Read Te B'aib'ara Amota 2 Bible Online

Amota 2 - Te B'aib'ara bible

Amota 2

¹E taku te UEA, “A teimatoa ni kakaraoa te bure kain Moaba, ao N na bon katuaaia i bukin aei. A tia ni kamatauninga riia uean Etom, ngke a kabuoki ni kamannangii. [11]

²N na kab'aka te ai i aon te aba ae Moaba, man kabuoki nonon Keriota. [12] A na mate kain Moaba ni karongoaan te buaka, ngke a takarua tautia man katanga te buu.

³N na tiringa te tia tautaeka i aon Moaba, ma taan kairiri ake iai ni kabane.” Boni Ngai ae te UEA ae I taetae!

⁴E taku te UEA, “A teimatoa ni kakaraoa te bure kain Iuta ao N na bon katuaaia i bukin aei. A tia ni katinanikua au reirei, man aki kawakin au mwioko. A manga okira aroia aia bakatibu n taromauria antiia.

⁵Ngaia are N na kab'aka te ai i aon Iuta, ao N na kabuoki nonon Ierutarem.”

⁶E taku te UEA, “A teimatoa ni kakaraoa te bure Iteraera, ao N na bon katuaaia i bukin aei. A kabooia nako aomata aika aki kona ni kab'arai aia tarau, aomata aika a kainano aika aki koro boon aia kauniwae.

⁷A toubekaia aika a mamara aika akea aroia, ao a butuia nako aika a kainano mai m'ain kawaia. Ane ana uaia, te karo ma te nati, ni kawara te toro ae te aine ae ti temanna ao ana kamatauninga arau ae tabu.

⁸Ao a wene ni matu i rarikin taabo n taromauri i aon kunnikai aika a anaaki mai rouia aika a kainano b'a b'aai ni kakoaua. Ao anai naba m'aane ake a reke man tuaaia aomata mani kabooa te wain iai, man nim i nanon au tembora.”

⁹“I bon kamaunaia I-Amoraite ni kabane aika aomata aika a rietaata n ai aroia kaai aika tiira, ao man korakora naba n ai aroia kaai aika Oke: I karaoa aei i bukimi Au aomata. [13]

¹⁰I kaotinakoingkami mai Aikubita, ao I kairingkami i nanon te rereua i nanon abwi te ririki, ao I anganingkami abaia I-Amoraite b'a abami.

¹¹I rineia tabem'aang mai buakoia natimi mm'aane b'a burabeti ao tabem'aang b'a Natiraite.[14] Tiaki bon te koaua aei Iteraera? Bon ana taeka te UEA

¹²Ma ko kamooia Natiraite n te wain, ao ko tuangiia burabeti b'a ana aki taekin au taeka.

¹³Ao ngkai N na kamanatuako ao ko na ngirangira n ai aron te aenikaa ae on n te uita, man ngirangira i aan rawawatan uotam.

¹⁴E na bon aki kona naba ni birinako te aomata ae birim'aaka. Ao e na bua naba korakoran te aomata ae ninikoria, ao ana bon aki kona naba n rawei maiuia taian tautia.

¹⁵Ana bon aki kona n taua aia tabo taani katebe, ana bon aki kona ni birinako aika a birim'aaka ana bon aki konaa naba n rawei maiuia ake a toka i aoia aoti.

¹⁶N te bong arei ao te tautia naba ae e rangi n ninikoria e na kab'akai ana b'ai ni maaku man birinako. Bon ana taeka te UEA.