Read Te B'aib'ara Amota 1 Bible Online

Amota 1 - Te B'aib'ara bible

Amota 1

¹Aikai ana taeka Amota, are te tia kawakin tiibu man te kaawa are Tekoa[1] Uoua te ririki i m'ain te m'aeiei, [2] ngke e uea iai Utia i aon Iuta ao Ieroboam[3] are natin Ioati e uea i aon Iteraera, ao te Atua E kaoti baikai ni kabane nakon Amota.

²E taku Amota, “E bekorara te UEA man te maunga are Tion; E rurunga b'anaana mai Ierutarem. A rai tawaana nako, ao a b'ata uteuten te maunga are Karemera.”

³E taku te UEA, “A teimatoa ni kakaraoa te bure kain Taamateko ao N na bon katuaaia i bukin aei. A karaoa te m'akuri n iowawa nakoia kaain Kireata.

⁴Ma ngaia ae N na kab'aka te ai i aon te bareti are e kateaki iroun te Uea are Ataera, ao N na kabuokii nonon te Uea are Ben-atata.[4]

⁵N na urua mataroan te kaawa ae Taamateko, ao N na kam'aeia nako kain te m'arua are Awen ma te tia taua taekan Beta-eten. Ana anaaki kain Turia b'a taenikai nakon te aba are Kira.”[5]

⁶E taku te UEA “A teimatoa ni kakaraoa te bure kain Kata, ao N na bon katuaaia i bukin aei. A tia ni uotia nako au botannaomata [6] man kabooia nakoia I-Etom b'a tooro.

⁷Ma ngaia are N na kab'aka te ai i aon oon te kawa ae Kata, mani kabuoki nonona ni kabane.

⁸N na kam'aeia nako taan tautaeka n te kaawa ae Atitota ao Atikeron. N na orea te kaawa ae Ekeron, ao nikiraia I-Biritia ake a maiu ana bane ni mate.” [7]

⁹E taku te UEA “A teimatoa ni kakaraoa te bure kain Turo, ao N na bon katuaaia i bukin aei. A uotiia nako botannaomata nakon te kataenikaiaki nako abaia I-Etom, ao aki kawakina te berita n iraorao are a tia ni karaoia i marenaia.

¹⁰Ngaia are N na kab'aka te ai i aon aia oo man kabuoka aia nono.”

¹¹E taku te UEA “A teimatoa ni kakaraoa te bure kain Etom, ao N na bon katuaaia i bukin aei. Aki toki n ririmwiia aia utu, [8] Iteraera, ao a kaota te aki nanoanga. Ngkana a un e bon kanganga tokina, ao aki kona ni kakerikaka uniia.

¹²N na kab'aka te ai ni kamaunai nonon Teman, ao Botira.[9]

¹³ E taku te UEA: N na katuaaia kaain Ammon i bukin aia bure aika bati, ao N na bon aki bita au iango. A tia n tiringiia aomata aika a m'aiti i bukin aia rawe aba, ao a tiringiia naba aine aika a bikoukou i Kireata.

¹⁴Ngaia are N na kab'aka te ai i aon oon te kaawa man kabuoki nonon nako Raab'a.[10] Ao Kairiribai a na takaakaa n te bong ni buaka, ao e na mangaongao te bo-ni-buaka kanga ai aron te ukeuke-n-anti.

¹⁵Ana uotaki nako aia uea ma aia b'akuaku b'a taenikai. Boni Ngai, ae te UEA ae I taetae!