Read Te B'aib'ara Otea 5 Bible Online

Otea 5 - Te B'aib'ara bible

Otea 5

¹Ongora, ngkami aika ibonga! Kakauongo raoi, Iteraera![24] Ongora, ngkami aika kaain te utu n uea. Bon tabemi karaoan te motikitaeka ae eti. Ma[25] kam kam'aneia aomata i Mitib'a ao te Maunga are Tabora.

²Bon taian rua aika a tiritiri ngkami n taabo n taromauri,[26] N na katuaaingkami.

³Iteraera, I atai rongorongomi ni kabane, ao I kuneingkami b'a kam a aki tau, i bukin ami aki kakaonimaki.

⁴Ami m'akuri aika a buakaka boni ngaai bukin aki okimi nako iu Ngai ae te UEA ae te Atua. Kam aki kona n ataai i bukin teimatoan tangiran te wene ni bure iroumi.

⁵Iteraera, e kakoauaa ami bure ami kainikatonga; e bon karekei waemi, ao a reke naba waen Iuta.

⁶Kam anga te tiibu ma te kao b'a taiani karea nako iu, ma I a tia n tannako ma N na rawa ni kaotai.

⁷Kam a tia n aki kakaonimaki nako iu, Ngai ae ami UEA; a tia n reke natimi irouia taiani kabekaau.[27] Ma ngaia are, ko na urubekeaki ngkoe ma arokam n tain te Toa ae Moan Otin Nam'akaina.[28]

⁸A anga te kauring n te bu! Ke ongo te aba i Kibea, Ram'a, ao Betaera are e korakora te bure iai.[29] Beniamin, tarataraiko![30]

⁹N na katuaaea ma ni kamaunaa Iteraera Ngai ae te UEA. Bon aei Au berita are e matoa nakoia barongan Iteraera.

¹⁰Ti te bo ngkami aika taani kairiiri i Iuta ma aomata aika buure ma buakaka aika a kam'aing tian aaba; ao bon anne bukina ngkai N na kaiekaiia n unu.

¹¹E korakora manatuan Iteraera. E bon reke nakoia te b'ai ae a tangiria ma i mwiin taromaurian taian bouananti aika akea manenaia.[31]

¹²N te tai aei, N na kaona Iteraera Ngai ae te UEA n taiani koa ma ni kamkaa Iuta.

¹³Ngkana a noora aorakiia ma manekaiia Iteraera ma Iuta, ane e na kakaaea buokana Iteraera mairoun Aturia ma ueana aika a korakora,[32] Ma a na aki konaa taian uea ni kamaiuia ke ni kamao manekaiia.

¹⁴Ma ngaia are, N na riki b'a te raian ae e tiritiri ni buakana Iteraera ao Iuta. N na buribaiia ma n uota nako te b'ai ae I tangiria, ao bon akea temanna ae e konaa ni katokai.

¹⁵Ao i mwiina, N na rairaki nakon Au tembora ni karokoa a kaota aia kaairua ma n taromauriai, ni karokoa a korakai nanoia ma ni buubuti buokaia.