Read Te B'aib'ara Otea 9 Bible Online

Otea 9 - Te B'aib'ara bible

Otea 9

¹Ko na aki karaoa am bukamaru Iteraera ke ni kakarongoa[50] n aroia botannaomata ake tem'angina. Ko a tia n aki kakaonimaki nakon Atuam. Kam karaoa kateia ainen matawa ngkana kanakoaki kunin te uita b'a kam kukurei n te m'ane are kam karekea.[51]

²Ma e na karako m'aitin te uita ma te wain,

³ane kam na kiitana aban te UEA. A na nako tabeman mairoumi nako Aikubita; ao tabem'aang a na nako Aturia ni kang am'arake aika a aki itiaki.

⁴Kam na aki konaa n anga te karea are te wain nakon te UEA. Bon akea mai buakon ami karea ae N na kukurei iai a na aki itiaki n aekakin taian am'arake ake e anga te aba nakoia maate. A na ti kabonganaaki kanami i bukin katokan bakimi; ao akea mai iai ae e na uotaki nakon Ana tembora te UEA.

⁵Ane kam na aki konaa ni bukamarua ana Toa te UEA.[52]

⁶E ngae naba ngkana ko biri nako ni maiu, ko na bon toki naba i Aikubita. ao n taunaki i Membiti.[53] kaub'aim aika tirewa a na bua i buakon uteute;[54] aika bwebwerake n am autinrianna nako.

⁷Iteraera, e a roko te tai. E na bon okiriko te b'ai are ko bon kaantaningaia, ao ko bon ataia. Ko taku, “A nanobaba burabeti, ao a rangirang ana tia uarongorongo te Atua.” E a tia am kaairua ae e kakamaaku ni kaoniko n te riribai.

⁸Iteraera, e kanakoai te UEA b'a N na tararuaiko.[55] Ma ko kam'aneia ana burabeti nako ao ko kaona ana tembora n te riribai.

⁹Ko tiritiri ao ko akiako, n aroia m'anen Kibea.[56] Ma E uringa ami bure te Atua, ao E na katuaaeko.

¹⁰Iteraera, ngke I kuneko ngkoa Ngai ae te UEA, ti te bo ma kunean te kureebe i nanon te rereua ae akea kain aona ke uaan te biiku aika a uarereke aika a kangkang. Ao i mwiina, ko taromauriia B'aara-Beora, te bouannanti ae rangi n ribaaki, ao ko bon kamamaaeko kaanga te bouannanti are ko tangiria.

¹¹Ma ngaia are, Iteraera, e a tia ni kiba nako mimitongim kaanga te mannikiba a na aki konaa am aine ni manga karika natiia.

¹²E ngae ngkana iai natimi, N na anai ni kabane ma ni katikuingkami ma te tang. N na tannako, ao ko na inako rikaaki i nanon te kanganga ae e korakora.

¹³Iteraera, ngke I moan kaaitibo ma ngkoe I iangoiko b'a kaanga taian kai te baam aika a maiu n te tano ae raoiroi tanona.[57] Ngkai ko kairiia am aomata ni kaotinakoia, ti i bukina b'a a aonga n tiringaki.

¹⁴Ara UEA, karaoa te b'ai teuana i bukiia am aomata karaoia aia aine b'a a na aki konaa ni karikiia natiia ke ni kaawakiniia natiia.

¹⁵Iteraera, I moanna n ribaiko i bukina b'a ko karaoa te b'ai ae e buakaka i Kirekara.[58] Ngkai N nang kakionakoingkami man Au auti. N na aki manga oki n tangiriko: a tia ami taani kairiiri ni keweai.

¹⁶Iteraera, bon te kai ae te kureebe ngkoe ae e m'autakataka wakaana ae akea uaan m'aangana nako. E ngae ngke iai riki natimi ao kam rangi n tangiriia, N na bon tiringiia ni kabane.

¹⁷Iteraera, ko aki ongotaeka nakon Atuau. Ngkai n nang kairoroingkami b'a kam na tiotio nako man te botannaomata teuana nakon te botannaomata teuana.