Read Te B'aib'ara Amota 8 Bible Online

Amota 8 - Te B'aib'ara bible

Amota 8

¹Ao e a manga roko i rou te mii teuana mai roun te UEA ae rietaata. Ao I miia te b'aene teuana ma uaan kaai i nanona.

²Ao E tuangai te UEA, “Tera ae ko nooria Amota?” Ao I kaangai, “te b'aene ni uaanikai.” E taku te UEA nako iu, “E a roko te toki i aoia Au aomata aika Iteraera. N na bon aki bita nanou i bukin oreaia.

³E na oneaki te anene n te bareti, b'a te tanginiwenei n te bong arei. A na raea ni mate aomata n aki akaaka, a na bane n teweaki nako i tinaniku, ao akea riki te karongoaa.

⁴Kam na ongora n aei ngkami aika kam kamanatuaia aika a kainano, ma ni kamaunaia aika akea aia b'ai n te kaawa.

⁵Kam kaangai i nanomi, “E na b'ara n ningai te bootaki ae kakannato aei b'a ti aonga ni manga kabooi ara uita. E na toki n ningai te Taabati, b'a ti aonga ni manga kaboonako ara b'ai ni boob'ai? Ao ngkanne ti na kaboobuakai ma ni babakanikawaia aomata n ara b'ai n tau rawawata aika a kewe.

⁶Ti na kabooa nako te uita ae e buakaka n te boo ae e buubura. Ti na kakaea te aomata ae aki kona ni kab'araa baena, ae e aki koro naba boon a na kauniwae, ao ti na kabooa b'a ara toro.”

⁷E a tia ni berita te UEA ae Atuaia Iteraera ao E kaangai, “N na bon aki m'aninga aia m'akuri aika a buakaka.”

⁸Ao e na m'aeiei aonnaba, ao a na bane aomatan Iteraera n taonaki n te rawawata. E na ruru aonteaba, e na iabutirake ma ni manga ora nako n ai aron te karaanga are te Naire.

⁹Ao n te bong arei ao N nang kabunga taai ngke e a tib'a boo tawanou, ao e na roo aonteaba n tain te ngaina. Bon Ana taeka te UEA ae rietaata

¹⁰N na onika ami bootaki nakon bootaki ni mate, ao N na oniki naba ami anene ni kukurei nakon taian tanginiwenei. Ao ane kam na kamarai atuumi ao kam na kunnikaini kunnikai aika a raeraeaki, ao kam na katotongiia utu aika a tanginiweneia natiia te m'aane ae te rikitemanna. E na bon rangi ni maai te bong arei mai moana ni karokoa tokina.

¹¹E a roko te tai are N na karokoa iai te rongo i aon te aba. A na baki aomata ma tiaki i bukin tangiran te am'arake. A na taka naba ma tiaki i bukin tangiran te ran. Ma a na baki ma n taka i bukin tangiran Ana taeka te UEA ae rietaata.

¹²A na kakaae aomata mai meang nako aiaki, ao mai mainiku ni wairio. A na ukoukora Ana taeka te UEA n taabo nako ma e na bon aki reke.

¹³N te bong arei a na b'aka ni kiro m'aane ma aine aika a marurung i bukin korakoran te taka.

¹⁴Kam na bane ni b'aka n aki manga teirake, ngkami ake kam berita n araia antin Tamaria, ake Taan, ao Beera-teba.