Read Te B'aib'ara Ioera 2 Bible Online

Ioera 2 - Te B'aib'ara bible

Ioera 2

¹Katanga te bu i aon Tion are ana tabuki ae e tabu te UEA. Kauringiia aomata nako b'a a na ruru ni maaku! E nang roko ana bong ni motikitaeka te UEA n te tai ae e aki maan.

²E na roo ao ni kananokawaki ma nangin te buaka i aora. A na kaona aon te maunga nako te taanga ni buaka kaanga ai aron nangin buakan karawa. Bon akea te taanga ni buaka ae e korakora ae e a tia n ikotaki mai m'aaina ke ae e na manga ikotaki rimwi.

³A na katobibiaki n taian ai aika a ura: ao akea temanna ae e na biri nako. Ti te bo te aba ma Eten i m'aain kataenikaiana; ao ngkai ti te rereua n tiku.

⁴Ti te bo taraaia ma taian aoti ao a kanenei n ai aroia taan buaka i aoia aoti.

⁵A rurunga i aon taiani maunga kaanga karongoaia taian kaa ni buaka, ke taani buaka aika a korakora aika a tauraoi nakon te buaka. Bon ain te buakonikai ngaiia aika a kaakana boton uteute ae e m'au.

⁶E kakamaaku moan norakiia.[7]

⁷A tam'arakei taian oo kaanga taani buaka; a m'aati ni borein ao a aki konaa n rairaki n taraa rarikiia.

⁸A kanenei ni buaka ni kaineta moaia, ao a aki kona ni butubutu ma ake i rarikiia; a bon aki konaa naba ni kerikaaki n taian kanoanikatebe ke taian kainiwai.

⁹A b'aroakina oon te kaawa ao a nini mwengara nako; a kawakawa i nanon taian winto kaanga taani kimoa.

¹⁰E ruru te aonnaba irouia ao e m'aioio taiani karawa; a manga okirikaaki taai ma nam'akaina, ao a toki otan taian itoi.

¹¹E kairiia te taanga ni buaka aei te UEA ae te Atua ae e aki konaa ni warekaki, ao a ongotaeka nakon ana kaetieti. E rangi ni kakamaaku ana bong ni motikitaeka n te aro are akea ae e konaa moana.

¹²E taku te UEA: E tuai ni b'aka nako taina. Kam bon konaa naba n okirai ma nanomi ni kabane. Moana tangimi ma tanginiwenei! Kam na aki am'aam'arake.

¹³Kam na aki raeraei kunnikaimi i bukin kaotan nanokawakimi. Ma kam na okirai ma nanomi aika a uruaki. I nanoanga, I akoi, ao I areare. I aki kakai un, ao I aki tangira te karekekai.

¹⁴Bon te UEA Ngai ae Atuami. E na mena ngkoa ao N na manga bita nanou ma n nanoangaingkami. Ao ane kam na kakab'aiaki n anganaki taian uita ao te wain ae e tau i bukin te angakarea nako iu.

¹⁵Katanga te bu i aon Tion! Weteia aomata ni ikotiia. Kaota nanokawakim n aki am'aam'arake.

¹⁶Kakoauaa raoi b'a a na bane aomata n tau nakon taromauriau.[8] Kanakomaia ikawai, ataei, ao taian merimeri, ao kairiia mai naba te taanga aika a tib'a tia ni mare man aia bootaki ni mare.

¹⁷Tuangiia au taani m'akuri, ibonga, b'a a na tang i nanon te Tembora ma n anga te tataro aei i rarikin te baonikarea:[9]

¹⁸E rangi n tabeaianga nanon te UEA i bukin te aba aei ao E nanoangaiia ana aomata.

¹⁹Ao E taku ngke E kaekai aia tataro, “N na anganingkami te uita, te wain ao b'aan te oriwa ae e tau, ni katoka kainanomi. N na aki manga anga ngkami b'a kam na kab'ainrangaki irouia botannaomata.

²⁰A buaka te taanga ni buaka mai meang, ma N na kakionakoia nakon te rereua are e kabuebue. Ao a na mka ma ni m'aung ni moa man Taari are Mate ni karokoa te Mereterenian.” E karaoi taian kakai te UEA

²¹ao E karaoi b'aai aika a ab'ab'aki. Ma ngaia ae kam na tuanga te tano b'a e na kukurei

²²ao maan aika a aki manana b'a a na katoka maakuia. A manga mawaawa aaba n uteute; a onrake n taiani uaa kainam'arake ma taian biiku. A onrake taian aroka aika kureebe n taiani kureebe,

²³Kaain Tion,[10] kam na nebonebo mani karinea te UEA ae Atuami! E tituaraoi b'a E karokoa karaun te aumaiaki ma te aumeaang n taina.[11]

²⁴E na kaona ami tabo ni kaaki kun ni uita te uita; a na taonako taian tiaeki n te wain ma b'aan te oriwa.

²⁵Boni Ngai ae te UEA ae Atuami, ae N na kabooa mwiin b'aai aika a bua ake a riki irouia te taanga n rookati teuana ma teuana[12] ake I kanakoi b'a a na buakaningkami.

²⁶au Aomata, kam na am'arake ni karokoa kam rauaki. Ao ane kam na neboai i bukin b'aai aika a kamimii aika I a tia ni karaoi. Kam na aki manga kamaamaaeaki.

²⁷Iteraera, kam na ataia b'a I tei i bukimi. Bon te UEA Ngai ae Atuami akea riki anti tabem'aang. Kam na aki manga kamamaaeaki.

²⁸Rimwi riki, N na anga Tamneiu nakoia aomata nako. A na riki ni burabeti natimi m'aane ma natimi aine. A na mii taiani mii ami unim'aane, a na noori taiani kaotioti ami rorobuaka n ataei.

²⁹Ni boong aika N na bon anga naba Tamneiu nakoia au taani m'akuri, aika m'aane ma aine.

³⁰N na m'akuri taiani kamimii i eta i karawa ao i aon te aonnaba i nano. E reke te raraa ma te ai ao taian nang ma te bubu.

³¹E na okirikaki taai n rotongitong, ao nam'akaina e na uraura kaanga te raraa i m'aain kaotin te bong are e rangi ni kakamaaku arei.

³²Ao ane E na kamaiuia aomata nako te UEA aika a kakaonimaki n taromauriia. E a tia ni berita b'a a na iai aika a reke maiuia i aon te Maunga are Tion ao Ierutarem, ao e na mena i buakoia te aomata are E rineia.