Read Te B'aib'ara Otea 1 Bible Online

Otea 1 - Te B'aib'ara bible

Otea 1

¹Otea Ngai ae natin Beeri te m'aane. Ngke e uea Utia, Iotam, Aati, ao Etekia i aon Iuta, ngke e uea Ieroboam are natin Ioati [1] i Iteraera,[2] ao E taekina te rongorongo aei te UEA nako iu.

²E taku te UEA, “Otea, e a tia Iteraera ni keweai kaanga te ainenum'a ae e aki kakaonimaki.[3] Ko na iein ma te aine temanna ao karika natim i rouna.”

³Ma ngaia are, I mare ma Nei Komera are natin Riberaim te aine, ao e reke natira te m'aane.

⁴Ao E taku te UEA, “Otea, aran natim te m'aane bon Ietireera, [4] b'a N na katuaaea ana kariki uean Iteraera are Ieu n te tai ae e aki maan i bukin te m'akuri n tiritiri are e karaoia n te M'arua are Ietireera. [5] N na kamaunaa abanueana,

⁵N na urua korakoran Iteraera n te M'arua are Ietireera.”

⁶Tabeua te tai i mwiina, e a manga riki natin Nei Komera te aine, ao E taku te UEA, “Aranna b'a Nei Roo-Ruam'a,[6] b'a N na aki manga akoi teutana ao ni kab'araa ana bure Iteraera.

⁷Ma bon te UEA Ngai ae Atuan Iuta, ao N na bon akoa Iuta ma ni kamaiua n oin m'aakau-tiaki n te buaka ao n taiani kanoa ni kainikatebe ke n te kabaang ma taani buaka mai aoia aoti.”

⁸Ao ngke e a bon ewenako Nei Roo-Ruam'a iroun Nei Komera, ao e a manga reke natin Nei Komera temanna te m'aane.

⁹Ao E a manga taku te UEA, “Aranna b'a Roo-Ammi,[7] b'a bon tiaki Au aomata aikai, ao tiaki Atuaia Ngai.”

¹⁰Ane a na roko boong ae e na kangaanga iai warekaia Iteraera, b'a a na rangi ni m'aiti kaanga tanon mataniwiin te bike. A atongaki ngkai b'a “Tiaki Au Aomata,” ma ni boong aika a na roko a na atongaki b'a “Natin te Atua ae E Maiu.”

¹¹A na manga ikotaki Iteraera ma Iuta ao a na rinea aia tia kairiiri ti temanna. Ao i mwiina, a na kaoki abaia, ao e na riki te bong aei b'a ana bong Ietireera [8] ae e kakannato.