Read Te B'aib'ara Otea 10 Bible Online

Otea 10 - Te B'aib'ara bible

Otea 10

¹Bon te kai te kureebe ngkoe ae e onrake ni uaana. Ma m'aitin riki uaana bon m'aitin naba te baonikarea ae ko karaoia; raoiroin rokom bon raoiroin te oota are ko karikia i bukiia antiia beekan.

²Ko kam'am'ane ao ko aki kakaonimaki. Ma ngaia are, ko na anganaki boon am bure nako, i bukina b'a E na urua am baonikarea ao am banna te UEA.

³Ane kam na kaangai, “Akea ara uea. Ti aki maaka te UEA. Tera manenan te uea?”

⁴Iteraera, ko urui taian boraraoi ao ko aki kaawakina te berita; ko onika te eti nakon te uteute ae boitin ike e na riai ni maiu iai te aroka ae e maiureirei.[59]

⁵A bane ake a maeka i Tamaria n ruru ni maaku i bukin iangoan taian bouananti[60] i Betaera are e korakora te bure iai.[61] te bouannanti bon aia kamoamoa taian ibonga, ma a bon uotiia nakon te kamamaaeaki; ao ngkai a bane n tang.

⁶E na uotaki nako Aturia ao e na anga te aba nakon te uea are e kakannato. Ao i mwiina, e na kamamaaeaki Iteraera i bukin taromaurian te bouananti anne.

⁷E na beti nako uean Tamaria, kaanga te m'akoro ni kai i nanon te raanga n ran.

⁸A na uruakaki taian baonikarea ake i Betaera are e bure korakora i bukin karekean Iteraera n te bure; a na rabunaki nako n aroka aika a kateketeke ao taian aroka aika a kateketeke baaia. Ao ane a na bane aomata ni butiia taian maunga ma taian tabuki b'a a na rabuniia ma ni kaawakiniia.

⁹Iteraera, kam tuai man katoka karaoan te bure[62] man te tai arei i Kibea.[63] Ao anne bukina ngkai ko na buakanaki i Kibea.[64]

¹⁰A taboroboro am bure, ao ko kakamangao. Ngkai I a tia n iangoia ni kanakoia botannaomata b'a a na buakaniko ma ni kabaeko n taian tiein.

¹¹Ngkai Ko a tia n ongotaeka ngkoa kaanga te kao te ataei are e kukurei ni manga kaaki kunin te uita. Ma N na kaaki te b'ai n toka i aon roroam ae e korakora; ao ko na kaai ni kamaraua te tano ngkoe ma Iuta ma n unika te tano.

¹²Kamaraua am tawaana nako. kamaae atin te motikitaeka ae eti, ao taia te kakaonimaki. Taromauriai, Ngai ae te UEA, ao N na kanakoa m'aakau ni kakamaiu ni kab'aka kaanga te karau.

¹³Ko a tia n unika te buakaka, ko taia te motibuaka, ao ko kana uaan am kewe. Ko onimakina oin korakoram ma korakoran am taanga ni buaka nako.

¹⁴Ma ngaia are, e na roko te buaka, ao a na uruakaki ami nono nako. Ao ami kairiribai a na karaoa nakoim te b'ai are e karaoia Tiareman[65] nakoia kaain Beta-Arebera a na oreaki ma te b'aa tiina ma natiia ni karokoa mateia.

¹⁵Betaera, bon aei tokim i bukina b'a ko buakaka. Iteraera, e na tiringaki am uea n te kaarangaina.