Read Te B'aib'ara Otea 2 Bible Online

Otea 2 - Te B'aib'ara bible

Otea 2

¹Ma ngaia are, a na aranaki tarim b'a “Au aomata” ao m'anem a na aranaki b'a “Akoan te Tangira”.[9]

²Bukinna! Bukina tinam! Ai tiaaki buu, ao ai tiaki buuna Ngai ae te UEA. Butiia b'a e na katoka arona n riki b'a ainen matawa ma ana aki kakaonimaki nakon buuna,[10]

³b'a I kaawa ni buuta kunnikaina ni kabebekanna kaanga te bong are e moan bungiaki iai. N na karikia b'a e na kanoabo kaanga te rereua, ao e na mate n te taka.

⁴A riki natim man uaan ana aki kakaonimaki, ao N na aki nanoangaiko.

⁵E aki kakaonimaki tinam. E rangi ni b'ainrang ao e taku, “N na biri n rimwiia au tangira A bane n roko b'aai mairouia kanau ma nimau, kunnikaiu te riinen ao te burae n tiibu, au b'a n oriwa ao te wain.”

⁶Ngai ae te UEA, N na karaoa te oo ae kateketeke ni kaina kawaina.

⁷E na biri rimwiia ana tangira, ma a na aki reke i rouna; E na ukoriia ma a na aki reke. Ao ane e na kaangai, “N na okira moan buu. N na bon oi n aomata riki iai.”

⁸E bon aki ataia b'a bon taiani b'aintangira mairou ana uita, te wain ao b'aan te oriwa, kaanga taian koora ma tirewa ake e kamanenai n taromaurian B'aara.[11]

⁹N na taua taian te uita ao te kureebe. N na kaoki au buraentiibu ao au kunnikai te riinen are e rabuna iai rab'atana.

¹⁰N na buuta kunnikaina ni kabebekanna i mataia ana tangira nako, ao bon akea temanna ae e na konaa ni kamaiua.

¹¹N na katoki ana bukamaru Iteraera akea riki manga te Toa ae Moan Otin Nam'akaina, Taian Taabati, ke taian toa ake tabeua.

¹²E taku, “A anganai au tangira taian nnenikureebe ao taian aroka ake taiani biiku b'a boou[12] i bukin te wene ni bure.” Ngkai, Ngai ae te UEA, N na urui ana nnenikureebe ao arokana taian biku; a na riki b'a taian b'ariko n uita uteute aika a kanaki irouia maan aika a aki manana.

¹³N na katuaaea i bukin boong ake e taromauria iai B'aara ao e kabuoki taiani b'ai ni kaboiarara nakoina. N na katuaaea i bukin boong ake e m'aninga iai taekau ma ni karin taiani b'ai ni katamaroa ao taian m'am'a i bukin kab'akaia ana tangira nako. Bon aei Au taeka Ngai ae te UEA!

¹⁴Iteraera, bon te UEA Ngai, N na kam'aneingkami nakon te rereua ma n taetae ni kamaraurau nakoim.

¹⁵N na kaoka am nnenaroka ni kureebe, ao i mwiina te M'arua are Kangaanga[13] are e na riki b'a M'aruan te Kantaninga. Ane ko na kaangai “Eng” nako iu n aron are ko karaoia ngkoa ngke ko kairake, ngke ko kiitana Aikubita.

¹⁶I berita b'a man te tai anne, ko na aranai b'a buum n onea mwiin te toka.[14]

¹⁷N na bon kariaia naba b'a ko na atong araia antiia beekan aikai aika ko araniia b'a “Tooka”.

¹⁸N na kariaia b'a ko na maeka ma te rau-ko na aki manga buakanaki irouia maan aika a aki manana ao mannikiba ke ana b'ai ni kamaamate man te buaka.

¹⁹N na kariaia b'a ko na riki b'a buu n aki toki, ao tiaki te buu ae e kaboaki[15] N na anganiko te motiki taeka ae riai, te eti, te tangira, te akoi,

²⁰ao te kakaonimaki. Ao ane ko na ataai raoi iai b'a antai Ngai.

²¹N na tuanga karawa b'a e na karokoa te karau i aon te aba,

²²ao e na karikirakei taian uita, taiani kureebe, ao taian oriwa n te M'arua are Ietireera.

²³N na kaamae n uniki taian ati ao ni kaota te nanoanga nakon Roo-Ruam'a.[16] N na kaangai nakon Roo-Ammi,[17] “Bon Au aomata ngkami,” ao a kaeka ni kaangai, “Atuara Ngkoe.”