Read Te B'aib'ara Otea 6 Bible Online

Otea 6 - Te B'aib'ara bible

Otea 6

¹Ti a okira te UEA. E a tia n raeraeira ni kauarerekeira, ma E na kabaei ikoakira ao E na manga kamarurungiira.

²Ai ti uabong ke tenibong riki ao e a kamaiura ma ni kaoki korakorara b'a ti aonga ni manga maiu ma Ngaia.

³Ti na karaoa ara kabanea n tamaroa n ukoukora ataakin te UEA. E a bon roko kaanga taai n te ingabong; E na manga kamaiu nanora kaanga te karau ngkana e kabooua te aonnaba i nanon tain tokin te kam'aitoro.

⁴Kaain Iteraera ma Iuta, tera ae I konaa ni karaoia i bukimi? E a tia ni mauna nako tangirau iroumi e waekoa riki ni m'arua nakon te mabubu ke te aoi n otin taai.

⁵Ao bon anne bukina ngkai I tiringkami n te tai ae ti teuana n taian taeka rinanoia burabeti. Ao anne naba bukina ngkai e ura au motikitaeka kaanga taai n te ingabong.[33]

⁶I tangiria b'a kam na kakaonimaki ma n ataai nakon ae kam na anga taian karea.

⁷Kam kam'aneai ngke kam urua ara boraraoi, n te tabo are e aranaki b'a Atam.

⁸A bane aomata i Kireata ni buakaka; a uraura baimi n raraaia konami.[34]

⁹Ti te bo ngkami aika ibonga ma te kaeng ni kimoa aika a na bakairaa.[35] I aon te kawai nako Tekem [36] kam tiritiri ao kam karaoi riki buure tabeua aika a kakamaaku.

¹⁰I a tia n noori b'aai aika a kakamaaku i nanon Iteraera kam aki kakaonimaki ao kam aki tau i bukin taromauriau.

¹¹Kaain Iuta, E a roko naba ami tai. Boni Ngai ae te UEA ae I tangira Au botannaomata b'a e na manga mari.