngke e tabe n taetae, ao I b'aka n tong i aontano. Ma e tauai ni baina, ao e kateirakeai. Ao e taku, “N na kaoti nakoim baika a nang riki i bukin unin te Atua. E kaineti te kaotioti anne nakon tain te toki.

¹⁹ao e taku, “Te b'ai ae I kaotia nakoim bon b'aai aika a na riki i bukin unin te Atua. E nanonaki rokon te toki n te kaotioti aei.

²⁰Te tiibu m'aane are ko nooria are iai korona aika uaai bon rab'atan te tautaeka ni Miiria ao ni Bootia.

²¹Te kooti bon rab'atan te tautaeka ni Kuriiti, ao te koro are e terenako i marenan matana bon te moani uea.

²²Ao kooro ake aua ake a kaoti i mwiin b'akan te moani koro bon rab'atan tautaeka ake aua ake a na tib'aaki nako iai te botannaomata arei, ao e na aki roko ni korakoran te moan tautaeka.

²³“Ao ngkana a uakaan tokin taian tautaeka aikai, ao ane a na rikirake n rangi ni buakaka n te aro are a na bon anganaki te rekenikai, e na kaoti te uea ae e taningabono ae e buakaka kateina ae te tia kam'ane.

²⁴E na rikirake ni korakora, ma tiaki man oini korakorana. E na karaoa te urub'ai ae e kakamaaku, ao a kookoro bukin b'aai ake e karaoi. E na kamaunaiia aomata aika a korakora ma ake bon oin ana Aomata te Atua.

²⁵A nanakoraoi ana m'akuri nako ni mamanibuaka, i bukina ngke bon te aomata ae te tia kam'ane ngaia. E kamoamoa i aon rab'atana, ao e tiringiia aomata n akea te katauraoi. E na boni kaitaraa naba te UEA are e korakora i aon b'aai ni kabane, ma e na bon tiringaki, tiaki ni bain te aomata.

²⁶Ao e na boni koro bukin te kaotioti are e a tia ni kab'araaki nakoim are i bukin te tairiki ao te moaningabong. Ma ko na aki kakaotia ngkai, i bukina b'a e na bon kiriaria te tai are e na koro bukina iai.

²⁷Ao I wene ni mamaara ma n aoraki i nanon tabeua te bong. Ao i mwiina I teirake, ao I a manga moana au m'akuri are e anganai te uea, ma e minotaki au iango n te kaotioti arei ao e aki reke nanona.